1 Menge suled, sikiyu ne mibperetiyaya en ki Hisu Kristu ke Kerenan tew ne mepmepurù, ne kenà meupiya ne ke ked-elit-elit niyu te langun ne menge mibperetiyaya ne kenà megidsan misan ayuayu etawa kewasa. 2 Upama ke ruen edlusud te kevurunan niyu te ebpengeningeni te Eleteala ne kewasa ne etew ne ebevelegkas te meupiya wey edsisising te bulawan, ne egkeiseg-iseg ne ruen ayuayu ne edlusud dema ne ebevelegkas te ebpendriteyritey, 3 ne embiya ed-el-eliten niyu arà se mibevelegkas te meupiya ne egkahi te, “Kayi ka pinuu te meupiya ne ebpinuuwan,” ugaid ne ke ayuayu ne egkahi ka te, “Itindeg ka riyà etawa pinuu ka kayi te saag ne uvey te ebpinuuwan ku,” 4 na embiya ini se ed-ul-ulaan niyu, ne meraat arà su ke ked-elit-elit niyu te menge ruma niyu ne mibperetiyaya ne warà meked-iring su kunaan niyu ke kewasa ne etew ne iyan pà belielehà dut te ayuayu. Ne ini se mid-ulaula niyu ne ebpuun arà te meraat ne itungan niyu.

5 Na menge suled ku ne igkelimù ku, pemineg kew kayi te egkehiyen ku. Misan ke kearen dut te menge ayuayu kayi te ampew te dunya ne reisek dà, ne sikandan dema iya ke menge etew ne nepemilì te Eleteala su apey ke sarig dan kandin ne edekdekelà, ne sikandan dema se edlusud dut te Edetuan din su ini se impasad din dut te langun ne egkelimù kandin. 6 Ugaid ne sikiyu, ne warà niyu el-elita ke menge ayuayu su iyan niyu ed-el-eliten ke menge kewasa. Meambe warà niyu metenuri te ke kewasa se mibpenlupig keniyu wey mid-ewit keniyu diyà te kukuman? 7 Ne sikandan se ebpenlalag te meraat mekeatag ki Hisu Kristu ke Kerenan tew ne igkelimù tew.

8 Na iyan meupiya ne ed-ul-ulaan niyu ne edumaan niyu ke dekelà ne penduan te Eleteala ne impesurat din ne egkahi te, “Ikelimù nu ke ruma nu iring ded te kegkelimù nu te hinawa nu.” 9 Ugaid ne embiya iyan niyu ed-el-eliten ne ke kewasa ne etew, ne ke ayuayu ne warà niyu el-elita, ne nekedsalà kew ne egkesuhat kew te kedusa te Eleteala su nekerimpas kew rut te penduan din. 10 Su ke etew ne eduma te merakel ne penduan te Eleteala ugaid ne nekerimpas sikandin te seveka rà, ne nekedsalà sikandin diyà te etuvangan te Eleteala iring dut te etew ne nekerimpas te langun ne penduan. 11 Su migkahi ke Eleteala dut te penduan din te, “Kenà ka edlangkadlangkad te esawa nu,” ne migkahi red maa te, “Kenà ka imatey.” Misan warà ka medlangkadlangkad te esawa nu ugaid ne nekepatey ka, ne nekesalà ka ne nekerimpas ka rut te penduan te Eleteala. 12 Tembù be uram kew te kedlalaglalag niyu wey ke ulaula niyu apey kew kenà ebpekerimpas te penduan din. Su ke penduan te Eleteala se ebpekepeliyu te etew te salà din. Ne Eleteala se egkukum te langun ne etew keuremà mekeatag te keduma ran te penduan din, ne iyan din igkukum ne ke kandin ded ne penduan. 13 Ne ketà te kegkukum te Eleteala te langun ne etew ne kenà din igkeyru ke etew ne warà meyru te menge ruma rin kayi te ampew te dunya. Ugaid ne ke etew ne egkeyru nevenar te menge ruma rin ne kenà egkeandek te Eleteala ne egkukum kandin.

