40
Tegeinep te menge otaw kineleboso
Nayan, doen sineligan te selotan te Ehipto egpengibing te bino diyà kandin, aw doen heman sineligan te selotan eg-inang te pan kandin. Pegkenamay-namay, nekesalà dan diyà te amo dan, sìyan selotan te Ehipto. Neopal se selotan kandan, aw impekeleboso din dan doton te kinelebosowan ki Jose. Yan se keleboso egbentayan i Potifar, kapitan te menge sondalo te selotan. Ininang te kapitan si Jose sineligan te didowa otaw sìyan, aw nenamay dan kineleboso.
Doen sebad delem migtegeinep dan, sìyan egpengibing te bino aw eg-inang te pan te selotan. Kenà onawa se tegeinep dan, aw kenà heman onawa se kedegdagan niyan. Pegkeiselem niyan te pegdoton i Jose kandan, kinità din te netetana se pedowan dan. Yan mig-insà sikandin, “Nengà lay netetana se pedowan niyo?”
Timaba dan, “Migtegeinep kay, aw wedad otaw mekeindan kenami aw eden se kedegdagan niyan.”
Minikagi si Jose, “Timanem se egpemegay te kebiyasa diyà te otaw amon mekeindan te kedegdagan te tegeinep. Indani a tepad te tegeinep niyo.”
Yan mig-indan se otaw egpengibing te bino tepad te tegeinep din, kagi din, “Pegtegeinep ko, kinità ko se pinonoan te paras 10 doen telo belagen. Dimawen iyan, aw nemokad, aw nemongo, aw neinog se paras. 11 Minawid a te tabò te selotan, aw yan nengipò a te paras aw nengemeg a kenyan. Dimelog se temek niyan diyà te tabò, aw yan se inibing ko doton te selotan.”
12 Minikagi si Jose, “Seini se kedegdagan niyan. Se telo belagen sìyan, yan se telo se aldaw. 13 Telo seini, ipelowà ka te selotan lekat te keleboso, aw todà ka din ipelikò doton te tapay terbaho nikaw. Todà ka mengibing te bino kandin, iling te tapay nikaw ininang. 14 Aw todà megkèpiya se peg-ogpà nikaw, eneng-enengi a bag. Indani bag se selotan tepad kanak amon mekelowà a lekat te keleboso. 15 Tinakaw a lekat te mediyò ogpeanan day menge Hebreo, aw pengkey wedad palos medaet ininang ko, meneng impekeleboso a pa dini te Ehipto.”
16 Nayan, pegketaga-taga te otaw eg-inang te pan te selotan te mèpiya se kedegdagan te tegeinep te egpengibing te bino, minikagi heman sikandin diyà ki Jose, “Doen heman tegeinep ko. Doen telo bigo nepenò te pan insodò ko. 17 Se bigo diyà te lanto, yan se doen medita kemolò te pan ibingen ko doton te selotan, meneng kinaen iyan te menge manok te kebenesan.”
18 Minikagi si Jose, “Seini se kedegdagan niyan. Se telo bigo sìyan, yan se telo se aldaw. 19 Telo seini, ipelowà ka te selotan lekat te keleboso, aw ipesipal din se lieg nikaw. Ipebitin se lawa no doton te tollok aw kànen te menge manok te kebenesan se onod nikaw.”
20 Netoman iyan, so pegkepenga te telo se aldaw, mig-inang se selotan te dakel kànen so yan se aldaw te pegtebaw din, aw impetanod din se kedita te menge opisyal. Impelowà din lekat te keleboso se otaw egpengibing te bino aw otaw eg-inang te pan, aw impeibing din dan doton te menge opisyal netipon. 21 Sìyan otaw egpengibing te bino, yan se impelikò te selotan doton te tapay terbaho din, aw sikandin se todà nengibing te bino kandin. 22 Meneng sìyan otaw eg-inang te pan, yan se impeimatay te selotan. Netoman se kedita te inikagi i Jose diyà kandan. 23 Meneng wedà palos peg-aneng-aneng se egpengibing te bino tepad ki Jose. Nelibelan din sikandin.