12
Egtoledaan te Timanem se kedita te batà din
1 Nayan, ontò medita se otaw simalig diyà te Timanem gebii, aw yan impetaga-taga dan diyà kenitadon te ontò egkeseligan se Timanem. Iling te pegkoyà se pegtaking tadon te Timanem dini lanto te tanà, aw yan keilangan tomanan kidon heman te kedita mekeanggà kenitadon iling te inangen te otaw megkekoyà. Keilangan lomengà kidon heman te peg-inang tadon te salà gayed egpekeiket kenitadon. Keilangan megpekagsen kidon komagnan lamig domateng kidon doton te temanan. 2 Keilangan tomaking kidon ki Jesus, so sikandin se ontò tadon peg-ilingan te pegsalig tadon diyà te Timanem, aw meinang heman melobos se pegsalig tadon diyà te Timanem pineokit te tabang i Jesus. Timayod sikandin te kelimahan te peglansang kandin doton te kros. Wedà sikandin keyàyà te neinang diyà kandin, meneng timayod sikandin te peg-imatay kandin, so netegahan din te meluba sikandin aw mepenga se kedita niyan. Egpenenoo den sikandin kidoen te tangkil te Timanem Amay din aw eglowan doma din.
3 Ontò medaet se kelimahan tineyodan i Jesus, so pigtindaet te menge otaw nelegeb te salà. Yan peg-aneng-aneng kaw tepad kandin amon eked kaw lengà te pegtaking niyo kandin. 4 Pengkey mig-eked kaw meg-inang te salà, meneng wedad pa otaw inimetayan doton kenyo tandà te pegtaking niyo ki Jesus. 5 Iling te nelibelan niyo den se impunù te Timanem diyà te kedita niyo menge batà din, so doen kagi din insolat,
“Batà ko, aw toledaan ka te Pengolo, keilangan megpesiontong ka diyà kandin. Aw ipelumun ka din, ikà egkepuluk, 6 so egtoledaan te Pengolo se kedita te otaw nedekelan din te pedowan, aw ipegpelumun din se kedita te otaw ininang din batà din aw meg-inang dan te medaet.”
7 Yan aw detengan kaw te kelimahan, keilangan tomayod kaw kenyan, so toledaan kaw te Timanem pineokit kenyan. Aw toledaan kaw din, yan se pengilala te batà kaw din, so wedad palos besi batà eked toledai te amay din. 8 Egtoledaan te Timanem se kedita niyo migpesakop diyà kandin. Simpana eked kaw din toledai, kenà kaw menge batà din aw kenà sikandin Amay niyo. 9 Egsagman kidon te menge amay tadon dini lanto te tanà pengkey migpelumun dan kenitadon. Yan keilangan labi kidon pa tomolò te Amay tadon doton diatas te langit, so aw tomolò kidon kandin, begayan kidon din te kaling pedowan wedad temanan. 10 Se menge amay tadon dini lanto te tanà, yan se migtoladà kenitadon te wedà kenamay tepad te eneng-enengen dan aw eden se mèpiya. Meneng se Amay tadon doton diatas te langit, yan se egtoladà kenitadon amon tebangan kidon din, aw amon meinang kidon egpenimanem. 11 Aw toledaan kidon te Timanem, mepuluk se pedowan tadon so melima se keokitan tadon. Meneng penga te pegtoladà din kenitadon, aw meleseb se peg-iling tadon, yan doen ontong tadon, so megkelinaw se pedowan tadon, aw megkebiyasa kidon meg-inang te metòlid.
Ipelumun se otaw eked penenalan te kagi te Timanem
12 Nayan, ikà niyo egkelomay te pegtaking niyo te Timanem. Pengkey nelimahan kaw, ikà niyo eglengà. Meneng keilangan megpekagsen kaw, aw keilangan lobosen niyo se pegsalig niyo diyà te Timanem. 13 Ikà niyo egsoway lekat te metòlid dalan amon eked soway se menge doma niyo wedà kelobos se pegsalig dan diyà te Timanem, meneng megkagsen dan.
