1 Penga niyan, doen otaw nesekitan si Lazaro tege Bitanya. Doen dowa etebay din si Maria aw si Marta. Tege Bitanya dan heman. 2 Si Maria se migtoyong te lana diyà te benis te Pengolo, aw logay din se inggalis din kenyan. Nesekitan se meama dan si Lazaro. 3 Doen otaw insogò dan doton ki Jesus minikagi, “Sir, nesekitan se sigalak no nedekelan no te pedowan.”

4 Pegdineg i Jesus kenyan, minikagi, “Pengkey nesekitan sikandin, meneng se tod kenà amon matay, meneng amon ipekità te melangkaw se Timanem. Ipekità heman te melangkaw a Batà te Timanem pineokit kenyan.”

5 Pengkey nedekelan i Jesus te pedowan si Marta aw si Maria aw si Lazaro, 6 meneng pegdineg din te nesekitan si Lazaro, mig-ogpà pa kidoen taman te dowa se delem. 7 Pegkeobos te dowa se delem, minikagi si Jesus diyà te menge tinoledaan din, “Lomikò kidon den doton te probinsya te Judiya.”

8 Minikagi se menge tinoledaan din, “Sir, mèpiya aw eked ka pa likò doton, so doen pa ibeg te menge obanen te Judiyo memontog kamno te bato amon imetayan ka.”

9 Minikagi si Jesus, “Egsenang se aldaw te sempolò teg dowa oras te kelikit te aldaw. Aw mipanaw se otaw te aldaw, eked sikandin pekedogsò so melowa se aldaw. 10 Meneng aw mipanaw se otaw te delem, mekedogsò sikandin so wedad den aldaw.”

11 Yan se tegdeyanan inikagi i Jesus amon ketegahan dan te wedad pa medaet domateng diyà kandin kidoen te Judiya. Penga niyan, minikagi heman sikandin, “Timedogi den se sigalak tadon si Lazaro. Yan domoton a amon lokahen ko.”

12 Minikagi se menge tinoledaan din, “Pengolo, mèpiya aw timedogi den, so yan se pengilala te megkèpiya sikandin.”

13 Yan se inikagi dan so eden dan aw olò timedogi si Lazaro. Meneng se kedegdagan te inikagi i Jesus, nematay den sikandin. 14 Yan minikagi si Jesus kenà pineokit te tegdeyanan, kagi din, “Nematay den si Lazaro. 15 Mèpiya so wedad a kidoen te pegkematay din, so ketebangan kaw den amon lobosen se pegpemenal niyo kanak. Nayan, domoton kidon kandin.”

16 Si Tomas, se doma ngadan din si Pingin, minikagi diyà te menge doma tinoledaan, “Tomaking kidon te Pengolo pengkey imetayan kidon heman doma din.”

17 Pegdateng i Jesus doton te Bitanya, epat den se delem te peglebeng ki Lazaro. 18 Medapag se lonsod te Bitanya kidoen te Jerusalem, menge telo kilomitro se kediyò niyan. 19 Yan se doun te medita se menge Judiyo tege Jerusalem limaoy ki Marta aw si Maria amon sinelayen dan tandà te kedowa dan nematay. 20 Pegdineg i Marta te medapag den dan si Jesus, simongon sikandin. Meneng mig-ogpà pa se adi din si Maria kidoen te balay. 21 Pegkità i Marta ki Jesus, minikagi, “Pengolo, simpana dini ka, eked peden kematay se kedowa ko. 22 Pengkey nematay den, meneng netegahan ko te pengkey eden se pemoyoen no diyà te Timanem, yan se ibegay din kamno.”

23 Minikagi si Jesus, “Meantay pa se kedowa nikaw.”

24 Minikagi si Marta, “Netegahan ko te meantay sikandin te temanan aldaw aw entayen te Timanem se kedita te otaw lekat te nematay.”

25 Minikagi si Jesus, “Siaken se meg-antay te otaw lekat te nematay. Siak se egpemegay te kaling pedowan. Pengkey matay se otaw nemenal kanak, meneng meantay sikandin. 26 Aw memenal kanak se otaw wedà pa kematay, eked palos sikandin detengi te kemetayun. Nemenal ka lay kenyan?”

27 Timaba si Marta, “Ee, Pengolo. Nemenal a te sikona se Batà te Timanem. Sikona se Misiyas insogò din dini te keneyonan.”

28 Penga te peg-ikagi i Marta kenyan, minolì sikandin amon mangay te adi din si Maria. Minikagi sikandin te wedad doma otaw dimineg, “Dimateng den se Menenoladà, aw impeangay ka din.”

29 Pegdineg i Maria kenyan, ayas timindeg aw dimoton kandin. 30 Wedà pa dateng si Jesus te lonsod, so kidoen pa sikandin te sinongonan i Marta kandin. 31 Na, se menge Judiyo migsinalay kandin kidoen te balay, pegkità dan te pegkesayo i Maria lekat te balay, timaking dan kandin, so eden dan aw domoton te lebeng amon megkelag. 32 Meneng pegdateng i Maria doton ki Jesus, limongken sikandin, aw minikagi, “Pengolo, simpana dini ka, eked peden kematay se kedowa ko.”

