5
Si Ananias aw si Sapira
Doen sebad meama si Ananias aw esawa din si Sapira. Imbeligyà dan se tanà dan. Meneng migsebad se pedowan dan migtameng te ketengà te kwarta. Inibing i Ananias se samà diyà te menge sogounun i Cristo aw migpelingo-lingo te tinigkan din imbegay se kwarta. Nayan, minikagi si Pedro, “Pigbayà-bayà ka i Satanas. Ibeg no peden megkebolalaw ka diyà te Espiritu Santo. Kenà nini se kedakel te keelagà te tanà imbeligyà nikaw. Te wedà no pa pemeligyai se tanà, kamno pa iyan. Penga te pegpemeligyà no kenyan, kamno pa heman se kwarta. Wedad migleges kamno te pegpemegay no te kwarta. Meneng medaet den se aneng-aneng nikaw. Eden no aw olò otaw se pigkebolelawan nikaw, meneng Timanem se pigkebolelawan nikaw.”
5-6 Pegdineg i Ananias te kagi i Pedro, netongan sikandin aw nematay. Penga niyan, ginakes te menge telaki se lawa din, aw kinelalang dan iyan doton te lowà, aw inlebeng dan. Ontò nelemitan se kedita te otaw kimità kenyan.
Pegkepenga te menge telo oras, dimateng si Sapira, meneng wedà pa ketaga-taga te pegkematay te esawa din. Minikagi si Pedro, “Tebahi a. Seini lay se kedakel te kwarta imbayad te tanà imbeligyà niyo?”
Timaba si Sapira, “Ee. Taman iyan.”
Minikagi si Pedro, “Medaet se pegsebad te pedowan niyo amon megtandà kaw te Espiritu Santo. Kidoen den te lowà se menge otaw miglebeng gina te esawa nikaw. Kelelangen ka dan heman amon ilebeng.”
10 Pegketà nematay heman sikandin. Pegdateng te menge telaki doton, nematay den si Sapira. Yan kinelalang dan heman se lawa din doton te lowà, aw inlebeng dan diyà te tangkil te lebeng te esawa din. 11 Ontò nelemitan se kedita te otaw egpemenal aw kedita heman te doma otaw netaga-taga kenyan.
Kepelahan ininang te menge sogounun i Cristo
12 Medita se kepelahan ininang te menge sogounun i Cristo kinità te doma otaw. Gayed egketipon se otaw egpemenal doton te balkon te simbahan iningedanan Balkon i Solomon. 13 Doen menge doma otaw wedà akop diyà te otaw egpemenal tandà te ketalaw dan, meneng dimuyun dan te menge otaw egpemenal. 14 Migkedita se otaw nemenal diyà te Pengolo. Doen meama aw bayi heman nekeakop diyà te otaw egpemenal ki Jesus.
15 So doen kepelahan ininang te menge sogounun i Cristo, inibing te doma se otaw doen mesakit doton te lowà te menge balay. Insawol dan se kama aw ikam te otaw doen mesakit doton dapag te dalan amon keelongan dan i Pedro so ibeg dan kegolian. 16 Dimoton te Jerusalem se medita otaw tikedo te menge doma lonsod medapag kidoen. Nengibing dan te menge otaw doen mesakit aw doma otaw pigdetengan te bosaw. Negolian se kedita te otaw nesekitan, aw impelowà se bosaw lekat te doma.
Pinemilang se menge sogounun i Cristo
17 Nayan, ontò neopal se ontò pengolo te simbahan aw menge otaw ketondog kandin, yan se menge Sadusiyo. Miningà dan te menge sogounun i Cristo aw 18 impedakep dan. Penga niyan, kineleboso dan. 19 Meneng pegkedelem niyan, inowang te anghil te Timanem se tetakep te keleboso aw impelowà din dan. Doen impunù din kandan, kagi din, 20 “Doton kaw te dakel simbahan. Peg-indan kaw te menge otaw tepad te kaling pedowan ibegay te Timanem kandan.”
21 Peglibtak te aldaw, minawop se menge sogounun i Cristo doton te dakel simbahan aw todà dan migtoladà. Dalem niyan, migtipon se ontò pengolo te simbahan, aw menge otaw neketetondog kandin, aw kedita te doma obanen te simbahan. Impeangay dan se sogounun i Cristo lekat te keleboso. 22 Meneng pegdateng te otaw insogò doton te keleboso, wedad den dan kidoen. Penga niyan, limikò dan doton te menge obanen netipon aw minikagi dan, 23 “Pegdateng day doton, netakep pa se keleboso, aw egtonggò pa se sondalo. Meneng peg-owang day te tetakep, wedad den dan kidoen.”
