1 Nayan, wedà kenamay, ontò medita se otaw netipon diyà ki Jesus. Pegkewedad te kànen dan, tinawal i Jesus se menge tinoledaan din, aw minikagi sikandin, 2 “Neidowan ko den se menge otaw seini, so netelowan den dan timaking kanak, aw wedad den kànen dan. 3 Simpana ipeolì ko dan te binallos dan pa, metapì dan kidoen te dalan, so mediyò se ogpeanan te keditaan dan.”

4 Minikagi se tinoledaan din, “Meneng kebigtilan ini, aw wedad palos ebatan tadon te pan amon ipekaen tadon kandan.”

5 Mig-insà si Jesus, “Pila lay se pan inibing niyo?”

Timaba dan, “Pito olò.”

6 Penga niyan, impeonsad din se kedita te otaw diyà te tanà. Inabat din se pito pan, aw migpesiontong diyà te Timanem kenyan. Binelà-belà din iyan, aw imbegay din diyà te menge tinoledaan din, aw inteped dan diyà te menge otaw netipon. 7 Doen heman pilabok ikan dedeitek. Migpesiontong heman si Jesus diyà te Timanem kenyan, aw impeteped din heman iyan diyà kandan. 8 Kimaen se kedita dan aw nebesog dan. Penga niyan, inimon dan se samà te pan kinaen dan, aw pito se boliyas nepenò. 9 Menge epat melalan se otaw kimaen kenyan. 10 Penga niyan, impeolì i Jesus se kedita dan, aw simakay sikandin te belangay doma te menge tinoledaan din, aw dimoton dan te probinsya medapag te Dalmanota.

11 Nayan, doen menge Parisiyo dimoton ki Jesus. Megdindil dan peden kandin. Ibeg dan megtandà dan kandin, aw yan se doun te nemoyò dan te ipekità din diyà kandan se pengilala amon ketegahan dan te ontò sikandin insogò te Timanem. 12 Ontò migpedo-pedo si Jesus tandà te puluk din, aw minikagi sikandin, “Wedad kekemowan te pegpekità ko kenyo te pengilala. Eneng-enengi niyo se kagi ko seini. Wedad palos pengilala ipekità te Timanem diyà kenyo.”

13 Penga niyan, nesayo si Jesus lekat kidoen, aw simakay te belangay pesalo doton dipag te lanaw.

14 Nayan, pegbatas dan te lanaw, wedad pan inibing te menge tinoledaan i Jesus, so nelibelan dan se bawo dan. Meneng doen sebad olò pan kidoen te belangay. 15 Migpunù si Jesus kandan, kagi din, “Peg-ahà kaw amon eked kaw ketini te yist te menge Parisiyo aw si Herod.”

16 Migpebelaw-belaway se menge tinoledaan din, kagi dan, “Yan se inikagi din so wedad pan inibing tadon.”

17 Meneng netegahan i Jesus aw eden se aneng-aneng dan, aw minikagi sikandin, “Tay law. Ikà niyo egkepela so wedad pan inibing niyo. Nepela a kenyo, so wedà niyo pa kelebeti se inikagi ko gina diyà kenyo. Magsen pa se olo niyo. 18 Pengkey doen mata niyo, wedà kaw pa kità te kebenalan. Pengkey doen telinga niyo, wedà kaw pa penenalan. Iling te nelibelan niyo se kepelahan ininang ko. 19 Pegpekaen ko te lima melalan otaw te lima pan, pila lay buun se inipenò niyo te samà?”

Timaba dan, “Sempolò teg dowa.”

20 Mig-insà heman si Jesus, “Pegpekaen ko te epat melalan otaw te pito pan, pila lay boliyas se inipenò niyo te samà?”

Timaba dan, “Pito.”

