Ke Surat Diyà te Menge
Hibruhanen
1
Ke Eleteala se Impepenudtul ke Anak din te Kiyug din ne Ibpesabut diyà te menge Etew
1 Rengan ne ruen impesabut te Eleteala riyà te menge keep-epuan tew. Merakel se impesabut din kandan ne merakel dema se impetiralan din kandan, ugaid ne kayi te menge etew ne mibpelambas te lalag te Eleteala ne impesabut din ini su apey sikandan se ebpemenudtul diyà te menge etew. 2 Ugaid ne guntaani manen, ne iyan en maa ibpesabut dut te Eleteala kenitew ne ibpepevayà din dut te Anak din si Hisus. Su sikandin se impelimbag din kayi te dunya, ne sikandin dema ke nepemilì te Eleteala ne ebpegkemunayen dut te langun taman. 3 Ne ke anlag dut te raman te Eleteala ne egkekita en kayi te Anak din, ne langun ne riyà te Eleteala ne kayi en dema te Anak din. Warà mibiraan dan iya. Ne sikandin se egawed dut te langun ne nelimbag kayi te dunya su kayi ebpuun te gehem dut te lalag din. Ne sikandin dema se mibaal te ebpekepeliyu te menge etew dut te salà din. Ne guna su nepasad din en, ne mid-ulì en diyà te langit ne riyà mibpinuu te egkekewanan te Eleteala ne warà repeng te kedatù din.
Ke Anak te Eleteala se Mepurù pà Dut te Menge Suluhuen
4 Ketà be ne ke Anak te Eleteala ne iyan pà mepurù dut te langun ne suluhuen. Ne misan ke ngaran ne imbehey te Eleteala kandin ne mepurù pà ini dut te ngaran ne imbehey rin dut te menge suluhuen din. 5 Su warà megkahi ke Eleteala diyà te menge suluhuen din iring te migkahi rin te Anak din, ke sikandin te,
“Sikew ke Anak ku,
guntaani ne ebpeketuenan ku se siak se Amey nu.”
Ne warà din mekahi diyà te suluhuen te,
“Siaken ke Amey nu,
ne sikuna ke Anak ku.”
6 Ugaid ne ketà te kedsuhua en dut te Eleteala dut te mekegehem ne Anak din kayi te ampew te dunya ne iyan din migkahi se,
“Sikiyu ne menge suluhuen ku,
ne erapa niyu sikandin.”
7 Ne iyan nekahi te Eleteala mekeatag dut te suluhuen din se,
“Sikandan se edsuhuen ku
iring te keramag etawa regreg te apuy
se edtuman te kiyug ku.”
8 Ugaid ne iyan migkahi te Eleteala dut te Anak din mulà se,
“Ke kedatù nu, Eleteala,
ne warà edtemanan din.
Ne ke kedatù nu dut te menge etew nu
ne metidtu rà nevenar.
9 Su iyan nu kiyug ke metidtu ne ulaula,
ne igkeepesi nu ke ulaula ne meraat.
Tembù be siaken ke Eleteala nu se mibpemilì kenikew,
ne imbehey ku keykew ke kehelawan
su mid-edatan ku sikew
muna pà dut te menge ruma nu.”
10 Ne ruen pà duma ne migkahi te Eleteala diyà te Anak din te,
“Pehaney ne sikuna, Kerenan,
se midlimbag kayi te dunya,
ne sikuna red se mibaal te langit.
11 Langun ketà ne egkerundus,
ugaid ne sikuna mulà ne warà kegkeparin nu.
Su iring te velegkas ne daan en se kegkerundus dut te langit wey tanà.
12 Su iring te kedluklukuna nu te belegkas
se kedluklukuna nu te langit wey tanà
su edsembian nu te vehu.
Ugaid ne sikuna mulà, ne warà kegkeparin nu,
ne ke umur nu ne warà mulà edtemanan din.”
13 Ne warà suluhuen te Eleteala ne migkehiyan din iring te migkahi rin dut te Anak din, ke sikandin te,
“Kayi ka pinuu te egkekewanan ku
taman te kenà ku pà ebpenggiekan ke kunterà nu
ne egkevaluy ku sikandan ne ebpemunasan te paa nu.”
14 Su ini se menge suluhuen te Eleteala, ne edsugsuhuen din dà iya sikandan su ebpetevangen dut te menge etew ne midtelimà dut te umur ne warà edtemanan din.