14 Menge suled, embiya ruen etew ne egkahi te mibperetiyaya rin si Hisu Kristu ke Kerenan tew ugaid ne kenà egkekita kayi te ulaula rin, ne warà atag din arà te kinekahi rin te mibperetiyaya rin su arà se kegkahi rin te mibperetiyaya sikandin ne kenà ebpekegaga ne ebpeliyu kandin dut te salà din. 15 Upama ke ruen menge ruma nu ne mibperetiyaya ne egkerehenan su warà belegkas dan wey warà egkekaan dan, 16 ne ebpendiyà ka se egkahi te, “Kerenan en se metau keniyu! Kukumbalà kew su apey kew kenà egkeadsil ne kaankaan kew!” Na embiya iring ketà se migkahi nu kandan ugaid ne warà ka medtavang te kerehenan dan, ne warà ded atag din arà te kinekahi nu. 17 Ne iring ded dema ke kedsarig tew. Embiya egkahi ki te ebperetiyaya ki te Eleteala ugaid ne kenà egkekita kayi te ed-ul-ulaan tew, ne kenà benar arà se peretiyaya tew.

18 Na kema ke ruen egkahi te, “Senge etew se ebperetiyaya te Eleteala su apey ebpekeliyu, ne seveka se ed-ulaula te meupiya su apey ebpekeliyu.” Ugaid ne ini se tavak ku ketà te etew ne edlalag te iring ketà. Iyan meupiya ne ebperetiyaya ki, ugaid ne kenà tidtu se peretiyaya ta embiya kenà egkekita kayi te ed-ul-ulaan ta. Iyan meupiya ne ibpekita ta ini se peretiyaya ta ibpepevayà dut te meupiya ne ed-ul-ulaan ta. 19 Embiya egkahi ka te mibperetiyaya ke en te sebseveka rà ke Eleteala ne meupiya arà, ugaid ne kunaan nu ke kebperetiyaya nu se ebpekegaga. Misan ke busew ne ebperetiyaya ne egkerkeren dan te kegkeandek dan kandin, su netuenan dan se edusaan dan pà te Eleteala. 20 Kenà metau ne ebpegitung ke etew ne edlalag te iring ketà! Ebpesebutan ku pè be sikiyu kayi te kebperetiyaya ta, embiya kenà egkekita ibpepevayà te ulaula ne meupiya, ne warà rantek din ke peretiyaya ta.

21 Tentenuri nu ke apù tew rengan ne si Abraham su nevaluy sikandin ne metidtu diyà te etuvangan te Eleteala su ke mid-ulaula rin, su midumaan din nevenar ke insuhù te Eleteala kandin ne indenà din ke anak din si Isaac diyà te ebpelengesaan te menge binatang ne ibehey ran te Eleteala. 22 Kayi ta ve imbe egketueni se tidtu se peretiyaya ni Abraham su impekita rin kayi te mid-ulaula rin. Ne ini ve se kineduma rin dut te kiyug te Eleteala se kinemevaher te sarig din. 23 Ketà be ne ke lalag te Eleteala ne impesurat din dengan ne netuman en, ke sikandin te, “Mibperetiyaya si Abraham te edtumanen te Eleteala ke impasad din kandin, tembù be nevirang te Eleteala si Abraham ne metidtu.” Ne arà imbe se kineingerani kandin te sepekat te Eleteala. 24 Ketà ne nesebutan ta te ke etew ne metidtu diyà te etuvangan te Eleteala ne arà se etew ne eduma te lalag din. Su riyà te Eleteala ne arà se egkahi ki te ebperetiyaya ki ne kenà ebpekegaga embiya kenà egkekita kayi te ed-ul-ulaan tew.

25 Iring ded dema ketà ke sarig ni Rahab ke sundal ne meritan dengan. Mibmetidtu sikandin diyà te etuvangan te Eleteala su sabap dut te meupiya ne ulaula rin su mibpepemenayik din ke deruwa ne suhù ni Josue ne nekeuma su edsirib te inged din ne Hiriku, ne midtevangan din sikandan apey ran ebpekepelelahuy se ed-ulì ibpepevayà te sengebias ne ralan.

26 Na ini se kebperetiyaya tew te Eleteala ne iring te lawa te etew, su embiya warà hinawa rin ne warà atag din su minatey. Iring din ded dema se peretiyaya tew, su embiya warà ed-ul-ulaan tew ne meupiya ne edruyud te peretiyaya tew ne warà atag din ke peretiyaya tew.