1 Nayan, pegkeokit te enem se aldaw, impetaking i Jesus si Pedro, si Santiago, aw si Juan adi i Santiago, aw timikedeg dan doton te melangkaw bontod te wedad doma dan. 2 Pegketà, dalem te pegtengteng dan ki Jesus, netodà se bawa din, aw simenang iyan iling te aldaw. Ontò migkepotì se kedakel te penenaktun din so ontò minanyag. 3 Pegketà, kinità dan heman si Moises aw si Elias migpebelaw-belaway doma ki Jesus. 4 Minikagi si Pedro diyà ki Jesus, “Pengolo, mèpiya so dini kay. Aw mepakay diyà kamno, meg-inang a den te telo balay dini amon doen ogpaan te teg sebad-sebad kenyo si Moises aw si Elias.”

5 Telobo pa minikagi si Pedro, doen labon melowa dimateng diyà kandan aw wedà dan ebey kità kandan. Penga niyan, dinineg dan se kagi te Timanem lekat te labon, “Seini se Batà ko. Dakel se pedowan ko kandin, aw ontò a neluba kandin. Keilangan sikandin se penenelanen niyo.”

6 Pegdineg dan kenyan, nekelemlem dan so ontò dan nelemitan. 7 Meneng nemaed si Jesus kandan, aw minikagi, “Enaw kaw den. Ikà niyo egkelemitan.”

8 Peggimata dan, kinità dan olò si Jesus wedad den doma din.

9 Pegtopang dan lekat te bontod, ontò migpunù si Jesus kandan, kagi din, “Ikà niyo eg-indan te kinità niyo singed aw meantay a Timanem Migpekeotaw lekat te nematay.”

10 Penga niyan, mig-insà se menge tinoledaan din, “Aw agpet ka den lomowan, nengà lay egtoladà se menge menenoladà te punù ingkeliwat i Moises te keilangan domateng si Elias te eked pa lowan se Misiyas?”

11 Timaba si Jesus, “Benal domateng onà si Elias, so sikandin se megpeketagad te kedita. 12 Meneng mikagi a den diyà kenyo te dimateng den sikandin, aw wedà sikandin kilelai te doma otaw. Meneng medaet se ininang dan diyà kandin. Iling heman kenyan se medaet inangen dan diyà kanak Timanem Migpekeotaw.”

13 Penga niyan, neeneng-enengan dan te si Juan se timoman te pakang tepad te pegdateng i Elias.

14 Pegdateng dan doton te ongan, medita se otaw migtagad kandan. Nayan, doen otaw dimoton ki Jesus aw limongken diyà kandin, aw minikagi, 15 “Sir, keidowi bag se batà ko, so pigbaboy sikandin aw ontò eg-elegen. Melikit sikandin eg-elosen te bosaw diyà te apoy aw eglemesen heman diyà te wayeg. 16 Pengkey inibing ko sikandin dini te menge tinoledaan nikaw amon megpegolì dan kandin, meneng wedà dan iyan kebatog.”

17 Minikagi si Jesus, “Tay law, sikiyo menge otaw. Ontò kolang se aneng-aneng niyo, so wedà kaw pa salig diyà kanak. Eked den kenamay se pegdoma ko kenyo, meneng keilangan tomayod a pa pengkey eked kaw pemenal. Na, pedinihi se batà nikaw.”

18 Penga niyan, sinagda i Jesus se bosaw aw impelowà din iyan lekat te batà. Pegketà, negolian sikandin.

19 Pegkenamay-namay, dimoton se menge tinoledaan i Jesus kandin te wedad doma dan, aw mig-insà dan, “Nengà lay wedà day kebatog se pegpelowà te bosaw lekat kandin?”

20 Minikagi si Jesus, “Wedà niyo iyan kebatog so wedà pa kelobos se pegsalig niyo diyà kanak. Mikagi a den diyà kenyo te pengkey deitek pa se pegsalig niyo diyà kanak iling te kedeitek te benì te mostasa, mekebatog kaw mikagi diyà te bontod seini te malin iyan, aw tomolò iyan kenyo, so wedad palos eked niyo kebatog. [ 21 Meneng eked pelowai se seini kemolò te bosaw singed aw megtawal-tawal kaw aw megpowasa kaw.]”

22 Nayan, pegketipon te menge tinoledaan i Jesus doton te probinsya te Galiliya, minikagi si Jesus, “Seini se metoman domateng diyà kanak Timanem Migpekeotaw. Metoman a itolok aw ibegay a diyà te belad te doma otaw. 23 Penga niyan, imetayan a dan, aw entayen a lekat te nematay te iketelo te aldaw.”

Peg-ikagi din kenyan, ontò nelidò se pedowan dan.

24 Pegdateng dan doton te lonsod te Kapirnaom, doen menge otaw kidoen egpengabat te kwarta ipegbegay diyà te dakel simbahan te Jerusalem te kelikit te omay. Mig-insà dan diyà ki Pedro, “Egpemegay lay se pengolo niyo te kwarta diyà te dakel simbahan?”

25 Timaba si Pedro, “Ee man.”

Peg-olì din doton te balay, te wedà pa ikagi si Pedro, minikagi si Jesus, “Simon, doen insà ko kamno. Sinu lay se otaw keilangan memegay te kwarta diyà te selotan? Kandin pamilya, aw doma otaw?”

26 Timaba si Pedro, “Olò doma otaw se keilangan memegay.”

Minikagi si Jesus, “Yan eked pemegay se kandin menge batà. 27 Meneng eked ki keibeg aw doen meopal kenita. Yan doton ka te lanaw aw pegtonton ka te selab. Kitaen no se kwarta selapì doton te bahà te tagnà ikan meabat nikaw. Botong iyan te keilangan ibegay ta diyà te simbahan. Ebati iyan aw begayi diyà te menge otaw egpengabat.”