1 Na, aw doen menge sakop te Timanem doton kenyo egpedindilay, ibeg dan ekon osayan te otaw kenà sakop te Timanem. Meneng eked iyan kepakay. Mèpiya aw osayan dan te menge sakop te Timanem. 2 Iling te nelibelan niyo den te sikitadon egpemenal se megdoma ki Cristo meg-okom te kedita te otaw te keneyonan te modi aldaw. Aw okomen tadon kwani se kedita te otaw, mepakay kaw heman meg-osay te deitek egkeinang te doma sakop te Timanem songkani. 3 Netegahan niyo den besi te okomen tadon kwani se menge anghil. Yan se doun te mepakay kaw heman meg-osay tepad te keogpà niyo dini te keneyonan. 4 Meneng aw doen dindil doton kenyo, egpeibingay kaw ekon doton te otaw kenà egpemenal amon osayan kaw dan. 5 Keilangan meyàyà kaw kenyan, so iling te wedad den otaw doen inenengen doton kenyo meg-osay te menge otaw egpemenal. 6 Meneng pengkey egpemenal kaw, egpeibingay kaw ekon doton te howis, aw labi pa iyan medaet so otaw kenà egpemenal se eg-osay kenyo.

7 Kolang se eg-inangen niyo, so egpeibingay kaw doton te howis. Labi pa mèpiya aw kelibelan niyo se pegtindaet aw peglimbong kenyo. 8 Meneng sikiyo menge otaw egpemenal ki Cristo se egtindaet aw eglimbong te doma otaw, pengkey menge doma niyo egpemenal. 9-10 Nelibelan niyo besi te eked pekeakop diyà te peglowan te Timanem se otaw gayed eg-inang te medaet. Ontò niyo eneng-enengi se kebenalan seini. Eked pekeakop diyà te peglowan te Timanem se kedita te otaw eglayok te kenà kandan esawa, aw egsimba te kenà benal timanem, aw eglakad, aw bayot, aw egpenolis, aw otaw egpengewarta, aw eglasing, aw egbaet-baet, aw egpenakaw. 11 Doen otaw kidoen kenyo iling kenyan se eg-inangen dan kedengan, meneng songkani binonyagan kaw den, aw ininang kaw te Timanem otaw egpenimanem, aw eg-eneng-enengen te Timanem te metòlid kaw pineokit te ngadan te Pengolo tadon si Jesu Cristo, aw pineokit te Espiritu Santo.

12 Pengkey mepakay aw inangen ko se kedita te ibeg ko, meneng wedad ontong te kedita niyan. Pengkey mepakay aw inangen ko se kedita, meneng eked a keibeg aw meallang a te inang ko. 13 Eneng-enengi niyo ini. Benal se eg-ikegiyen te doen kànen amon isawol diyà te getek, aw doen heman getek amon solan te kànen. Meneng eked kepakay aw megkelagok kidon, so doen kwani aldaw pegbàtan te Timanem se getek aw kànen. Iling heman kenyan se lawa tadon. Ininang iyan te Timanem kenà amon meibeg kidon te kenà kenitadon esawa, meneng ininang kidon din amon tomolò kidon te ibeg te Pengolo tadon, aw netegahan te Pengolo tadon se keilangan te lawa tadon. 14 Entayen pa te Timanem se lawa tadon lekat te nematay pineokit te tolos din, onawa te peg-antay din te Pengolo tadon lekat te nematay.

15 Netegahan niyo den te iling te ogpo lawa i Cristo se lawa niyo. Yan aw migsebad kaw den ki Cristo, eked kepakay aw ipedoma niyo se lawa niyo diyà te lawa te kepoyun. Ontò iyan eked kepakay. 16 Netegahan niyo den heman, aw lomayok se otaw te kepoyun, yan meinang sebad se lawa dan, so doen kagi te Timanem tapay insolat,

18 Ikà niyo eg-inabut te kenà kenyo esawa. Se lawa, wedad labut te kedita te doma salà, meneng se otaw eglayok te kenà kandin esawa, mekesalà sikandin pineokit te lawa din. 19 Nelibelan niyo den besi ini. Se lawa niyo, yan se eg-ogpaan te Espiritu Santo imbegay te Timanem kenyo, aw kidoen lamig songkani. Yan se doun te kenà kenyo se lawa niyo, meneng Timanem se tig-apò kenyan, 20 so ontò meelagà se imbayad din kenyo. Yan keilangan mèpiya se inangen niyo amon iduyun se Timanem.