1 Na ruen ibpekilala ku keniyu ne meritan ne mibperetiyaya ki Hisus ne edtavang diyà te egkevurunan dut te menge mibperetiyaya riyà te inged ne Sinsiriya. Ne iyan din ngaran ne si Febe. 2 Embiya ebpekeuma sikandin ne gelhelaa niyu su ruma tew sikandin te ebperetiyaya ki Hisu Kristu ke Kerenan tew, su ini ke edait ne ulaula tew te menge etew ne mibperetiyaya en. Ne tevangi niyu sikandin embiya ruen kurang din su merakel dema ini se netevangan din abpeg kediey.

3 Ne ibpesabpet niyu rà ini se penginginsà ku riyà te ki Priscila wey ki Ekila, su menge ruma ku sikandan te egelevek ki Hisu Kristu. 4 Ne sabap dut te kedtevangi ran kediey ne warà dan isepayan ke ebpatey ran. Ne rekelà be se kebpeselamat ku kandan, ne kenà siaken dà su misan ke langun ne kenà menge Hudiyanen ne mibperetiyaya en ne ebpengarap kayi ne rekelà ded dema se kebpeselamat dan. 5 Ne idlakit niyu rema ini se penginginsà ku rut te menge etew ne mibperetiyaya ne riyà egkevurun te valey ran su ebpengarap dan te Eleteala.

Ne idlakit niyu red dema ini se penginginsà ku riyà te igkelimù ku ne sepekat ku ne si Ipinitu, su sikandin ke neuna ne etew ne mibperetiyaya ki Hisu Kristu keniyan te lusud te Asiya. 6 Idlakit niyu rà ki Maria ini se penginginsà ku kandin, arà se migelevek te mevaher te kedtevangi keniyu. 7 Idlakit niyu rà dema ini se penginginsà ku ki Andruniku wey si Huniyas, menge ruma ku ne Hudiyanen te nevilanggù. Ne egkeedatan nevenar sikandan dut te menge kedserihan ni Hisus, ne sikandan pà se neuna ne mibperetiyaya kenà siaken.

8 Ne idlakit niyu rè be ini se penginginsà ku ki Empliyatu, ke sepekat ku ne rekelà ku te hinawa sabap dut te kineperetiyaya tew ki Hisu Kristu ke Kerenan tew. 9 Ibpesampey niyu rà ini se penginginsà ku ki Urbano ke ruma ku te egelevek ki Hisu Kristu, wey si Istakis rema ke megeget ne sepekat ku. 10 Ibpesampey niyu rà ini se penginginsà ku ki Epilis, arà se impekita rin ke sarig din ki Hisu Kristu diyà te langun. Ne igkahi niyu rà ini rema riyà te telteleanak ne ensi Eristubulu. 11 Ibpesampey niyu rà rema ini ki Hirudyun ne ruma ku ne Hudiyanen, wey riyà pà maa te telteleanak ne ensi Narciso ne mibperetiyaya en.

12 Ne ibpesampey e rà nikiyu riyà te ki Tripina wey ki Tripusa, ke menge mehiedgied ne sugsuhuen ni Hisu Kristu ke Kerenan tew. Ne ibpesampey e red nikiyu riyà te ki Persida, ke megeget ne sepekat ku ne rekelà se neveelan din te kedtumana rin dut te mibpeveelan kandin ni Hisu Kristu ke Kerenan tew. 13 Ne ibpesampey e rà dema nikiyu riyà te ki Rufo ke nekilala te langun ne meupiya se helevek din te Eleteala, wey riyà te iney rin dema ne midtuganur kediey iring te tuney ad ne anak din. 14 Ibpesampey e rà nikiyu ki Asinkritu, ki Pligunti, ki Hirmis, ki Petrubas, ki Hirmas, wey ke langun pà ne mibperetiyaya riyà te kandan. 15 Idlakit e rà be nikiyu ki Pilulugu ki Julia, ki Nereo wey ke etevey rin, abpeg din ki Ulimpas wey ke langun ne menge ruma ran ne mibperetiyaya riyà te kandan.

