5
Meketayod a pa te kelimahan, so netegahan ko aw matay se lawa ko dini te keneyonan, doen pa kaling lawa eked palos kematay ibegay te Timanem kanak doton te langit. Dalem te wedà a pa kematay, ontò melima se keogpà ko. Ontò ko ibeg begayan a te Timanem te kaling lawa doton te langit. Pineokit te pegpemegay din kanak te kaling lawa, gayed doen ogpaan te pedowan ko. Dalem te peg-ogpà ko dini te keneyonan, doen pa kelimahan ko, meneng kenà ibeg ko ayas a matay, meneng ibeg ko begayan a te kaling lawa doton te langit, amon keselilinan se lawa ko seini egkeledak te lawa eked palos kematay. Se Timanem, yan se migpetagad den kenitadon amon mekekinawà kidon te kaling lawa, aw sikandin se simogò te Espiritu Santo meg-ogpà dini kenitadon, amon ketegahan tadon te metoman pa se impakang din.
Yan se doun te gayed egkeantag se pedowan ko. Netegahan ko te dalem ko pa te mig-ogpà a dini te keneyonan, eked a pa pegdoma te Pengolo, meneng songkani kenà ko egkitaen se egtekingan ko, meneng egtekingan ko se pinemenalan ko. Gayed egkeantag se pedowan ko. Mèpiya kanak aw matay a amon megdoma a te Pengolo. Pengkey matay a, aw pengkey wedà a pa kematay dalem te wedà pa likò se Pengolo, ontò ko ibeg meluba sikandin kanak. 10 Sominalo kwani se kedita tadon ki Cristo amon okomen kidon din, aw amon meabat te teg sebad-sebad kenitadon egpemenal se kandin ontong tepad te ininang din dini te keneyonan. Se otaw mig-inang te mèpiya, yan se doen ontong. Se otaw egpemenal eg-inang te medaet, yan se wedad ontong.
Migsebad kidon te Timanem pineokit ki Cristo
11 Nayan, so netegahan ko den te ontò melangkaw se Pengolo egsinelowen ko, yan se doun te gayed a egtoladà te menge otaw amon memenal dan. Netegahan den te Timanem te nelobos se pedowan ko kandin, aw ibeg ko metaga-taga kaw heman te doen kelobos te pedowan ko diyà te Timanem. 12 Insolat ko iyan kenà amon iduyun ko se kanak pegkeotawun, meneng amon wedad ikeyàyà niyo kanak, aw amon doen itaba niyo diyà te menge doma otaw egduyun te kandan pegkeotawun kenà tepad te kelobos te pedowan, meneng tepad olò te ketanem dan. 13 Simpana aneng-aneng niyo migkebook a den tandà te keaseb te pegtaking ko te Timanem, aw den iyan, so ibeg ko iduyun se Timanem. Pengkey aneng-aneng niyo doen inenengen ko, meneng ibeg ko pa megtabang kenyo. 14-15 Tandà te kedakel te pedowan i Cristo kanak, neantag heman se pedowan ko. Netegahan ko den ini, te pegkematay i Cristo, iling te nematay se kedita te otaw, so nematay sikandin inselilin te kedita te otaw, amon eked kidon taking te kenitadon ibeg. Nematay amon tekingan tadon se kandin ibeg, so nematay aw neantay heman sikandin amon megtabang kenitadon.
16 Kedengan, iling te aneng-aneng te menge doma otaw se aneng-aneng ko, so medita se otaw nebensihan ko, aw yan se doun te nebensihan ko si Cristo. Meneng songkani netodà den se aneng-aneng ko tepad kandin aw tepad te kedita te otaw. 17 Se otaw simalig ki Cristo, ontò den netodà se pedowan dan. Taman den niyan se pegkeallang dan diyà te medaet, so doen den kaling pedowan dan. 18-19 Lekat te ibeg te Timanem, ininang din se dalan pesalo doton kandin amon megsebad se pedowan tadon te Timanem pineokit ki Cristo. Insogò a din den megtoladà diyà te kedita te otaw te doen den dalan ininang te Timanem pesalo doton kandin, amon megsebad se pedowan tadon diyà kandin pineokit ki Cristo, aw amon pegwedaden din heman se salà tadon. Insalig din kanak se mèpiya indan sìyan amon itoladà ko diyà te menge doma otaw.
20 Siak heman se sebad sogounun i Cristo egpengibing te kagi din, so pineokit kanak, ipetaga-taga te Timanem se punù din. So insogò a i Cristo, yan mikagi a diyà kenyo, pegsebadi niyo se pedowan niyo diyà te Timanem. 21 Pengkey wedad salà i Cristo, meneng impelumun sikandin te Timanem tandà te salà tadon, amon eneng-enengen te Timanem te metòlid kidon pineokit te pegpesakop tadon diyà ki Cristo.