1 Siaken si Pedro ne edsurat kayi. Ne epustul a ni Hisu Kristu ne iyan din meana ne kedserihan a nikandin. Ne idsurat ku ini riyà te keniyu ne menge mibperetiyaya ki Hisus ne nepemilì te Eleteala ne nekesivurak diyà te menge inged ne Puntu, ne riyà te Gelasiya, Kepedusiya, Asiya wey Bitanya. 2 Su rengan ne nepemilì kew te Eleteala ke Amey tew su ini se netahù te itungan din. Nepemilì kew nikandin ne egkevaluy ne menge etew rin ne lunsey se hinawa ran egenat te gehem te Kedesenan ne Ebpetuntul te Menusiyà. Ne iyan din kebpemilì keniyu su apey kew egkevaluy ne menge etew ne eduma ki Hisu Kristu ne ebmetilak ke hinawa niyu rut te lengesa rin ne impetudà din keniyu ketà te kinepeimatey rin su apey egkeawà ke salà niyu.

Iyan ku ibpengeningeni ne ebpeneuven kew nikandin wey ebmelintad nevenar se hinawa niyu.

3 Ne edeyuen tew ke Eleteala ke Amey rut te Kerenan tew ne si Hisu Kristu. Dekelà se kegkeyru rin keyta su egenat te kebanew rin ki Hisu Kristu ne mibehayan kiyu rin te behu ne umur ne nevaluy ki ne menge anak din. Tembù be ruen ebpenerengen tew ne egkevanew ki red te Eleteala ne ebehayan te umur ne warà edtemanan din diyà te ubpaan din. 4 Ne elin dema egkepenareng tew ini se impegadir te Eleteala ne intail din keytew riyà te langit. Ne ini se keupiya ran ne kenà egkesembian su riyà ne kenà egkereetan, ne kenà egkeawà. 5 Ne ini se impegadir din ne kenitew en. Ne sabap te kedsarig ta te Eleteala ne ebentayan ki rin egenat dut te gehem din su apey kenà ki ebpemekedsuwey gewii te edteharan tew ini se ibehey rin keyta ketà te mewri ne hewii.

6 Ne egenat dutun ne egkehalew kew en misan egkemutuwan kew te mehaan guntaani su sabap te merakel ne keresayan ne egketigkeran niyu. 7 Su ini se keresayan ne iyan ibpenggeram rut te kebperetiyaya niyu embiya meilut etawa kenà. Su misan bulawan ne ebpenggeraman diyà te apuy su apey egkevaluy ne lunsey ne bulawan ne warà sawug din, ne ini se bulawan ne edsahad dà. Ugaid ne muna pà ne belielehà ini se kebperetiyaya niyu rut te bulawan. Tembù be embiya meilut pà se kebperetiyaya niyu rut te kebpenggerami te keresayan ne ebpekeuma riyà te keniyu, ne egkereyù kew wey ibpurù kew te Eleteala ketà te hewii ne edlived si Hisu Kristu kayi te ampew te dunya. 8 Ne misan warà niyu pà mekita si Hisus ne ikelimù niyu sikandin, ne ebperetiyaya kew kandin misan kenà niyu egkekita sikandin guntaani. Ne egkekita ini dut te dekelà ne kegkehalew niyu ne kenà egkerepengan wey kenà igkeupama. 9 Ne iyan kegkeiring ketà su ruen umur ne warà edtemanan din ne egketelimà niyu sabap te mibperetiyaya kew kandin.

10 Ini se kebpeliyu keytew rut te kedusa te salà tew ne rengan dà ne nekahi en ini rut te menge ebpelambas te lalag te Eleteala, tembù be layun dan ebpengedii te meupiya mekeatag kayi. 11 Su ruen mibpeketuenan kandan neraan dut te Kedesenan ne Ebpetuntul te Menusiyà ne riyà ebpuun te ki Hisu Kristu te ruen kemeresayan ne egkeheraman ni Hisu Kristu kayi te ampew te dunya, ne embiya egkeipus arà ne egkekita ini se kebmepurù din. Ne mibpekid-inseey ran te keenu ed-ul-ulaa te Eleteala ini wey engkey se ralan te ini ne egketuman. 12 Ne mibpeketuenan dema te Eleteala dut te menge ebpelambas te lalag din te ini se egked-ulaula ne kenà egketuman dut te hewii ran pà, ugaid ne kayi te sikitew en guntaani ne egketuman ini. Ne benar arà. Su ini se nekahi ran neraan ne ini se Meupiya ne Tudtul ne impesabut en diyà te keniyu dut te ini se ebpemenurù keniyu guntaan. Ne ke Kedesenan ne Ebpetuntul te Menusiyà ne impepengkayi te Eleteala egenat te langit se ebpesabut kandan te ini se ibpemenurù dan. Ne misan ke menge suluhuen te Eleteala riyà te langit ne egkiyug dan ne egkesebutan ini.

