1 Menge suled, embiya mekeatag te hewii ne kebpekeuma ni Hisu Kristu su egkukum dut te menge etew, ne kenà en dait ne idsurat ku pà. 2 Su netuenan niyu en te egketekew se Hewii te kebpekeuma rut te Kerenan tew iring dut te kebpekeuma te tekawen te merukilem ne kenà egketuenan. 3 Su ketà te hewii te kedlived ni Hisus ne iyan itungan te menge etew ne ebmelinew se ked-ubpà dan ne warà igkeuru ran. Ugaid ne egketekew ne ebpekeuma ke kegkereeti kandan ne warà ralan te kebpekeliyu ran. Su ke kebpekeuma dut te kegkereeti kandan ne iring te egketekew ne ebpekeuma ke belilit te meritan ne ed-anak.

4 Ugaid ne sikiyu, menge suled, ne warà kew en med-ubpà diyà te kerusireman iring dut te menge etew ne kenà ebperetiyaya ki Hisus. Tembù be ketà te ebpekeuma arà ne hewii ne kenà niyu en igketekawi iring dut te etew ne warà mebpenehana te kebpekeuma dut te tekawen. 5 Su langun te sikita ne mibmerayag en ke itungan ta ne kenà iring dut te merusirem ne itungan te menge etew ne kenà ebperetiyaya ki Hisus. 6 Tembù be iyan iya se kenà ki ed-iring dut te menge etew ne edlipereng, ugaid ne ibpelevundus ta ke meupiya ne ulaula ta wey ebpenehana ki rut te kebpekeuma rin. 7 Su iyan dà dait ne idlipereng te menge etew ne merukilem. Ne ketà dema ne nelayaman te menge etew te egkehubug. 8 Ugaid ne nekevira en ke sikita ne mibperetiyaya ki Hisus su mibmerayag en ke itungan ta. Tembù be ed-uram ki su apey ke kedsarig ta ki Hisus wey ke kebpelimlimuey ta ne arà ke iring limbutung ta ne ebpekealang keyta dut te kebpenggeram keyta te datù te pekaid. Ne ke penerengen ta te kebpekeliyu ta rut te kedusa te Eleteala ne arà ke iring sepiyu ta ne putew ne ebmelinew ke itungan ta wey ebpekeiseg ke kebperetiyaya ta. 9 Su ke Eleteala ne kenà iyan intahù te itungan din te kebpemilì din keyta ne egkevaluy ne menge anak din apey ki edusaan ketà te kegkukum din en te kelibutan. Ugaid ne iyan din intahù te itungan ne ebpekepeliyu keyta ibpepevayà te Anak din ne si Hisu Kristu ke Kerenan tew. 10 Su sikandin se mibpeimatey mekeatag keyta su misan minatey ki en etawa biviyag ki pà te arà ne hewii te kedlived din kayi, ne ed-ubpà ki riyà te kandin taman te taman. 11 Na geina te ini se edtaharan ta, ne beg-eta niyu ke hinawa dut te menge ruma niyu wey petebtevangey kew.

12 Ne ini pà se ebuyuen ku keniyu, menge suled, edati niyu ke menge etew ne egelevek keniyan te keniyu ne pekilukesen. Su sikandan se nepemilì te Eleteala ne ebpeneheewit wey ebpenurù keniyu mekeatag te keduma niyu ki Hisus. 13 Ipekita niyu ke limù niyu kandan wey edati niyu su atag dut te helevek dan. Ne ruma pà ne ebuyuen ku ne petultulengerey kew.

14 Ne ebuyuen ku lavew, menge suled, te suhua niyu ke pehulen ne egelevek. Beg-eta niyu ke hinawa dut te menge etew ne egkeandek, ne tevangi niyu ke menge etew ne melemu ne egkegaga te penggeram dut te datù te pekaid. Ne iyan iya se menanew se kedlalag niyu dut te kedtevangi niyu te menge etew. 15 Embiya ruen ed-ulaula keniyu te meraat ne kenà kew edsulì kandan, ugaid ne iyan niyu ul-ulaa ke engkey se meupiya diyà te langun ne menge etew.

16-18 Na geina te mibpekidseveka kew ki Hisu Kristu ne iyan kiyug te Eleteala keniyu ne merukilem meandew ne ruen kegkehalew niyu, ne layun kew ebpengeningeni, ne piya engkey se egketemanan niyu ne peselamat kew te Eleteala.

19 Ne kenà niyu selelangi ke idsuhù dut te Kedesenan ne Ebpetuntul te Menusiyà, 20 kenà niyu sudii ke egkehiyen dut te menge ebpelambas te Lalag te Eleteala, 21 ugaid ne surimana niyu embiya benar ne ebpuun ini diyà te Lalag te Eleteala, ne dumai niyu ke langun ne meupiya, 22 ne pekeriyui niyu ke langun ne meraat.

23 Ne iyan ku kiyug ne ke Eleteala ne ebehey te kebmelintad te hinawa tew, ne menu ma perem ke edtilaken din ke ulaula niyu, ke hinawa niyu wey ke langun ne itungan niyu su apey ketà te kebpekeuma ni Hisu Kristu kayi ne warà igkesawey keniyu su ebmetilak kew riyà te etuvangan din. 24 Ne egkeserihan ke Eleteala ke egketuman ini su sikandin se mibpemilì keyta ne egkevaluy ne menge anak din, ne edtumanen din ini se lalag din.

25 Menge suled, pengeningeni kew rema te Eleteala mekeatag kenami.

26 Ikahi niyu rà diyà te langun ne menge ruma ta ne mibperetiyaya mekeatag dut te limù dey kandan.

27 Ruen suhù ku keniyu, su kedserihan a ni Hisu Kristu, te besaa niyu ini se surat diyà te langun ne menge suled tew keniyan.

28 Iyan dey egkiyuhan ne ebpeneuven kew dut te Kerenan tew ne si Hisu Kristu.

Arà dà taman.