14 Pegpekeaseb kaw te pegsebad te pedowan niyo diyà te kedita te doma otaw. Pegpekeaseb kaw heman meg-inang te metòlid, so wedad palos otaw meg-ogpà doma te Pengolo tadon singed aw metòlid dan. 15 Peg-ahà kaw amon wedad otaw doton kenyo komulu te tabang te Timanem. Aw komulu se otaw te tabang te Timanem, iling sikandin te sagbet mekeilo, so mekesamok sikandin te doma otaw egpemenal, aw meboyo dan meg-inang heman te salà. 16 Peg-ahà kaw amon wedad otaw doton kenyo meg-inabut te kenà kandin esawa, aw tominggetan heman sikandin te Timanem. Iling kenyan si Esau gebii, so pengkey sikandin se keliwatan peden te pakang te Timanem diyà te kemonaan din so sikandin se penganay batà te amay din, meneng inliwan din se pegkepenganay din diyà te kànen neamin te sebad olò pegpengaen. 17 Netegahan niyo besi heman te penga niyan, ibeg din megtawal-tawal se amay din diyà te Timanem amon begayan sikandin te mèpiya. Meneng wedà din iyan kebatog, so eked ketodà se ininang din pengkey ontò sikandin migkelag se migpeido-ido.
18 Aw megpedapag kidon diyà te Timanem, eked kidon den kelemitan iling te menge kemonaan tadon Judiyo gebii. Pegdoton dan te bontod iningedanan Sinay, kinità dan se apoy, aw kengitngit, aw labon, aw kelamag. 19 Dinineg dan se peg-edop te bodyong aw peg-ikagi te Timanem. Pegdineg dan te kagi din, ontò dan nelemitan aw nemoyò dan te eked sikandin ikagi diyà kandan. 20 Ontò dan migpeso tandà te punù din kandan, “Pengkey otaw, pengkey ayam-ayam, aw doen gomiet olò diyà te bontod sìyan, keilangan imetayan dan bontogan te bato.” 21 Ontò dan nelemitan tandà te kinità dan igsà minikagi si Moises te tinegangtang sikandin aw migpeso.
22 Meneng kenà iling kenyan se pegpedapag tadon diyà te Timanem, so iling te migpedapag kidon den doton te bontod iningedanan Sion, se lonsod eg-ogpaan te Timanem wedad temanan. Yan se lonsod doton te langit iningedanan Kaling Jerusalem pigtiponan te ontò medita anghil eked kebilang gayed egduyun kandin. 23 Nekeakop kidon den doma te menge batà te Timanem insolat se ngadan dan doton te langit. Wedad den kelemitanan tadon diyà te Timanem meg-osay te kedita, so impeakop kidon din diyà te kedita te menge doma sakop din nematay den aw ininang din den ontò metòlid doton te langit. 24 Migpedapag kidon den diyà ki Jesus mig-inang te kaling peokit amon mekepedapag kidon diyà te Timanem. Lininisan kidon te dipanog din lekat te salà, aw yan se pengilala te doen keido te Timanem kenitadon. Labi pa iyan mèpiya diyà te dipanog i Abel, so yan se pengilala te keilangan ipelumun se kedowa din nengimatay kandin.
25 Nayan, penenalan kaw te kagi te Timanem. Gebii wedà penenalan se menge kemonaan tadon te kagi te Timanem ingkeliwat i Moises dini lanto te tanà, aw yan impelumun dan te Timanem. Labi kidon pa ipelumun te Timanem aw eked kidon penenalan te inikagi din lekat te langit. 26 Gebii te peg-ikagi te Timanem doton te bontod te Sinay, nekayong se tanà tandà te kedakel te kagi din. Meneng doen pa pakang din, “Sebad mendad se pegkayong ko, meneng kenà olò tanà se keyongen ko, so keyongen ko heman se langit.” 27 Pineokit te inikagi te Timanem sìyan, netegahan tadon te pegbàtan din se kedakel te ininang din aw pegwedaden din iyan amon mesamà olò se eked palos kebàti.
28 Yan keilangan megpesiontong kidon diyà te Timanem so sinakop kidon din diyà te peglowan din eked palos kebàti. Keilangan megsimba kidon heman kandin onawa te ibeg din inangen tadon, aw megsagman kidon heman kandin, 29 so se Timanem egsimbahen tadon, iling te apoy egpelumun.