33 Sagwa kimità si Jesus te migkelag si Maria aw kedita te Judiyo timaking kandin, neantag se pedowan din aw ontò nelidò. 34 Minikagi sikandin, “Kenan lay lebengi?”

Minikagi dan, “Pengolo, taking ka kenami.”

35 Penga niyan, migkelag heman si Jesus. 36 Pegkità te menge Judiyo te migkelag sikandin, minikagi dan, “Ontò kedì dakel se pedowan din diyà te nematay.”

37 Meneng minikagi se menge doma, “Sikandin se migpegolì te mata te otaw bota. Simpana dini sikandin, wedà peden kematay si Lazaro.”

38 Pegdateng i Jesus doton te lebeng, todà neantag se pedowan din. Ilib se linebengan ki Lazaro, aw doen dakel bato insampeng diyà te awang niyan. 39 Minikagi si Jesus, “Owangi niyo se lebeng din.”

Meneng minikagi se etebay te nematay si Marta, “Pengolo, nemahò den, so epat pa se aldaw lekat te peglebeng kandin.”

40 Minikagi si Jesus, “Eneng-enengi se inikagi ko diyà kamno. Aw memenal ka kanak, komità ka te melangkaw se Timanem.”

41 Penga niyan, inabat dan se bato insampeng te lebeng. Limengag si Jesus aw migtawal-tawal, “Amà, egpesiontong a te dinineg no den se pinemoyò ko kamno. 42 Netegahan ko te gayed a no egpenenelanen. Meneng migtawal-tawal a den kamno seini amon ketebangan se menge doma otaw dini, so ibeg ko memenal dan te sikona se simogò kanak dini te tanà.”

43 Penga te pegtawal-tawal i Jesus, timawal sikandin te dakel se kagi din, “Lazaro, lowà ka den kidoen.”

44 Limowà si Lazaro neantay den lekat te nematay. Ginakes pa se kedakel te lawa din te sapot pengkey diyà te benis din aw bebenayun. Doen kelobaw imbagkes diyà te bawa din. Minikagi si Jesus, “Lebadi niyo sikandin amon mekeipanaw.”

45 Se medita Judiyo timaking ki Maria doton te lebeng, pegkità dan te kepelahan ininang i Jesus, nemenal dan kandin. 46 Meneng doen menge doma dan Judiyo dimoton te menge Parisiyo, aw mig-indan dan kandan te ininang i Jesus. 47 Pegdineg te menge pengolo te simbahan aw Parisiyo, migtipon dan te kedita te doma dan obanen te simbahan, aw minikagi dan, “Megmeno kidon? So medita se kepelahan eg-inangen te otaw sìyan. 48 Aw eked kidon pegsagda kandin, kedita te Judiyo memenal eleg kandin. Aw domineg se gobirno kidoen te Roma te doen sebad otaw megpeinang selotan amon lomowan dini, medaet iyan, so isogò dan dini se menge sondalo amon pegbàtan dan se ogpeanan tadon, aw imetayan dan heman se kedita tadon Judiyo.”

49 Meneng doen sebad otaw diyà kandan si Caifas. Sikandin se ininang ontò pengolo te simbahan dalem te omay sìyan. Minikagi sikandin, “Kolang se aneng-aneng niyo. 50 Wedà niyo besi eneng-enengi te mèpiya aw sebad olò se otaw matay iselilin te kedita te otaw. Labi pa mèpiya aw sikandin se imetayan amon eked imetayi se kedita tadon Judiyo.”

51 Se inikagi din sìyan, kenà iyan lekat te kandin aneng-aneng. Meneng so sikandin se ontò pengolo te simbahan te omay sìyan, impeikagi sikandin te Timanem te metoman imetayan si Jesus amon somelilin sikandin te kedita te Judiyo. 52 Kenà olò menge Judiyo se ketebangan din, meneng sekopen te Timanem se kedita te otaw inangen din menge batà din, pengkey kenan dan peg-ogpà.

53 Lekat te aldaw sìyan, gayed dan miglalang te pegpengimatay kandin. 54 Yan se doun te limengà si Jesus te peglegeb din kidoen te menge lonsod te Judiyo. Meneng nesayo sikandin aw dimoton te lonsod iningedanan Ipraim, medapag te kebigtilan. Mig-ogpà sikandin kidoen aw menge tinoledaan din.

55 Penga niyan, agpet den domateng se aldaw te pista te menge Judiyo, sìyan Pista te Pegpelowà. Te wedà pa dateng se aldaw te pista, medita se otaw dimoton te Jerusalem lekat te menge doma lonsod amon toloen dan se ketanem te menge Judiyo tepad te pegpelinis. 56 Nengemahà dan ki Jesus kidoen. Pegketipon dan kidoen te dakel simbahan te Judiyo, migpeinsaay dan, “Eden lay se kenyo aneng-aneng? Tomanod lay sikandin te pista, aw eked?”

57 Tapay migpunù se menge pengolo te simbahan aw menge Parisiyo te keilangan indanan dan aw kenan si Jesus amon dekepen dan sikandin.