1 Na siaken ini si Pablo ne ruen suhù ku keniyu. Su siaken kun ne telawen ke embiya riyan a te keniyu, ugaid ne meharang kun ke menge lalag ku keniyu embiya riyan a te meriyù ne iyan ku kebpekidlalag keniyu ne kayi te surat. Ne ini se suhù ku guntaani ne iyan ku ed-iringan se kebpekidlalag ni Hisu Kristu ne kenà meharang su menanew, 2 su ebuyuen ku keniyu ne peketidtuwa niyu ke ulaula niyu su apey kenà ebmeharang se kebpekidlalag ku keniyu embiya keniyan ad. Su ruen gaga ku te ebpekita te kevurut dut te menge etew ne egkahi te kayi te helevek ku ne iyan ku edumaan ke kiyug te menusiyà. 3 Kenà benar arà su misan etew a rà ne ed-ubpà kayi te ampew te dunya, ugaid ne ini se ralan te ked-atu rey dut te langun ne meraat ne egkunterà te Eleteala ne kenà ke itungan dey rà te kememenusiyai. 4 Su ini se iring metarem dey ne id-atu rey te meraat, ne kenà kebpekidlawan ne kayi rà ebpuun te itungan te etew ugaid ne riyà egenat te gehem te Eleteala ne warà repeng din. Su ini se metarem dey ne kenà egkeetuwan te misan engkey ne kebpekidlawan te kunterà te Eleteala, misan engkey se kevaher din. 5 Su ini se ebmeteremen dey ne ibpeketalew rey ketà te tarù ne kebpekidlawan te menge mepereyù ne etew ne kenà eduma te benar ne penduan te Eleteala. Ne edtelawen dey ke langun ne ibpeitindeg dan ne itungan ne ebelavag dut te kegkesebuti ran mekeatag te Eleteala. Ketà be ne edtelawen dey ke kebpekidlawan dan su apey ran egkepeneheewit te kebperetiyaya ki Hisu Kristu. 6 Ne embiya ibpekita niyu te benar ke keduma niyu te penduan ni Hisu Kristu, ne ketà ne ebpedselaan ku ke menge mibperetiyaya ne kenà eduma ki Hisu Kristu embiya te ebpekeuma ad keniyan.

7 Sikiyu ne warà mekesuhat se itungan niyu su iyan niyu edtengtengan ne ke kebpeparas te etew, ugaid ne iyan niyu kenà egkekita ke riyà te lusud te hinawa rin. Su ruen keniyan te keniyu ne iyan dan itungan ne sikandan dà ke benar ne sugsuhuen ni Hisu Kristu, ugaid ne iyan meupiya ne egkesebutan dan te sikami ne benar dema ne sugsuhuen din. 8 Ne misan ke merakel ku egkehiya te ruen kebayàbayà dey keniyu ne kenà ku igkeyeyai su si Hisu Kristu ke mibehey kedì ketà. Ne kenà din iyan kinevehayi kedì te kebayàbayà se kedereeti rut te kebperetiyaya niyu, ugaid ne ebaher wey ked-iseg te kebperetiyaya niyu. 9 Kenà ku egkiyuhan ne iyan niyu pegitungan se ebpemeliendeken ku sikiyu kayi te menge surat ku. 10 Su ruen keniyan te keniyu egkahi te, “Embiya edsurat kenami si Pablo ne mepasang wey meilut se lalag din, ugaid ne embiya kayi sikandin te kenami ne ke lalag din ne meluvey ne kenà ibpememantag sikandin.” 11 Ugaid ke etew ne edlalag te iring ketà ne dait ne egkesebutan din te ini se egkehiyen ku kayi te surat ne iring din ded ke embiya keniyan ad te keniyu.

12 Arà se menge etew ne ebpereyùdeyù te ruma ne menge etew, ne egkeyeyaan a ne ed-iring kandan. Utew kurupew se itungan dan! Su ebpeiringan dan ke ulaula ran dut te menge etew ne neked-iring se itungan dan. Su warà te itungan dan ke engkey se egkehiyen te Eleteala ne meupiya. 13 Ugaid sikami ne kenà dey egkehiyen ne migelevek dey ke warà dey mehelevek. Su arà se imbehey kenami te Eleteala ne ed-ul-ulaan dey, ne arà se egkehiyen dey ne migelevek dey, abpeg din ke helevek dey riyà te keniyu. 14 Ne warà ku pesehari ke suhù te Eleteala ketà te kebpesabut ku keniyu su insuhù din kedì te ebpesabut dut te Meupiya ne Tudtul mekeatag ki Hisu Kristu, tembù be siaken ke neuna ne ebpengkeniyan te keniyu. 15 Kenà ku ibpendantal ke helevek ne neveelan dut te menge etew ne riyà te ruma ne inged te warà a ketà suhua te Eleteala te egelevek, ugaid ne sikiyu ne neamung en dut te helevek ne imbehey kedì te Eleteala. Ne iyan ku ve egkiyuhan ne ebpekeiseg pà te kebmevaher din ke kebperetiyaya niyu te Eleteala su apey a niyu egkeemungi rut te helevek ku riyà te inged niyu. 16 Engketà be arà ne egkepakey en ne ibpemesabut ku ke Meupiya ne Tudtul diyà te menge inged ne meriyù pà dut te keniyu. Su kenà ku egkiyuhan te ed-ahew wey edantal ke helevek ne neveelan te etew riyà te ruma ne inged ne kenà ku helevek. 17 Su ruen impesurat ne Lalag te Eleteala ne egkahi te, “Kenà dait ne ruen etew ne edantal te kandin dà ne hinawa, ugaid ne iyan din idantal ke neveelan te Eleteala.” 18 Su ke etew ne edeyù te hinawa rin ne kenà tuus arà te benar ke egkehiyen din, ugaid ne ke kedeyù te Eleteala kandin ne arà se tuus te meupiya ne etew sikandin.