Tagnà Solat i Pablo diyà te Tege
Korinto
1
Seini se solat ko, si Pablo, doma ki Sostenes, sìyan kedowa tadon te pegpemenal. Lekat te ibeg te Timanem, tinawal a din amon inangen a sebad sogounun i Jesu Cristo. Seini se solat ko diyà te kedita niyo menge sakop te Timanem kidoen te Korinto. Egpenimanem kaw so migsebad se pedowan niyo diyà ki Jesu Cristo, aw tinawal kaw te Timanem amon inangen kaw din sakop din sipat kedita te doma otaw egpemenal te Pengolo tadon si Jesu Cristo, pengkey doton te menge doma ogpeanan, so sikandin se Pengolo dan heman. Ibeg ko, tebangan kaw te Amay tadon Timanem aw Pengolo tadon si Jesu Cristo. Ibeg ko heman, begayan kaw te Timanem te kelinaw te pedowan niyo.
Pegpesiontong i Pablo
Aw megtawal-tawal a diyà te Timanem, gayed a egpesiontong tepad kenyo, so ontò kaw din tinebangan pineokit ki Jesu Cristo. Lekat te pegsebad te pedowan niyo kandin lamig songkani, ontò medita se tabang din kenyo, aw yan netegahan niyo se kebenalan, aw biyasa kaw egtoladà kenyan. In-awop niyo diyà te pedowan se intoladà day tepad ki Cristo, aw yan wedad kolang diyà kenyo te kedita te kemolò te kebiyasa imbegay te Timanem diyà te otaw egpemenal, dalem te pegpeliman niyo te peglikò te Pengolo tadon si Jesu Cristo. Sikandin se megpekagsen te pegpemenal niyo amon wedad salà kitaen din diyà kenyo aw lomikò se Pengolo tadon si Jesu Cristo. Egkeseligan se Timanem aw tinawal kaw din amon megsebad se pedowan niyo diyà te Batà din si Jesu Cristo Pengolo tadon.
Pegpedindilay te menge otaw egpemenal
10 Menge kedowa ko te pegpemenal, seini se ipunù ko kenyo so insogò a te Pengolo tadon si Jesu Cristo. Pegsebad kaw den amon wedad megpedindilay kidoen kenyo. Pegsebad kaw te aneng-aneng aw pedowan. 11 Menge kedowa ko, yan se punù ko kenyo, so doen menge otaw i Klowi mig-indan kanak te egpedindilay kaw. 12 Ibeg ko ipekelabet kenyo. Doen ekon eg-ikagi te siak se egtekingan dan. Doen ekon heman menge doma eg-ikagi te si Apolos se egtekingan dan. Doen ekon doma egtaking ki Pedro, aw doen pa ekon eg-ikagi te si Cristo olò se egtekingan dan. 13 Aw mikagi kaw kenyan, iling te tinengà-tengà niyo si Cristo. Eked kepakay aw mikagi kaw te siak se egtekingan niyo, so kenà ko se inimetayan doton te kros amon megpelowà kenyo. Binonyagan kaw, meneng kenà te siak se pinemenalan niyo. 14 Binonyagan ko olò si Crispo aw si Gayo. Egpesiontong a den so wedad doma kenyo binonyagan ko, 15 amon wedad otaw mekeikagi te siak se egtekingan dan tandà te pegbonyag ko kandan. 16 (Nekeaneng-aneng a den te binonyagan ko heman si Estepanos aw pamilya din. Wedad den doma neeneng-enengan ko.) 17 Insogò a i Cristo kenà amon memonyag a, meneng insogò a din amon megtoladà a te Mèpiya Indan tepad kandin. Migtoladà a kenà pineokit te kebiyasa ko, so aw iling kenyan, kebelebagan se pegpemenal te kebenalan tepad te pegkematay i Cristo doton te kros.
Impekità i Cristo se kebiyasa te Timanem
18 Pengkey eg-aneng-aneng se otaw kenà egpemenal te wedad ontong te kebenalan ipegtoladà ko tepad te pegkematay i Cristo doton te kros, meneng sikitadon egpemenal se netaga-taga te egpelowà den se Timanem te otaw lekat te salà pineokit te pegkematay i Cristo. 19 So doen kagi te Timanem tapay insolat,
“Pegbàtan ko se kebiyasa te otaw eg-ikagi te biyasa dan, aw ipetaga-taga ko te wedad ontong te pig-ilingan te otaw doen dakel netegahan.”
20 Wedad den detengan te kebiyasa te otaw eg-ikagi te biyasa dan, aw otaw egtoladà te punù ingkeliwat i Moises, aw otaw teleglawong, so impetaga-taga den te Timanem te kolang pa se kebiyasa te otaw dini te keneyonan.
21 Wedad otaw metaga-taga te Timanem pineokit te kebiyasa dan. Meneng lekat te kebiyasa te Timanem, miglalang sikandin te ipelowà din se otaw memenal te kebenalan ipegtoladà kandan, pengkey doen otaw eg-aneng-aneng te wedad ontong kenyan. 22 Eked pemenal se menge Judiyo singed aw komità dan te kepelahan, aw ibeg te menge Griego, pemenalen dan olò se ontò medalem toladà. 23 Meneng se ipegtoladà day, yan se kebenalan tepad ki Cristo inlansang diyà te kros, pengkey egkebensi se menge Judiyo kenyan, aw eg-aneng-aneng se menge Griego te wedad ontong niyan. 24 Meneng se otaw tinawal te Timanem, pengkey Judiyo aw kenà Judiyo, yan se egpemenal ki Cristo migpekità kenitadon te tolos aw kebiyasa te Timanem. 25 Pengkey lindoan te otaw se kebiyasa te Timanem, meneng yan se ontò pa melangkaw diyà te kebiyasa te otaw. Pengkey mikagi dan te melomay se Timanem, meneng ontò pa sikandin magsen diyà te kagsen te otaw. 26 Menge kedowa ko te pegpemenal, eneng-enengi niyo tepad te pegpemallì te Timanem kenyo. Pilabok se otaw biyasa dini te keneyonan pinemallì din. Pilabok heman se otaw nedengeg pinemallì din, aw pilabok heman se otaw melangkaw. 27 Meneng pinemallì te Timanem se menge otaw wedad kebiyasa dini te keneyonan amon meyàyà se otaw eg-aneng-aneng te dakel se kebiyasa dan. Pinemallì din heman se menge otaw wedad dengeg amon meyàyà se otaw nedengeg. 28 Pinemallì din heman se menge otaw wedad kelangkaw aw eglindoan te doma aw wedad ontong, amon ipekità din te wedad ontong te aneng-aneng tadon doen ontong. 29 Yan se doun te wedad palos otaw mekebatog domuyun te kandin pegkeotawun diyà te Timanem. 30 Lekat te ibeg te Timanem, migsebad se pedowan niyo ki Cristo, aw impetaga-taga din se kebiyasa te Timanem diyà kenitadon. Yan netegahan tadon te in-aneng-aneng te Timanem te metòlid kidon, iling kidon te wedad salà aw eked kidon den pelumuni. 31 Yan mèpiya aw tomolò kidon te kagi te Timanem insolat,
“Eked kepakay aw domuyun se otaw te kandin pegkeotawun, meneng mèpiya aw iduyun din se Pengolo egpemegay te mèpiya.”