11
Edsilut is Nengazen diyà te Lebanon wey Bashan
1-2 Sikiyu is menge meǥinged diyà te Lebanon, puwasi niw is menge pultahan te menge inged niw su wey mekeseled is hapuy he ebpekevinsul te menge kayu niw he sidru. Egkengezeetan daan is menge kayu he sipris wey is menge kayu he ulayan diyà te Bashan. Ebpemenineǥew is menge perevantey te menge kerehidu su egkengezeetan is melambeg he menge penebtavà dan. Edhiniǥer is menge erimaung su egkengezeetan is menge ketelunan diyà te Jordan he ubpeey zan.
Is Dezuwa he Perevantey te Uyaǥen
Iyan heini migkaǥi te Nengazen he Megbevayè ku:
“Etura nu is para te edlepaan he menge kerehidu. Is menge nemasa wey midlapà kayi ne wazà siluti. Is menge mibelegyà dutun, egkaǥi te, ‘Ereg he edeliǥen is Nengazen! Su sepian ad!’ Minsan is menge perevantey wazè dan ikehizu haazà is menge kerehidu.
“Etura is menge etew ku su iyan a is Nengazen egkaǥi te kenè ku en egkehizuwan is menge etew kayi te kelibutan. Kedì he ketau is kegkesekupa te kada etew te iring din he etew wey te hadì din. Ne heini is dizalem te ǥehem dan is duma, kezeetan is ed-uwiten dan kayi te kelibutan, ne kenè ku edlibriyen is menge etew puun te ǥehem dan.”
Umbe, mid-atur ku is menge kerehidu he para te edlepaan te ebpemelegyà te kerehidu. Migkuwa a te zezuwa he tuked; is sevaha, migngezanan ku te Keupiya ne is sevaha pa migngezanan ku te Kedsevaha.
Naawà is pelavey ku zuen te tetelu he menge perevantey te menge kerehidu he nepeukan e zan. Umbe impaawè ku sikandan is langun seled dà te senge vulan. Ne migkeǥiyan ku is menge kerehidu te, “Kenà ad ed-atur keniyu. Belaǥad en ke ebpatey is hapit en ebpatey wey ke mezeeti is hapit en egkezeeti. Ne is egkengesamà, belaǥad en ke mebpekèkeenà is kada sevaha.”
10 Ne migkuwa ku sikan is tuked he migngezanan te Keupiya ne mibadtì ku heini he tuus te kenè en edleusen te Nengazen is kebpekid-uyun din te langun he menge etew. 11 Umbe, zutun he andew wazè en bali zutun he kebpekid-uyun. Is menge ebelegyà te menge kerehidu he midtengteng kedì, netuenan dan he zuen ibpesavut te Nengazen pinaaǥi kayi te mibeelan ku. 12 Ne migkeǥiyan ku sikandan te, “Emun egkeisip niw he ereg a he edsuhulan, ne iveǥey niw kedì is suhul ku. Iyan, emun kenà a ereg, ne keniyu en heeyan.” Umbe, mibeyazan e zan te 30 he vuuk he pelata he suhul zan kedì. 13 Migkaǥi is Nengazen kayi te kedì te, “Itaǥù nu heeyan is selapì duen te teleǥuey te selapì diyà te valey ku.” Umbe migkuwa ku haazà is 30 he vuuk he pelata, he mid-isip dan he ereg en he suhul kedì, ne intaǥù ku zuen te teleǥuey te selapì diyà te valey te Nengazen. 14 Ne mibadtì ku sikan is ikezuwa he tuked he migngezanan te Kedsevaha he tuus te netamped en is meupiya he kedepità te Juda wey Israel.
15 Mid-uman megkaǥi is Nengazen kayi te kedì te, “Peuvag-uvag ka he sevaha ka he wazè din pulus he perevantey te kerehidu. 16 Su edsavuk a te pengulu ziyà te tanà te Israel he iring te perevantey te menge kerehidu he wazè din pulus: kenè din ebpen-ahaan is netazin etawa kenè din edtembaran is menge nepelian, wey kenè din ibpepenabtab is memeǥasà. Piru egkaan sikandin te usa te melambù he kerehidu ne minsan is sapù te sulu ne edwekaan din su edreǥinuten din en. 17 Mekehizuhizu heeyan is wazè din pulus he perevantey te kerehidu he mid-ewaan din is menge kerehidu! Edtibasen te ispada is belad din wey edtiyuken is kewanan he mata zin, ne wazè en pulus te velad din ne kenè en ebpekaahà is kewanan he mata zin.”