1 Meneng dimoton si Jesus te bontod iningedanan Olibo. 2 Keeldawan niyan te peglibtak te aldaw, limikò si Jesus doton te dakel simbahan. Pegketipon te kedita te otaw, nenenoo sikandin aw migtoladà kandan.

3 Dalem te pegtoladà din, dimateng se menge menenoladà te punù ingkeliwat i Moises aw menge Parisiyo. Inibing dan se sebad bayi kinità dan limakad. Inibing dan sikandin doton te monà i Jesus 4 aw minikagi dan, “Sir, kinità day gina se bayi seini limakad. 5 Doen punù ingkeliwat i Moises te keilangan bontogan te bato se otaw limakad amon matay. Na, menonen lay sikandin. Eden lay se aneng-aneng nikaw?”

6 Yan se ininsà dan amon tendaen dan si Jesus, so ibeg dan idimanda dan sikandin diyà te howis. Meneng timibakang sikandin aw simolat te intetodò din diyà te tanà. 7 Sagwa wedà dan lengà te peg-insà dan kandin, timindeg si Jesus aw minikagi, “Se otaw diyà kenyo wedad palos salà ininang din, yan se mekeonà memontog kandin te bato.”

8 Penga niyan, todà timibakang si Jesus, aw simolat te intetodò din kidoen te tanà. 9 Pegdineg te menge Parisiyo te inikagi din, neyàyà dan aw nesayo se kedita dan teg sebad-sebad. Menge obanen se onà nesayo. Nesamà olò se bayi aw si Jesus. 10 Penga niyan, timindeg si Jesus aw mig-insà, “Atà, kenan lay den se menge otaw neopal kamno? Wedad lay den migpelumun kamno?”

11 Timaba se bayi, “Wedad, Sir.”

Minikagi si Jesus, “Eked a heman pegpelumun kamno. Olì ka den, aw ikà todà egpekesalà.”]

12 Pegtoladà i Jesus te menge otaw netipon, minikagi, “Siaken se kelowahan eg-anyag diyà te kedita te otaw te keneyonan. Aw tomaking se otaw kanak, wedad kengitngit diyà te pedowan din, so doen keanyag diyà kandin mekebegay te kaling pedowan wedad temanan.”

13 Pegdineg te menge Parisiyo te inikagi din, minikagi dan, “Olò sebad no se mig-indan kenami tepad te kamno pegkeotawun. Eked kepemenali se inikagi nikaw.”

14 Timaba si Jesus, “Pengkey olò sebad ko se mig-indan tepad kanak, meneng benal se inikagi ko, so netegahan ko aw kenan a lekat, aw netegahan ko heman aw kenan a pesalo. Meneng sikiyo, wedà kaw ketaga-taga aw kenan a lekat aw kenan a pesalo. 15 Aw meg-okom kaw te otaw, lekat olò te kenyo aneng-aneng se peg-okom niyo. Meneng siak, kenà tod ko dini se peg-okom ko te otaw. 16 Meneng aw meg-okom a, keseligan se peg-okom ko, so kenà ko sidebok se meg-okom, meneng meg-okom kay te Amay ko simogò kanak. 17 Doen punù ingkeliwat i Moises egtoloen niyo te keseligan se ikegiyen te dowa otaw aw eg-onawa se kagi dan. 18 Yan egkeseligan a, so siak se eg-indan kenyo tepad kanak, aw Amay ko simogò kanak, sikandin heman se eg-indan te benal tepad kanak.”

19 Migtompuyus se menge Parisiyo kandin aw minikagi dan, “Kenan lay se amay nikaw?”

Timaba si Jesus, “Wedà niyo ketegahi aw sinu a. Wedà niyo heman ketegahi aw sinu se Amay ko. Aw netegahan niyo aw sinu a, netegahan niyo heman aw sinu se Amay ko.”

