1 Na menge suled, ruen nerineg ku keniyan te sikiyu ne ruen ulaula rin ne meredsik. Duen kun senge etew keniyan ne midsumbang su ebpekid-ulid te ayà din ke esawa te amey rin. Ne misan ke menge etew ne warà pà mebperetiyaya, ne kenà dan ed-ulaula te iring keniyan ne meraat. 2 Ne misan meredsik ke ed-ul-ulaan dan iring ketà, ne meambe ke ebpereyùdeyù kew pà lavew? Iyan tumù ne egkemutu kew ne ibpeawà niyu sikandin dut te kevurunan niyu su atag dut te meredsik ne ulaula rin. 3 Su misan meriyù a keniyu ne iring a te keniyan ded su layun ku egkepegitung sikiyu. Ne geina te iring te keniyan e red ne nepasad en kayi te itungan ku mekeatag keniyan te etew ne mid-ulaula te meredsik. 4 Ne ini se egkiyuhan ku ne egkerumaan niyu, ne vurunburun kew su iring te keniyan ad te keniyu, ne ke gehem ni Hisu Kristu ne keniyan ded te keniyu. 5 Ne egenat te gehem ni Hisu Kristu ne keniyan en te keniyu, ne ibpeawà niyu en ayan ne etew su apey edresayen ni Setanas ke datù te pekaid su apey ebpekedsendit dut te salà din ne ebpekeliyu ke mekatù din ketà te hewii ne kedlived ni Hisu Kristu te egkukum.

6 Warà iya kewagib niyu te ebpendekarak! Iyan meupiya ne id-awà niyu arà se meraat su apey kenà ebpekeeneb dut te langun niyu iring dut te beseanan ne egkahi te, “Misan ibukbuk niyu ke reisek ne pelevag dut te tapung ne ebeelan ne pan ne langun ketà ne edlevag.” 7 Engketà be ne iawà niyu ke meraat ne ulaula niyu iring te mid-ulaula niyu rengan su apey kew ebmetilak sabap dut te kebperetiyaya niyu. Su embiya ini se ed-ul-ulaan niyu ne iring kew ketà te pan ne warà mesewhi te ibpelevag ne mibeelan dut te menge Hudiyanen ne egkeenen dan ketà te Pista ne edsumbelien dan ke nati te bilibili su apey ran egketenuri ke kedsahad te suluhuen te Eleteala dut te menge apù dan dengan. Uya, iring kew en te pan ne warà insawug ne ibpelevag, ne si Hisu Kristu ke iring te nati te bilibili su mibpebpatey sikandin su apey kiyu ebpekeliyu dut te kedusa te salà tew. 8 Tembù be iyan meupiya ne ebpeselamat kiyu te Eleteala atag dut te kinepatey ni Hisus ne mibaal te ralan te kebmetilak tew rut te raan ne ulaula tew rengan ne meraat, su iring arà te ibukbuk ne ibpelevag te pan ne ebpekepeneheewit keniyu te meraat. Ne iyan tew ibpeuna te hinawa tew ke keduma rut te tidtu ne penurù su insempità arà te pan ne warà insawug ne ibpelevag.

9 Iyan migkahi ku rut te rengan ne surat ku keniyu te kenà kew pekiduma rut te etew ne meredsik se ulaula rin. 10 Ne ini se nekahi ku ne kenà diyà ebpekesuhat dut te menge etew ne warà pà mebperetiyaya ne ruen ulaula ran ne meredsik, etawa kegkelagew, etawa kebpemenakew, etawa ebpengeningeni te kenà tidtu ne Eleteala. Su kenà egkepakey ne ed-elihu ki kandan taman te kayi ki pà te ampew te dunya. 11 Ugaid ne iyan ku ebpesebutan keniyu ne kenà kew ebpekiduma rut te menge etew ne egkahi te sikandan ne mibperetiyaya en ugaid ne ke ulaula ran ne meredsik, etawa lelegawen dan, etawa ebpengeningeni ran te kenà tidtu ne Eleteala, etawa metekang se kedlalag dan, etawa ebpelehubug etawa ebpemenakew. Kenà kew pekiduma kandan misan kebpekidtuhen te egkaan.

12-13 Ugaid ne ke menge etew ne warà pà mebperetiyaya, ne warà kewagib ku te ed-usisa kandan su Eleteala rà se egkukum kandan. Ugaid ne ini se ruma tew te ebperetiyaya, ne ruen kewagib tew te ked-usisa kandan. Su ruen impesurat ne Lalag te Eleteala ne egkahi te, “Ipeawà niyu rut te kevurunan niyu ayan se ruma niyu te ebperetiyaya ne meredsik se ulaula rin.”