1 Mebangal se intoladà te Espiritu Santo te doen menge otaw somoway lekat te pegsalig dan ki Cristo aw agpet se temanan te keneyonan. Meneng tomolò dan te bosaw biyasa eg-akal, aw memenal dan te kebolalaw itoladà te bosaw. 2 Ikeliwat se itoladà dan te otaw egkebolalaw aw eg-akal. Eked dan ketaga-taga te eden se metòlid aw eden se medaet, so pegbàtan se aneng-aneng dan. 3 Megtoladà dan te eked kepakay aw mengognan se otaw. Megtoladà dan heman te doen kànen eked kepakay kànen. Meneng ininang te Timanem se kànen sìyan, aw penga te pegpesiontong tadon kandin, mepakay iyan kànen te kedita te otaw simalig diyà kandin aw netaga-taga den te kebenalan. 4 Mèpiya se kedita ininang te Timanem, aw yan eked kepakay aw mikagi kidon te medaet se kànen ininang din. Meneng keilangan kinewaen tadon iyan aw megpesiontong kidon diyà kandin tepad te kedita. 5 Netegahan tadon te mepakay se pegpengaen tadon te kedita tandà te inikagi te Timanem aw tandà te pegpesiontong tadon diyà kandin.

6 Aw megtoladà ka kenyan diyà te menge doma otaw egpemenal, mèpiya ka sineligan i Jesu Cristo, so egkagsen se pegsalig no kandin pineokit te peg-iling no te kebenalan pinemenalan no, aw pineokit te pegtaking no te kebenalan intoladà kamno. 7 Ikà egpenenalan te menge indan-indan eked keibegi te Timanem aw wedad ontong. Meneng keilangan megpekagsen ka tomolò te Timanem. 8 Aw megpekagsen kidon te lawa tadon, doen ontong tadon. Meneng labi pa mèpiya se ontong tadon aw megpekagsen kidon tomolò te Timanem, so pineokit kenyan, mèpiya se keogpà tadon dini songkani aw doton heman te langit te modi aldaw. 9 Keseligan se inikagi ko sìyan, aw keilangan ontò iyan pemenalen. 10 Yan se doun te egpekagsen kidon te eg-inangen tadon so egseligan tadon se Timanem wedad temanan din. Sikandin se megpelowà te kedita te otaw, aw labi din pa ipelowà se kedita tadon egpemenal ki Jesu Cristo.

11 Se insolat ko den kamno, yan se keilangan ipunù no aw itoladà no diyà te menge doma otaw. 12 Ikà egketalaw te pegtoladà no pengkey kaling ka pa otaw. Meneng keilangan meinang ka gegonan peg-ilingan te menge doma otaw egpemenal, pengkey eden se eg-ikegiyen no aw eg-inangen nikaw. Pekitai te dakel se pedowan no, aw melobos se pegsalig no te Timanem, aw wedad inang no medaet. 13 Dalem te eked a pa pekedoton kamno, pegbasa ka gayed te kagi te Timanem diyà te menge otaw kidoen, aw pegtoladà ka kandan, aw pegsoblod ka te menge kebenalan. 14 Ikà eglengà te peggamit no te kebiyasa nekinawà no kedengan pineokit te peg-ikagi te telekeliwat te kagi te Timanem tepad kamno aw pineokit te pegpemaed te menge egpengibing te simbahan diyà te olo nikaw. 15 Pegpekagsen ka peg-inang te kedita niyan. Toman ka kenyan, amon metaga-taga se kedita te otaw te ontò ka mig-iling. 16 Peg-ahà ka tepad te eg-inangen no aw ipegtoladà nikaw. Aw yan se inangen nikaw, kenà olò sikona se mekelowà lekat te pelumun, meneng mekelowà heman se menge otaw toledaan nikaw.