1 Dimoton si Pablo aw si Silas te Derbe aw Listra. Doen sebad otaw mig-ogpà kidoen ngadan din si Timoteo. Egpemenal sikandin te Timanem sipat inay din. Judiyo se inay din, meneng kenà Judiyo se amay din. 2 Mèpiya otaw si Timoteo. Induyun sikandin te kedita te otaw egpemenal doton te Listra aw Ikonyo. 3 Ibeg i Pablo ipetaking din si Timoteo. Yan impetolì din sikandin amon eked kebensihi te menge Judiyo doton te menge lonsod peselowan dan, so netegahan dan te wedà pa ketolì so kenà Judiyo se amay din.

4 Peg-okit dan te menge lonsod, migtoladà dan te impunù te menge sogounun i Cristo aw egpengibing te simbahan doton te Jerusalem amon tomolò dan kenyan. 5 Yan nelobos se pegsalig te menge otaw egpemenal te Timanem, aw doen heman menge doma otaw nemenal te Timanem te kelikit te aldaw.

6 Migtoladà dan te kagi te Timanem doton te menge lonsod kidoen te Frigya aw Galasya, so sinagda dan te Espiritu Santo te eked dan pegtoladà doton te Asya. 7 Pegkedapag dan doton te Misya, ibeg dan domoton te Bitinya, meneng todà dan sinagda te Espiritu Santo. 8 Penga niyan, lineklakan dan se Misya aw dimeleg dan doton te Troas. 9 Pegdateng dan doton, doen impekità te Timanem diyà ki Pablo te delem. Kinità din iling te bawa te otaw tege Masidonya nemoyò, kagi din, “Ayas ka diyà te Masidonya aw tebangi kay.”

10 Penga niyan, nengemahà kay te sekayan day pesalo doton te Masidonya, so netegahan day te insogò kay te Timanem doton kandan amon megtoladà kay kandan te Mèpiya Indan tepad ki Jesus.

11 Simakay kay te dakel belangay lekat te Troas, aw minatas kay doton te polò iningedanan Samotrasya. Keeldawan niyan, simakay kay heman doton te Niyapolis. 12 Lekat kidoen, minipanaw kay doton te Filipos. Yan se ontò dakel lonsod doton te Masidonya, aw sakop te Roma se menge otaw eg-ogpà kidoen. Nenamay-namay kay mig-ogpà kidoen. 13 Pegkesebado, dimoton kay te wayeg lowà te Filipos, so doen ekon kidoen tiponanan te menge otaw megtawal-tawal. Nenenoo kay kidoen te kilid te wayeg, aw migpebelaw-belaway kay te menge bayi netipon kidoen. 14 Doen sebad bayi si Lydia nenenalan kenami. Tiyatira se tinebolan din. Egpemeligyà sikandin te penenaktun melalag kidoen te Filipos. Gayed sikandin egtolò te ibeg te Timanem. Pegpenenalan i Lydia te intoladà day, migtabang se Pengolo kandin amon memenal ki Jesus. 15 Binonyagan sikandin sipat kedita te otaw mig-ogpà diyà kandin. Penga niyan, minikagi sikandin, “Aw nemenal kaw te nelobos se pedowan ko diyà te Pengolo, peg-ogpà kaw den doton te balay ko.”

Ontò migpeido-ido si Lydia aw yan timandù kay.

16 Nayan, doen sebad aldaw migpesalo kay doton te wayeg amon megtawal-tawal. Kinità day se sebad allang bayi enitowan. Sikandin se teleetok aw eden se domateng diyà te otaw. Yan dakel se ontong te menge tig-apò din pineokit te peg-etok din. 17 Timelokon se bayi kenami aw timawal, kagi din, “Sikandan se sogounun te Timanem Melangkaw. Dimini dan amon megtoladà dan kenyo te doen kelowaan lekat te salà.”

18 Yan se eg-inangen din te kelikit te aldaw. Sagwa wedà peketayod si Pablo, yan siminalo kandin aw minikagi diyà te bosaw, “Insogò a i Jesu Cristo, aw yan mikagi a kamno, lowà ka diyà kandin.”