20 Yan se inikagi i Jesus te pegtoladà din kidoen te dakel simbahan te Judiyo, doton te tambì niyan iningedanan Solanan te Kwarta Ibowang. Wedad otaw nekedakep kandin, so wedà pa dateng se aldaw pinemallì te Timanem te pegdakep dan kandin.

21 Todà minikagi si Jesus diyà te menge otaw netipon, “Agpet den se pegkesayo ko. Pengkey mengemahà kaw kanak, meneng matay kaw te eked pegwedadi se salà niyo. Eked kaw pekedoton te dotonan ko.”

22 Yan migpeinsaay se menge obanen te Judiyo, “Megpekematay lay sikandin? So minikagi sikandin te eked kidon pekedoton te dotonan din.”

23 Minikagi si Jesus, “Sikiyo se tege tanà, meneng siak se tege langit. Keneyonan se tinikedowan niyo, meneng kenà keneyonan se tinikedowan ko. 24 Yan se doun te minikagi a te matay kaw te eked pegwedadi se salà niyo, so aw eked kaw pemenal te benal se inikagi ko tepad te pegkeotawun ko, eked pegwedadi se salà niyo.”

25 Mig-insà dan, “Sinu ka lay?”

Timaba si Jesus, “Yan se melikit ko in-indan kenyo lekat te ketebò te pegtoladà ko. 26 Dakel pa se itoladà ko aw isila ko kenyo. Meneng egkeseligan se simogò kanak, aw keilangan meg-indan a diyà te kedita te otaw te kebenalan impetaga-taga din kanak.”

27 Meneng wedà dan pa ketegahi te Amay din Timanem se simogò kandin.

28 Minikagi si Jesus, “Penga te pegsawol niyo te Timanem Migpekeotaw kidoen te kayo intollok, yan ketegahan niyo te benal se inikagi ko tepad te pegkeotawun ko. Ketegahan niyo heman te wedà ko teboki se pegtoladà ko, meneng ipegtoladà ko se intoladà te Amay ko kanak. 29 Gayed a egtebangan te simogò kanak. Wedà a din tenani, so gayed ko eg-inangen se ibeg din.”

30 Peg-ikagi i Jesus kenyan, medita se otaw nemenal kandin.

31 Minikagi si Jesus diyà te menge Judiyo nemenal kandin, “Aw ebey kaw tomolò te itoladà ko, meinang kaw ontò tinoledaan ko. 32 Yan ketegahan niyo se kebenalan, aw pineokit te kebenalan, mekelowà kaw heman lekat te nekeallang kenyo.”

33 Timaba dan, “Nengà lay minikagi ka te mekelowà kay? Wedad palos mig-allang kenami, so ontò kay menge bowad-bowad i Abraham.”

34 Minikagi si Jesus, “Eneng-enengi niyo se kagi ko kenyo. Se kedita te otaw eg-inang te salà, yan se allang te salà. 35 Eked gayed peg-ogpà se allang diyà te balay te amo din te wedad temanan. Meneng se batà, mepakay aw gayed sikandin meg-ogpà diyà te balay te amay din te wedad temanan. 36 Yan aw Batà te Timanem se megpelowà kenyo lekat te salà, ontò kaw mekelowà. 37 Netegahan ko te bowad-bowad kaw i Abraham. Meneng ibeg niyo mengimatay kanak, so wedà niyo soli se kebenalan ipegtoladà ko diyà te pedowan niyo. 38 Se ipegtoladà ko, yan se kebenalan impetaga-taga te Amay ko kanak. Meneng se eg-inangen niyo, yan se medaet pig-ilingan niyo diyà te kenyo kemonaan.”

39 Minikagi dan, “Si Abraham se kemonaan day.”

Minikagi si Jesus, “Simpana ontò kaw bowad-bowad i Abraham, meg-iling kaw heman te mèpiya ininang din gebii. 40 Meneng pengkey migtoladà a kenyo te kebenalan impetaga-taga te Timanem kanak, meneng ibeg niyo mengimatay kanak. Kenà niyan se ininang i Abraham. 41 Yan iling kaw te amay niyo.”

