1 Ne geina ve te sikiyu ne menge anak kew en te Eleteala ne igkelimù din, ne iringi niyu ke ulaula te Eleteala su apey ke ulaula niyu ne iring kandin. 2 Ne pelimlimuey kew iring dut te limù ni Hisus kenitew. Su ke limù din kenitew ne impekita rin ketà te imbeliwas din ke umur din su apey ke Eleteala se ebpeliyu kenitew te kedusa rin te menge salà tew. Ne ini se kinebeliwas din te umur din ne iring te indrenà ne ibehey te Eleteala ne nekesuhat te hinawa te Eleteala.

3 Sikiyu ini se sakup en te Eleteala ne kenà kew iya ebpengingniyug, kenà kew ed-ulaula te temperasà, ne kenà kew egkeeram-am, su langun kayi ne kenà dait ne ulaula te etew ne mibperetiyaya en ki Hisus. Kenà egkepakey ne ruen iring kayi ne egkekahi mekeatag te sikiyu. 4 Kenà dema edait te sikiyu ne meredsik se kebpemèbà din, etawa edlalag te warà rantek din, etawa edwalìwalì te temperasà. Ugaid ne iyan niyu rà leleha ke lalag ne ebpekereyù te Eleteala. 5 Su tentenuri niyu ve ini su benar, ke etew ne ebpengingniyug, ke etew ne ed-ulaula te temperasà wey ke etew ne egkeeram-am ne kenà ebpekeamung sikandin dut te menge etew ne edetuan ni Hisu Kristu wey ke Eleteala. (Su ke etew ne egkeeram-am, ne arà se kegkeeram-am din se ebpengerapan din ne kenà ke Eleteala.)

6 Kenà kew ve imbe egkeekali keniyan ke ruen egkahi te ayan ne menge ulaula ne warà dà diyà te itungan te Eleteala su ebpeseharen din dà. Su ketà ebpuun ne menge ulaula ne ayan se menge etew ne warà meduma te Eleteala ne ed-isuhaten din su mid-ulaula ran ke igkeepes te Eleteala. 7 Ketà be ne kenà kew ve ebpekiduma te menge etew ne iring ketà. 8 Su rengan ne iring te ke itungan niyu ne merusirem, su warà niyu pà metueni ke ralan te Eleteala. Ugaid ne guntaani ve ne ke itungan niyu ne nereyahan en su midsarig kew en ki Hisu Kristu ke Kerenan tew. Tembù be iyan niyu ul-ulaa ne dait ne ulaula rut te etew ne kayi en te kerayahan. 9 Su embiya nereyahan en ke itungan niyu, ne egkekita kayi te ulaula niyu ke langun ne meupiya wey ketidtu wey arà se benar. 10 Langun ne perangey niyu ne surimana niyu ke ebpekesuhat be te hinawa te Eleteala etawa kenà, ne iyan niyu rà ul-ulaa arà se kiyug din. 11 Kenà kew ed-amung-amung dut te ulaula ne warà keupianan din, su arà ke perangey dut te menge etew ne merusirem pà ke itungan din. Ugaid ne iyan niyu ul-ulaa ke metidtu su apey ran egkekita ke keraat dut te ulaula ran. ( 12 Su misan ke kegkepengasak dà dut te ibpegelesà ne ulaula ran ne mekeyeyà nevenar.) 13 Su embiya ke ed-ul-ulaan diyà te merusirem ne egkerayahan, ne egkekita ke benar dut te ed-ul-ulaan dan embiya meupiya etawa meraat. 14 Ne ketà te egkekita ran ke meraat, ne egkepayahan dan te itungan dan ne edtidtuwen dan. Tembù be ruen beseanan ne egkahi te,

15 Tembù be urami niyu nevenar ke ed-ul-ulaan niyu. Kenà kew ed-ulaula iring dut te menge etew ne warà nesebsebutan din, ugaid ne iyan niyu ul-ulaa ne iring dut te metampas ne menge etew. 16 Su gunteani ne hewii ne ke menge etew ne metehel ne ed-ulaula te meraat, ugaid ne sikiyu ve mulà ne kenà kew alang-alang te edtuman te meupiya ne ed-ul-ulaan. 17 Kenà kew ed-ulaula te warà atag din, ugaid ne pemengaa niyu ke engkey se ed-ul-ulaan niyu ne ebpekesuhat te kiyug te Kerenan tew ne si Hisus.

