3
Iyan pà Mepurù si Hisus ki Moises
1 Na menge suled ku ne mibperetiyaya en ki Hisus, ne nepemilì en dema te Eleteala te egkevaluy ne menge etew rin, ne iyan niyu pegpegitunga ne si Hisus. Su sikandin ke midsuhù te Eleteala kayi te ampew te dunya te ebpesabut mekeatag te kebpekeperetiyaya tew wey apey sikandin ke mepurù te terebpelengesa ne ebpeninindeg kenitew diyà te Eleteala. 2 Ne ini te mid-ulaula rin dut te impehelevek kandin te Eleteala, ne mid-up-upianan din se kinetumana rin dut te langun iring ki Moises dengan te mid-up-upianan din se kinetumana rin dut te impehelevek kandin te Eleteala te kinepeneheewita rin dut te menge etew te Eleteala ne ebpekeiring dut te sakup te lusud te valey te Eleteala. 3 Ugaid ne iyan pà mepurù si Hisus ki Moises, su iring dut te etew ne ebevaley ne iyan pà sikandin egkevantug, kenà ke imbevaley rin. 4 Su langun te baley ne ruen mibaal ketà, ugaid ne ke Eleteala ne iyan mibaal te langun taman.
5 Na misan sugsuhuen dà te Eleteala si Moises, ne mid-up-upianan din se kineruma rin te Eleteala te kinepeneheewita rin dut te menge etew ne ebpekeiring te sakup dut te lusud te valey te Eleteala. Su sikandin se ebpenudtul mekeatag te ibpesabut te Eleteala keuremà. 6 Ugaid ne si Hisu Kristu, ne sikandin ke Anak te Eleteala ne ebpengemuney dut te valey, ne mid-up-upianan din dema se kinetumana rin dut te langun ne mibpeveelan kandin te Amey rin. Ne sikitew ve ke duma ki Hisus, ne ebpekeiring kiyu te sakup te lusud te valey te Eleteala embiya mevaher se kineperetiyaya tew kandin wey kenà kiyu eduwaruwa atag te ebpenerengen tew ne impasad te Eleteala.
Ke Inged ne Ed-imelayan te Kemerehenan ne Impenehana te Eleteala rut te Ebperetiyaya Kandin
7 Engketà be ne ed-ulaula kiyu te iring te nekahi rut te Kedesenan ne Ebpetuntul te Menusiyà ne egkahi te,
“Na, embiya egkerineg niyu ke Lalag te Eleteala,
8 dumai niyu ne kenà kew pekeresen te ulu niyu
iring dut te keep-epuan niyu rengan
ne mid-atu te Eleteala.
Su gewii te riyà dan te tanà ne kenà egkeubpaan te etew,
ne migeraman dan ke Eleteala
ke edusaan din sikandan dut te salà dan.”
9 Ne iyan nekahi te Eleteala mekeatag kandan se,
“Misan pà te nekita ran en
ke mekegeyip ne ulaula ku
lusud te neked-epat nepulù ne rahun,
ne impeiseg den pà lavew
ke kebpenggeram dan kedì.
10 Tembù be neepes a kandan ne migkahi a te,
‘Ini se menge etew ne layun edsuwey ke hinawa ran kedì
ne kenà dan edumaan ke impemandù ku.’
11 Uya, neepes ad iya ne mibpenendan ad te,
‘Kenà dan iya nevenar ebpekelusud
ketà te inged ne ebpekeimeley ran dut te kemerehan
ne ibehey ku perem kandan.’ ”
12 Engketà be menge suled ku, uram-uram kew nevenar su apey warà seveka keniyu ne eduma te meraatey ne itungan ne ed-awà se peretiyaya rin te Eleteala, su arà se kebpekepekeriyù tew rut te Eleteala ne warà kemetayen din. 13 Ugaid ne taman te ruen pà gewii tew te keduma te Lalag te Eleteala ne tevengaani niyu te ebpeiseg te peretiyaya niyu su apey kenà ebmeresen te ulu niyu ne kenà kew eduma te Eleteala su mid-ekalan niyu sikandin dut te salà niyu. 14 Su embiya egewaran tew te mevaher ini se sarig tew te behu ki pà mebperetiyaya ki Hisus taman te ketepusan, ne ebpekeruma ki kandin dut te langun ne imbehey kandin te Amey rin. 15 Su ini se impesurat ne Lalag te Eleteala ne egkahi te,
“Na, embiya egkerineg niyu ke lalag te Eleteala,
dumai niyu ne kenà kew pekeresen te ulu niyu
iring dut te keep-epuan niyu rengan
ne mid-atu te Eleteala.”
16 Ne engkey ve ayan se menge etew ne nekerineg te lalag te Eleteala, ugaid ne mid-atu kandin? Ew, sikandan ke menge Hudiyanen ne mibpeneheewit ni Moises te kineawà dan diyà te inged ne Ihiptu rut te kinepengunguripena kandan. 17 Ne engkey pè be maa arà se menge etew ne nepeukan te Eleteala lusud te neked-epat nepulù ne rahun? Ew, sikandan ke mid-ulaula te meraatey, tembù be midusaan dan te Eleteala te kinepematey ran diyà te tanà ne kenà egkeubpaan te etew. 18 Ne engkey ve arà se menge etew ne midtendanan te Eleteala te kenà dan iya nevenar ebpekelusud ketà te inged ne ebpekeimeley ran ne ibehey rin perem kandan? Sikandan ded iya ayan se menge etew ne mid-atu kandin. 19 Engketà be ne netuenan tew se ayan ne menge etew rengan ne warà en iya mekelusud ketà te inged ne impenehana te Eleteala kandan su warà dan mebperetiyaya kandin.