1 He Nengazen, pemineǥa nu heini is ked-ampù ku kenikew.

Dineǥa nu heini is kebpehizuhizu ku kenikew.

Tenged te metazeng wey metinumanen ka, ne tevangi a.

2 Peseyluwa a te menge nehimu ku he mezaat is suluǥuen nu.

Su wazà minsan hentei he metazeng diyà te etuvangan nu.

3 Nezaag a te menge kuntada ku, ne mibpesipelahan e zan.

Ne hein mibpirisu e zan diyà te merusirem,

neiring a te minatey he neuǥet dà diyà te penlevengà.

4 Dutun ne naawà is perateng ku ne utew a neherati.

5 Iyan, dutun daan netenuzan ku is nengehimu nu ziyà te nengehuna he timpu.

Ne egngunngunuen ku heini is langun,

6 umbe imbayew ku is menge velad ku zuma te ked-ampù he edhenduen te:

Nenginahanglan a kenikew Nengazen!

Ne iring e en te utew memaza he tanà he egkinahanglan te wahig.

7 Segugunà a tevaka, Nengazen.

Naawè en is perateng ku.

Kenà a kenikew elesi su kela ke ibpatey ku.

8 Kada meselem, ipetentenuzi nu kedì is kebmahala nu kedì.

Su iyan ke zà midseriǥan ku.

Ipenuru nu kediey is hustu he paaǥi te kedsunud ku kenikew.

Su iyan ke zà ed-empuen ku.

9 Luwasa a, Nengazen, te kedezaat kedì te menge kuntada ku,

su iyan ka midhengyuan ku he mebpengalang kedì.

10 Ipenurù nu kedì is paaǥi te kedtuman te egkesuatan nu,

su iyan ke man Megbevayè ku.

Berakat he is hihizuwen he Mulin-ulin nu iyan megiya kedì pehendiyà te dezeyaan he kebpekesavuk.

11 Luwasa a, Nengazen, su wey ka mezeliǥi.

Geina te metazeng ka, luwasa a te kelised ku.

12 Geraa nu is menge kuntada ku tenged te ǥaǥew nu kedì,

su suluǥuen e man kenikew.