Minikagi dan, “Kenà kay batà te lowà. Sebad olò se Amay day, aw yan se Timanem.”

42 Minikagi si Jesus, “Simpana Timanem se amay niyo, yan kedekelan a niyo peden te pedowan, so pegdini ko, Timanem se linekatan ko. Dimini a kenà lekat te kanak ibeg, meneng insogò a din dini. 43 Wedà niyo kelebeti se inikagi ko, so eked kaw keibeg menenalan te kebenalan itoladà ko. 44 Si Satanas se ontò amay niyo, aw se ibeg din medaet, yan heman se ibeg niyo inangen. Lekat te ketebò te keneyonan, egpengimatay sikandin. Wedad palos labut din te kebenalan, so wedad kebenalan diyà kandin. Aw megkebolalaw sikandin, yan se ketanem te pedowan din, so bolelawun sikandin, aw sikandin se eglekatan te kedita te kebolalaw. 45 Meneng ontò benal se kagi ko kenyo, aw yan se doun te eked a niyo pemenali. 46 Wedad sebad kenyo mekeindan te benal doen salà ininang ko. Olò kebenalan se intoladà ko, meneng wedà kaw pemenal kanak. 47 Egpenenalan se menge batà te Timanem diyà te kagi te Timanem. Meneng kenà kaw batà te Timanem, aw yan se doun te eked kaw penenalan.”

48 Pegdineg te menge obanen te Judiyo te inikagi i Jesus, minikagi dan, “Benal besi te kenà ka doma day Judiyo, meneng sakop ka besi te probinsya te Samarya eglindoan day. Migkebook ka so dinetengan ka te bosaw.”

49 Minikagi si Jesus, “Wedad bosaw diyà kanak. Ipegpelangkaw ko olò se Amay ko, meneng eglindò kaw kanak. 50 Kenà ibeg ko aw megpelangkaw-langkaw a, meneng doen meibeg te ipelangkaw a te otaw, aw sikandin se megpetaga-taga te benal se kagi ko. 51 Eneng-enengi niyo se kagi ko kenyo. Eked detengi te kemetayun se kedita te otaw tomolò te ipegtoladà ko.”

52 Minikagi se menge obanen te Judiyo, “Ontò day den netegahan te doen bosaw diyà kamno. Pengkey si Abraham aw kedita te telekeliwat te kagi te Timanem gebii, dinetengan se kedita dan te kemetayun. Meneng minikagi ka te eked detengi te kemetayun se otaw tomolò te ipegtoladà nikaw. 53 Kenà ka melangkaw diyà te kemonaan day si Abraham, so nematay sikandin aw kedita te telekeliwat te kagi te Timanem gebii. Sinu lay peden se pelingo-lingowan nikaw?”

54 Timaba si Jesus, “Simpana megpelangkaw-langkaw a, wedad ontong ko. Meneng ipegpelangkaw a te Amay ko, aw eg-ikagi kaw te sikandin se Timanem egsimbahen niyo. 55 Meneng wedà kaw ketaga-taga kandin. Netaga-taga a kandin, aw simpana mikagi a te wedà a ketaga-taga kandin, bolelawun a heman iling kenyo. Meneng seini se kebenalan, te netaga-taga a kandin, aw egtoloen ko se menge punù din. 56 Se kemonaan niyo si Abraham, ontò sikandin neluba so metoman din kitaen se pegdateng ko. Kinità a din den aw ontò den sikandin neluba.”

57 Minikagi se menge obanen te Judiyo, “Wedà ka pa apet te keliman se omay. Ontò ka lay kimità ki Abraham?”

58 Minikagi si Jesus, “Eneng-enengi niyo se kagi ko. Te wedà pa tebaw si Abraham, tapay a den doen.”

59 Pegdineg dan te inikagi din sìyan, nengimon dan te menge bato ibontog kandin, so ibeg dan imetayan dan sikandin. Meneng mineles si Jesus aw nesayo lekat te dakel simbahan.