21 Minikagi si Jesus, “Aw wedà niyo iyan kelibeli, nepela a so wedà niyo pa kelebeti se inikagi ko gina diyà kenyo.”

22 Nayan, dimoton si Jesus aw menge tinoledaan din te Bitsayda. Doen menge otaw nengibing te otaw bota doton ki Jesus, aw nemoyò dan te pemàdan din sikandin amon kegolian. 23 Minawid si Jesus te belad te otaw bota, aw inagak din doton te lowà te lonsod. Penga niyan, migsawol sikandin te ngingi diyà te mata te bota, aw nemaed kandin, aw mig-insà, “Doen lay den kinità nikaw?”

24 Timengteng se otaw aw minikagi, “Ee. Meneng kenà metaen so iling te lawa te kayo se bawa te otaw kinità ko migpanaw-panaw.”

25 Todà nemaed si Jesus te mata din. Penga niyan, ontò timengteng se otaw sìyan aw kinità din se otaw ontò metaen, so migkèpiya den se mata din. 26 Penga niyan, impeolì sikandin i Jesus, kagi din, “Ikà eg-apit pengkey doton te lonsod.”

27 Nayan, dimeleg si Jesus aw menge tinoledaan din pesalo doton te lonsod te Sesarya Filipos. Peg-ipanaw dan, mig-insà si Jesus diyà kandan, kagi din, “Eden lay se kagi te kedita te otaw tepad kanak? Sinu a lay ekon?”

28 Timaba dan, “Doen menge otaw eg-ikagi te sikona si Juan Memonyagay. Doen heman eg-ikagi te sikona si Elias. Doen heman eg-ikagi te sikona se doma telekeliwat te kagi te Timanem gebii.”

29 Mig-insà si Jesus, “Meneng eden lay se kenyo aneng-aneng tepad kanak? Sinu a lay?”

Timaba si Pedro, kagi din, “Sikona se Misiyas insogò te Timanem dini kenami.”

30 Penga niyan, migpunù si Jesus te keilangan eked dan indani diyà te doma otaw tepad kandin.

31 Nayan, migtoladà si Jesus diyà te menge tinoledaan din aw eden se metoman domateng diyà kandin Timanem Migpekeotaw. Ontò sikandin elegen, aw kuluwan sikandin te menge obanen te Judiyo aw menge pengolo te simbahan aw menenoladà te punù ingkeliwat i Moises. Metoman sikandin imetayan, meneng penga niyan te telo se aldaw, meantay sikandin lekat te nematay. 32 Ontò nebangal se intoladà din kandan. Penga niyan, migpedapag si Pedro diyà ki Jesus, aw minikagi diyà kandin te eked kepakay aw metoman iyan domateng diyà kandin. 33 Meneng timengteng si Jesus diyà te menge tinoledaan din aw ontò minikagi diyà ki Pedro, kagi din, “Kesayo ka lekat kanak. Iling ka ki Satanas, so kenà lekat te Timanem se ibeg no sìyan, meneng lekat iyan te aneng-aneng nikaw.”

34 Penga niyan, tinawal i Jesus se menge tinoledaan din sipat kedita te doma otaw netipon kidoen. Minikagi sikandin, “Aw meibeg se otaw tomaking kanak, keilangan megsagda sikandin te ibeg te pedowan din, aw tomayod te kelimahan te kelikit te aldaw pengkey imetayan sikandin, aw keilangan ontò tomaking kanak. 35 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak aw pegtoladà din te Mèpiya Indan tepad kanak, begayan sikandin te kaling pedowan wedad temanan. 36 So simpana tig-epoen te otaw se kedakel te keneyonan, aw penga niyan matay sikandin aw ipelumun doton te kilot, wedad ontong din, 37 so eked kebeyadi se kaling pedowan wedad temanan. 38 Aw eked ikagi se otaw te sikandin se sakop ko, aw eked heman tolò te kagi ko meneng tomaking te otaw nelegeb te salà egtinàyog te Timanem, yan se otaw eked ko heman ikegihi te sikandin se sakop ko te peglikò ko. Siak se Timanem Migpekeotaw, aw lomikò a pa dini tekingan te kelangkaw te Amay ko aw sipat menge anghil te Timanem.”