24 Mondà netaga-taga se menge pengolo te simbahan aw kapitan te polis egtonggò te dakel simbahan, ontò migkebulung se aneng-aneng dan aw kenan den se menge sogounun i Cristo. 25 Penga niyan, dimateng se sebad otaw kidoen kandan. Minikagi sikandin, “Se menge otaw kineleboso niyo gebenini, kidoen den dan te dakel simbahan aw migtoladà dan.”
26 Penga niyan, dimoton se polis aw kapitan dan amon mangay dan te sogounun i Cristo. Wedà pegleges se polis kandan so nelemitan dan aw bontogan dan te menge otaw te bato. 27 Peg-ibing dan kandan doton te menge obanen netipon, minikagi se ontò pengolo te simbahan, 28 “Kedengan, migpunù kay kenyo te eked kaw palos pegtoladà tepad te otaw egtekingan niyo. Meneng wedà kaw tolò, so songkani, netaga-taga se kedita te otaw dini te Jerusalem te intoladà niyo. Eg-ikagi kaw heman te sikami se otaw migpeimatay te egtekingan niyo.”
29 Nayan, timaba si Pedro aw menge doma sogounun i Cristo, “Pengkey megsagda kaw kenami, meneng eked kay lengà, so Timanem se toloen day. 30 Se Timanem sineligan te kemonaan tadon, yan se simogò ki Jesus dini te tanà. Meneng impeimatay niyo sikandin inlansang diyà te kros. 31 Penga niyan, inantay sikandin te Timanem metolos aw ininang din melangkaw doton te langit, so sikandin se lomowan kenitadon aw megpelowà kenitadon lekat te salà. Ibeg din megselsel kaw te salà amon pegwedaden din se salà niyo. 32 Mig-indan kay te benal iyan neinang so impeikagi kay te Espiritu Santo, sìyan ibegay te Timanem diyà te kedita te otaw tomolò kandin.”
33 Pegdineg dan kenyan, ontò den neopal se pedowan dan, aw ibeg dan imetayan se menge sogounun i Cristo. 34 Meneng doen sebad Parisiyo egtoladà te punù ingkeliwat i Moises si Gamaliel. Egsegmanen sikandin te menge doma otaw. Timindeg sikandin amon mikagi, meneng onà din impelowà se menge sogounun i Cristo dalem te peg-ikagi din. 35 Penga niyan, minikagi si Gamaliel diyà te menge doma din netipon, “Menge kedomaan ko bowad-bowad i Israel, peg-imanday kaw aw eden se inangen niyo diyà te menge otaw sìyan. 36 Kedengan, doen sebad otaw iningedanan ki Teudas meibeg megkedakel otaw, aw menge epat gatos se otaw timaking kandin. Meneng inimetayan sikandin, aw penga niyan nebilit se otaw timaking kandin, so wedad den mengibing kandan. 37 Pegbilang te gobirno te kedita te otaw, doen heman tege Galiliya si Judas. Pengkey medita heman se otaw timaking kandin, meneng inimetayan sikandin, aw yan nebilit se otaw timaking kandin. 38 Nayan, ikegiyen ko kenyo te mèpiya aw pebeyaan tadon se menge otaw seini, aw ipekesayo tadon dan olò. Pebeyai niyo sikandan, so aw kenà Timanem se simogò kandan, yan wedad detengan te eg-inangen dan. 39 Meneng aw Timanem se simogò kandan, eked kidon pekedaeg kandan. Meg-ahà kidon amon eked kidon keinang poon te Timanem.”
40 Penga niyan, aneng-aneng dan, mèpiya se inikagi i Gamaliel. Peg-angay dan te menge sogounun i Cristo, impebadas dan pa. Migpunù dan kandan te eked dan palos peg-indan tepad ki Jesus. Penga niyan, impelowà dan.
41 Pegkesayo te sogounun i Cristo, ontò neluba se pedowan dan, so aneng-aneng dan, pinemallì dan te Timanem amon pemilangen dan tandà te pegpemenal dan ki Jesus. 42 Migtoladà dan pa aw migkeliwat te kagi te Timanem, pengkey doton te dakel simbahan, aw doton te menge balay. Kelikit te aldaw, migtoladà dan te si Jesus se Misiyas insogò te Timanem.