1 Angin pezem ke suled ku zà sikew he impesusu ziyà te iney ku, ne egkehimu ke edhezekan ku sikew minsan hendei ne kenà mezaat is ked-isipa kedì te zuma. 2 Edumahan ku sikew ziyà te valey te iney ku, ne zutun penurua a kenikew te kebmahal. Ibpeinum ku sikew te mehemut he vinu he wahig te egkeresen he prutas ku he pumigranata. 3 Ebpeulun a te givang he velad nu ne ikepkep nu kedì is kewanan nu.

4 Sikiyu is menge vahi te Jerusalem, penangdù kew he kenè niw ebpukawen is kebmahal zutun te kenè pa hustu he timpu.

5 Hentei ves heini is ebpekeuma he ebpuun te sibsivayan he edsandig diyà te minahal zin?

Mibpukew ku is gehinawa nu zutun te ziyè ki te sihung te mensanas, he zutun ka meetew. 6 Kenè ke en mahal te zuma, kekenà, iyan e zà kenikew mahala. Kenè ke en kepkep te zuma, kekenà, iyan e zà kenikew kepkepi. Su is kebmahal, iring is gehem din te kemetayen; is keinit te egkeǥezam ta ne kenà egkeeǥen iring te kebpekeuma te kemetayen. Is kebmahal iring te egkeregreg wey edriyubriyub he hapuy. 7 Kenà heini egkeevukan minsan ebusbusan te zekelà he wahig. Minsan delemi pa heini ne kenà gihapun egkeevukan. Kenà heini egkepemasa minsan ivayad pa te etew is langun he ketiǥeyunan din.

8 Duen dey etevey he vetan-en pa su ebpemiyesungan pa. Emun duen ebpengulitawu kandin hengkey is ebeelan dey? 9 Nehilevetan en man sikandin etawa wazè pa ne edipinsahan dey sikandin.

10 Wazè e pa mehileveti ne is menge susu ku henduen be te menge turi. Ne kuntintu is minahal ku kediey.

11 Si Solomon, duen din pemuleey te paras diyà te Baal Hamon he mibpeseupan din te menge perevasuk dutun. Is kada sevaha kandan mibeǥey ziyà te ki Solomon te 1,000 he vuuk he pelata he iyan bahin ni Solomon te bali te pruduktu zutun te pemuleey. 12 Bayèbayè ka, Solomon, emun is bahin nu 1,000 he vuuk he pelata ne is bahin te menge perevasuk nu 200 he vuuk he pelata. Piru ebeyveyaan ku zaan is kediey he egkesuatan mehitenged te pemuleey ku.

13 Ipezineg nu kedì is laǥeng nu, pelanggè ku, iring te ebpemineg daan te laǥeng nu is menge emiǥu nu guntaan te keniyan kew te pemuleey edhiphipanew.

14 Gaanggaan ka hendini te kediey, pelanggè ku, he iring keǥaan te selazeng he edlinglingketew ziyà te menge vuntud he neeneb te menge pinemula he ebeelan he pehemut.