18 Kenà kew ve ed-inum te ebpeketevereg su ayan ne ebpekegkeraat keniyu. Ugaid ne iyan niyu peveybeyaa te hinawa niyu ke Kedesenan ne Ebpetuntul te Menusiyà. 19 Embiya egkevurun kew ne beyuka niyu ke Lalag te Eleteala kayi te iringà niyu su apey ebpekereyù ki Hisu Kristu ke Kerenan tew. Ne arà se kedeyù niyu ki Hisus ne egenat imbe te mehalew ne hinawa niyu. 20 Ne peselemati niyu ke Eleteala ne Amey tew misan engkey se egketemanan niyu su atag dut te mid-ulaula ni Hisu Kristu ke Kerenan tew.

21 Layun kew pekita te kebpeed-edatey niyu su geina te iyan niyu ibpeuna te hinawa niyu ne si Hisu Kristu.

22 Sikiyu ne menge meritan, ne perumaruma kew dut te esawa niyu iring te kebperumaruma niyu ki Hisu Kristu. 23 Su ke meama ne iyan ebayàbayà dut te esawa rin iring ki Hisu Kristu ne iyan ebayàbayà te langun tew ne mibperetiyaya en. Su ke langun tew ne mibperetiyaya en ne iring te lawa rin ne sikandin en ke mibpeliyu keytew. 24 Ketà be ne ke menge meritan ne ebperumaruma dut te esawa ran iring dut te langun tew ne mibperetiyaya ki Hisu Kristu ne ebperumaruma kandin.

25 Sikiyu ne menge meama, ne iyan iya se limui niyu ke esawa niyu iring dut te kegkelimù ni Hisu Kristu te menge etew rin. Su imbeliwas din ke umur din te kebpeliyu rin keytew. 26 Mid-ulaula rin ini su apey kiyu ebmetilak dut te langun ne salà tew. Su iring te midlùluan din ke menge salà tew, ne ke tuus te midtilak kiyu en ne arà se kinebunyahi kenitew wey ke Lalag te Eleteala ne edumaan tew. 27 Uya, midtilak kiyu rin dut te menge salà tew te kebpenehana rin kenitew su apey meupiya se kedtengteng din kenitew ketà te hewii ne kedlived din kayi su ed-angey keyta, ne warà idsawey rin kenitew misan deisek dà. 28 Ketà be ne sikiyu ne menge meama, na iyan iya se limui niyu ke esawa niyu iring te kegkelimù niyu te lawa niyu, su ke esawa nu ne iring ded te lawa nu. 29 Su warà etew ne kenà din ebpedtumuen ke lawa rin su edtugenuren din. Engketà be imbe ke kedtugenura ni Hisu Kristu dut te langun ne sikitew ne mibperetiyaya kandin, 30 su sikitew ini ne nevaluy ne iring te pepatà te lawa rin. 31 Su iring dut te impesurat ne Lalag te Eleteala ne egkahi te, “Embiya ed-esawa ke meama, ne ed-ewaan din ke amey rin wey ke iney rin ne ebpekidtampung sikandin dut te esawa rin su ebpekidseveka sikandin.” 32 Ne ke meana ne impesabut dut te Eleteala kayi te ingkesurat ne lalag din ne mekegeyip. Ne iyan ku ebpeiringan ne si Hisu Kristu wey langun ne mibperetiyaya en kandin. 33 Ne kenà arà dà se meana rin su ebpenurù dema te sikiyu ne tiwaley. Tembù be sikiyu ne menge meama ne iamin niyu ke hinawa niyu te edlimù te esawa niyu iring te kedlimù nu te hinawa nu. Ne engketà dema ke meritan, edati niyu rema ke esawa niyu.