16 Ne langun niyu ne pesegsehipeey kew su tuus te ruen kebpelimlimuey niyu. Langun ne menge mibperetiyaya kayi te ebelàbelà ne inged ne ebpenginginsà dan dut te langun ne sikiyu keniyan.

17 Ebuyuen ku ve keniyu, menge suled ku, te ingat kew rut te menge etew ne ebaal te kegkereeti rut te kegkeseveka niyu te kebperetiyaya, ne elihu kew kandan su sikandan ke puunan dut te kegkeliyaliya te sarig niyu su ebpekesurang dan dut te benar ne penurù ne ingkepenurù keniyu. 18 Su ke menge etew ne iring kayi ne kenà iyan dan edumaan si Hisu Kristu ke Kerenan tew, ugaid ne iyan den dà edumaan ne ke kiyug diyà te hinawa ran. Metau ran ne edlalag wey metau ran ne edlana dut te hinawa te menge etew su apey ran egkeekali ke menge etew ne kenà pà metau dut te benar ne penurù. 19 Nevantug en ke tudtul te kebperumaruma niyu rut te menge suhù te Eleteala, ne nehalew a nevenar ketà. Ugaid ne iyan ku rà egkiyuhan ne egkeumanan pà ke netuenan niyu te ed-ul-ulaan ne meupiya, ne kenà kew ebpekehuru te misan engkey ne ulaula ne meraat. 20 Ne ke Eleteala ne ebpuunan te kebmelintad te hinawa tew ne kenà dà meuhet ne edtekutaken din si Setanas ke datù te pekaid.

Iyan ku kiyug ne menu ma perem ke ibpekita rut te Kerenan tew ne si Hisu Kristu ke daat te nanam din keniyu.

21 Ini se ruma ku te ebpemenudtul te Meupiya ne Tudtul ne si Timoteo, ne ebpenginginsà keniyu wey en si Lucio, si Jason, wey si Susipatru ke menge ruma ku ne Hudiyanen. 22 Ne si Tiriku rema ke pinesurat ku kayi te surat ku ne ebpenginginsà dema keniyu su ruma tew rema sikandin te ebperetiyaya.

23 Si Gayu ne ebpenginginsà rema keniyu. Sikandin ke ebpeketuganur kediey su riyan a ed-ubpà te baley rin ne egkevurunan dut te ruma tew ne mibperetiyaya. Ne si Irastu ke edtuganur te kureta kayi te inged ini, wey ke suled tew te ebperetiyaya si Kuwartu ne ebpenginginsà rema keniyu. [ 24 Ne langun niyu riyà, ne iyan ku kiyug ne menu ma perem ke ibpekita rut te Kerenan tew ne si Hisu Kristu ke daat te nanam din keniyu. Ne egketuman ini.]

25 Edeyù kiyu te Eleteala! Su sikandin dà ke ebpekevehey te kebmetihel te kebperetiyaya niyu sabap dut te Meupiya ne Tudtul mekeatag ki Hisu Kristu ne impemenudtul ku wey sabap dut te benar ne ne in-eles te neuhet dà dengan ugaid ne impayag en guntaani. 26 Ne arà se benar ne impayag en guntaani te Eleteala keytew sabap dut te impesurat dut te menge etew ne ebpelembas te lalag din dengan. Ne guntaani ne insuhù en dut te Eleteala ne warà kemetayen din te ibpepenudtul ini kayi te langun ne menge etew kayi te ampew te dunya su apey langun ne ebpekeperetiyaya wey ebpekeperumaruma te menge suhù din.

27 Ne ke sebseveka rà ne Eleteala ne iyan dà netau te langun. Uya, edeyuen tew te ibpepevayà tew ki Hisu Kristu taman te taman.

Arà dà taman.