1 Na menge suled, geina te iring ketà ke impasad te Eleteala keytew, ne id-awà ta ke langun ne meraat ne ulaula ta wey langun ne meraat ne neketahù te itungan ta. Ne egenat kayi te ked-adat ta te Eleteala ne idtepeney ta ke hinawa ta te keduma rut te kiyug din.

2 Na ini maa se egkehiyen mekeatag te sikami ne itahù key nikiyu te hinawa su warà meraat ne mid-ulaula rey te misan endei keniyu. Warà senge etew rà ne nerupang dey, ne warà etew ne midlimbungan dey keniyu. 3 Kenà ku iyan kebpekekahi kayi ne ruen idsawey ku keniyu. Su benar arà se nekahi ku en ne rekelà ku sikiyu te hinawa su keuyag kepatey rey ne kenà kew egkeawà kayi te hinawa rey. 4 Rekelà se kedsarig ku keniyu, ne lelayun ku rema egkereyù sikiyu. Misan merakel se kemerehenan ku, ne warà lavew mepiley ke itungan ku su rekelà nevenar se kinekehalew ku keniyu.

5 Ne misan nekeuma key en te inged ne Mesidunya ne merasey se hinawa rey su nerehenan key te merakel ne samuk. Ne nerehenan key dut te kunterà dey su ed-usig kenami, ne neuru a mekeatag dut te menge etew ne mibpenurù ku ke embiya edlekà dan dut te kebperetiyaya ran. 6 Ugaid ne ke Eleteala se ebehey te melintad ne hinawa te menge etew ne egkerehenan, ne neveelan din se kegkehalew te hinawa rey ketà te kebpekeuma ni Tito. 7 Ne kenà iyan dey rà kegkehalew se kebpekeuma rin, ugaid ne ke tudtul din kenami te kinekehalew rin mekeatag keniyu. Su intarem din kenami se kiyug niyu te ebpekepengkeniyan a te keniyu su ebuyù kew te ebpeseharen ku sikiyu. Ne elin dema ne tudtul din ne rekelà te hinawa niyu se keduma niyu rut te egkehiyen ku, ketà be ne rekelà se kinekehalew ku.

8 Su misan pà iring ketà te surat ku ne nekebmutu kew, ugaid ne warà a mekedsendit te kinesurat ku ketà. Ke pehaney ne nekedsendit a te kinesurat ku su nevaluy ne impekebmutu niyu te misan mehaan dà. 9 Na gunteani ne nehalew a te kenà sabap ketà te kinepekebmutu niyu, ugaid ne ke kinepeketidtu te ulaula niyu sabap dut te kinepekebmutu niyu. Ne arà se kinepekebmutu niyu ne riyà ebpuun te Eleteala, tembù be keupianan niyu arà se surat ku. 10 Su ke kemutuwan ne ibehey te Eleteala ne egkegaga rin te kebpedsendit te menge etew te kegkesembii te hinawa ran te kebpekeliyu ran te kedusa te salà dan. Ne kenà dait ne ibpedsendit tew ke kemutuwan ne riyà ebpuun te Eleteala. Ugaid ne ke kemutuwan te menge etew ne kenà eduma te Eleteala su kenà dan ebpedsendit, ne riyà dan ded egkepeneheewit te kepepatey ne warà edtemanan din. 11 Ugaid ne sikiyu ne surimana niyu ke meupiya ne neveelan te Eleteala sabap dut te kemutuwan niyu, su ketà puunan ne mid-iseg ke kebmetidtu te ulaula niyu. Ne rekelà te hinawa niyu se kegketueni te menge etew te warà kew meduma rut te ulaula te etew ne nekesalà. Su ingkeepes niyu arà se mid-ulaula rin ne meraat, ne ingkeandek niyu su kema ke ebpekeragkes kew te kedusai kandin te Eleteala. Ne utew en ne egkelimengawan kew kedì su mid-iseg se kedtumana niyu rut te impenurù ku keniyu. Ne seguguneey se kinerusai niyu kandin, arà se etew ne mid-ulaula te meraat. Ne pudtaanan kayi te langun ne impekita niyu se warà kew med-amung ketà te mid-ulaula rin ne meraatey.

12 Ne misan midsurat a keniyu ne kenà ku iyan kedsurati keniyu ne mekeatag keniyan te etew ne nekevaal te salà wey ke etew ne neselaan din. Ugaid ne netuenan te Eleteala te iyan kinesurati ku keniyu ne apey niyu metueni ke endei taman ke limù niyu kenami. 13 Ketà puunan ne rekelà se kegkehalew ku.

Ne mid-iseg se kegkehalew ku te nekita ku ke kinekehalew ni Tito, ne iyan din kegkehalew su nekita rin ke meupiya ne menge ulaula niyu kandin ne nevag-et se hinawa rin. 14 Ingkepedantal ku sikiyu ki Tito te warà pà sikandin mebpengkeniyan te keniyu, ne warà e red mekegkeyà su nekita rin te ini ne benar. Ne langun ne impenudtul ku keniyu ne benar, ne engketà ded dema ke migkahi ku ki Tito mekeatag keniyu ne benar. 15 Arà be se in-iseg te kerekelà te limù din keniyu su embiya egketenuran din se keduma niyu rut te lalag din wey ke kinekehalew niyu kandin, misan engketà te utew en ne ingkekiyab te hinawa niyu se kebpekeuma rin su ke kegkeandek niyu ke ruen warà niyu metuman. 16 Ne kayi ebpuun te ini ne nehalew a nevenar ne kenà en duwaruwa se kebpekedsarig ku keniyu.