13 Tembù be iyan iya se ibpenehana tew ke hinawa ta neraan te keduma te suhù te Eleteala. Ne ebpekerumbahat ki rut te langun ne ed-ul-ulaan tew su apey iyan dekelà te hinawa ta ne ini se meupiya ne ibehey te Eleteala keytew ketà te hewii ne edlived si Hisu Kristu kayi te ampew te dunya. 14 Ne iyan iya se edtumanen tew ke kiyug te Eleteala su apey kenà ki en edlived dut te meraat ne kiyug te hinawa ta ne nelayaman tew rengan te warà ta pà metueni ke benar ne penurù te Eleteala. 15 Su ke Eleteala se mibpemilì te sikitew ne egkevaluy ne menge anak din. Ne embiya ke Eleteala ne warà nekesawug ne meraat dut te langun ne ed-ul-ulaan din, tembù be iyan iya se warà ebpekesawug ne meraat kayi te ed-ul-ulaan ta. 16 Su ruen impesurat ne Lalag te Eleteala ne egkahi te,

17 Ne embiya egkehiyen ta ne Eleteala ke Amey tew ketà te kebpengeningeni tew ne iyan iya se meilut se ked-edati ta kandin taman te ini ki pà te ampew te dunya. Su metidtu se kegkukum din, ne edtuntul te langun ne ed-ul-ulaan tew ne warà ibpelabi rin. 18 Ne netuenan ta ne mibelukasan ki te Eleteala rut te kegkeuripen tew te menge ulala tew rengan ne warà rantek din ne intetahak te menge keep-epuan tew. Ugaid ne sika se imbelukas kenitew ne kenà bulawan etawa pirak ne egkeawà ke elehà din. 19 Su iyan din imbelukas keytew ne ke impelengesa ne Anak din ne si Hisu Kristu. Ne sikandin ne iring te nati te bilibili ne nepemilì dan su warà sarir din ne ibpelengesa ran su ibehey te Eleteala. Ne iring ketà si Hisus Kristu su sikandin ne warà iya salà din. 20 Ne rengan te warà pà limbaha ke kelibutan ne intail en si Hisus te Eleteala ne ebpeimatey su ebpeliyu keytew rut te salà tew. Ne ketà te nekeuma en ke netendù ne hewii te Eleteala te ed-ul-ulaan din ini, ne nekeuma en sikandin su apey kiyu mevelukasi. 21 Ne geina te ini se mid-ulaula ni Hisus ne nekeperetiyaya kiyu te Eleteala. Su sikandin ke mibanew ki Hisus wey mibpepurù dema kandin diyà te langit. Tembù be sikitew ne iyan tew ebperetiyayaan wey edserihan ne Eleteala ne ebanew keytew rema keuremà.

22 Na geina te mibperumaruma ki en dut te tidtu ne penurù ne egkepakey ne meilut se limù tew rut te menge ruma tew te ebperetiyaya su mibmetidtu ke itungan tew. Tembù be ebpelimlimuey ki egenat te hinawa ta ne kenà kayi rà te bèbà ta. 23 Su ketà te mibperetiyaya ki te Lalag te Eleteala ne nevaluy ki ne anak din su iring te insaup ki in-anak, ne kenà etew se iyan mid-anak kenitew su Eleteala ne warà kemetayen din. Ne ini se behu ne umur ta ne ibpepevayà din ini dut te lalag din ne mibperetiyaya key ne ebpekevehey te umur ne warà edtemanan din wey kenà egkesembian. 24 Su ruen impesurat ne Lalag te Eleteala ne egkahi te,