Pegketà limowà se bosaw diyà kandin. 19 Pegketaga-taga te menge tig-apò te pigbàtan den se ebetanan dan te kwarta, inewidan dan si Pablo aw si Silas. Inibing dan doton te oseyanan kidoen te poblasyon. 20 Inibing dan doton te dowa howis aw minikagi dan, “Migsamok dan dini kenitadon. Sikandan se Judiyo, 21 aw doen intoladà dan eked tadon kepakay toloen, so sakop te Roma se kedita tadon eg-ogpà dini.”

22 Yan ontò neopal se kedita dan ki Pablo aw si Silas. Linisì te howis se saol i Pablo aw si Silas amon bedasen dan. 23 Penga dan binadas, kineleboso dan. Migpunù se howis diyà te otaw egtonggò te ontò din imendayan amon eked dan pekelowà. 24 Timolò sikandin aw insawol din dan doton te tambì didalem te keleboso. Impeawop se benis dan diyà te awang te kayo amon eked dan pekekadas.

25 Tengà te delem, migtawal-tawal si Pablo aw si Silas diyà te Timanem. Migdelangan dan heman se dimuyun te Timanem. Nenenalan kandan se menge doma otaw kineleboso. 26 Pegketà miglinog ontò magsen, aw ontò nekayong se keleboso. Neowang se kedita te tetakep niyan, aw nelebad se sengkalì in-iket te menge otaw kineleboso. 27 Pegkeloka te otaw egtonggò, kinità din se tetakep neowang, aw tinagnos din se kempilan amon megpeumul-umul, so eden din aw nekelowà den se menge otaw kineleboso. 28 Meneng timawal si Pablo te dakel se kagi din, “Ikà egpeumul-umul, so seini pa se kedita day.”

29 Penga niyan, impeangay te otaw egtonggò se solò, aw ayas minawop. Limongken sikandin diyà ki Pablo aw si Silas, aw tinegangtang tandà te lamit din. 30 Inibing din dan doton te lowà aw mig-insà, kagi din, “Eden lay se inangen ko amon mekelowà a lekat te salà ko?”

31 Timaba dan, “Pemenal ka te Pengolo si Jesus amon mekelowà ka lekat te salà, sikona aw menge doma otaw eg-ogpà diyà te balay nikaw.”

32 Penga niyan, migtoladà si Pablo te kagi te Pengolo diyà kandan aw kedita te otaw eg-ogpà diyà te balay din. 33 Tengà pa te delem, inonawan din se palì dan. Binonyagan dan sikandin aw kedita te otaw mig-ogpà diyà kandin. 34 Inibing din dan doton te balay din, aw pinekaen din dan. Neluba se kedita dan, so nemenal den dan te Timanem.

35 Pegkealdaw, insogò te howis se menge sondalo doton te otaw egtonggò aw minikagi dan, “Pelowai dan.”

36 Penga niyan, minikagi se otaw egtonggò ki Pablo, “Doen insogò te howis amon ipelowà kaw. Mepakay kaw den lomowà. Ibeg ko doen kelinaw te pedowan niyo.”

37 Meneng wedà tandù si Pablo. Minikagi sikandin diyà te sondalo, “Pengkey sakop kay te Roma, meneng binadas kay dan diyà te keditaan te otaw. Penga niyan, kineleboso kay, pengkey wedad salà day. Aw ibeg dan pa, ieles se pegpekesayo kenami. Meneng eked kay kesayo singed aw sikandan se domini amon megpelowà kenami.”

38 Penga niyan, kineliwat te sondalo se inikagi dan doton te dowa howis. Pegketaga-taga te howis te sakop dan te Roma, ontò dan nelemitan. 39 Yan dimoton dan te keleboso amon ipelowà dan. Migpeido-ido dan ki Pablo aw si Silas, aw pigbalaw-balaw dan te mesayo dan lekat te Filipos. 40 Pegkelowà dan, dimoton dan te balay i Lydia. Yan migkità dan te menge otaw egpemenal, aw inantag dan se pedowan dan amon melobos se pedowan dan diyà te Timanem. Penga niyan, nesayo dan lekat te Filipos.