13
Keteboan te kelimahan
Mar. 13:1-13; Mat. 24:1-14; 10:17-22; Luc. 21:5-19
Nayan, peglowà i Jesus lekat te dakel simbahan te Jerusalem, doen sebad tinoledaan din minikagi, “Sir, tengtengi se menge balay te simbahan, so mèpiya se bawa niyan, aw ininang iyan te bato mèpiya se bawa niyan.”
Minikagi si Jesus, “Pengkey induyun niyo se dakel simbahan seini, meneng tigkan iyan kebàtan te modi aldaw, aw wedad palos bato ketenanan diyà te lanto te doma bato.”
Wedà kenamay, dimoton dan te bontod te Olibo dipag te dakel simbahan. Nenenoo si Jesus, aw dimoton kandin si Pedro, si Santiago, si Juan, aw si Andres te wedad doma dan. Mig-insà dan, “Indani kay. Kano lay ketoman se in-indan nikaw? Eden lay se pengilala kitaen day aw agpet metoman se kedita niyan?”
Minikagi si Jesus, “Peg-ahà kaw amon eked kaw keekali. Doen kwani medita otaw megpelingo-lingo te insogò ko dan. Mikagi dan te sikandan se Misiyas, aw medita se otaw keekalan dan aw tomaking kandan. Aw domineg kaw te doen gira aw menge samok, ikà niyo egkelemitan. Keilangan onà iyan meinang, meneng kenà pa niyan se temanan te keneyonan. Medita se otaw meggira, so doen pongan megbolaw diyà te doma pongan, aw doen heman menge sakop te sebad selotan megbolaw diyà te menge sakop te doma selotan. Megelà se otaw te medita ogpeanan tandà te linog aw bayil domateng diyà kandan. Pengkey medaet iyan, meneng yan olò se keteboan te kelimahan domateng dini te keneyonan, iling te keteboan te mesakit domateng te bayi agpet tebawan.
“Meneng peg-ahà kaw, so ibingen kaw te doma otaw doton te howis, aw bedasen kaw dan kidoen te menge simbahan te Judiyo. Ipeibing kaw doton te menge gobirnador aw selotan tandà te pegpesakop niyo diyà kanak, amon mekeindan kaw te kebenalan tepad kanak diyà kandan. 10 Keilangan onà itoladà se Mèpiya Indan diyà te kedita te otaw te eked pa dateng se temanan te keneyonan. 11 Aw ibingen kaw doton te otaw meg-okom kenyo, ikà niyo egketetana aw eden se ikegiyen niyo kandan. Dalem te aldaw sìyan, begayan kaw te kebiyasa amon meketaba kaw kandan, so kenà lekat te kenyo kebiyasa se ikegiyen niyo, meneng lekat iyan te Espiritu Santo. 12 Doen menge otaw megtolok te kandan menge kedowa amon imetayan dan. Doen heman amay megtolok te kandan menge batà amon imetayan dan. Doen heman menge otaw eked pegsagman te kandan amay aw inay, aw ipeimatay dan. 13 Kebensihan kaw te keditaan te otaw tandà te pegpesakop niyo diyà kanak. Meneng aw tomayod kaw te kedita te kelimahan, ipelowà kaw.”
Kedaet te kelimahan
Mar. 13:14-23; Mat. 24:15-28; Luc. 21:20-24
14 “Doen pa domateng meg-inang te medaet doton te dakel simbahan te Jerusalem, pengkey eked iyan kepakay, aw ontò mekelamit te otaw. (Keilangan kelebetan iyan te kedita te otaw megbasa te kagi din sìyan insolat.) Aw kitaen niyo iyan doton te dakel simbahan, keilangan komadas se kedita te otaw lekat te Judiya pesalo doton te bontod. 15 Keilangan eked awop diyà te balay din se otaw doton te lowà amon ebaten din se kedònan, meneng keilangan tenanan din se kedita. 16 Se otaw egterbaho doton te pawà, eked heman olì amon ebaten din se ekasan, meneng keilangan komadas. 17 Mekelelayò heman se menge bayi mebedes aw egsosowan te aldaw sìyan. 18 Pegtawal-tawal kaw diyà te Timanem te kenà pengodan se pegkadas niyo, 19 so ontò medaet se kelimahan domateng diyà te keneyonan. Wedad palos kelimahan labi pa medaet diyà kenyan lekat te peg-inang te Timanem te keneyonan lamig seini, aw wedad palos heman kelimahan domateng labi pa medaet diyà kenyan. 20 Meneng pekebebaen te Timanem se kenamay te aldaw te kelimahan sìyan amon eked kegelà se kedita te otaw. Pekebebaen din iyan tandà te menge otaw pinemallì din.
21 “Aw domateng se aldaw sìyan, aw doen otaw mikagi, ‘Na, dini den se Misiyas,’ aw doen otaw mikagi, ‘Na, doton se Misiyas,’ ikà niyo egpemenal kandan, 22 so doen menge otaw domateng megpelingo-lingo te sikandan se Misiyas aw menge telekeliwat te kagi te Timanem. Meg-inang dan heman te menge kepelahan amon keekalan dan peden heman se menge otaw pinemallì te Timanem. 23 Meneng peg-ahà kaw, so mig-indan a den te kedita diyà kenyo te eked pa dateng.”
Peglikò te Timanem Migpekeotaw
Mar. 13:24-27; Mat. 24:29-31; Luc. 21:25-28
24 “Aw mepenga se kelimahan sìyan, megkengitngit se keneyonan, so eked ebey senang se aldaw aw bolan. 25 Medagdag heman se menge bitoen lekat te langit, so mebilit se kedita dan. 26 Penga niyan, kitaen te kedita te otaw se pegdateng ko, so lomikò a Timanem Migpekeotaw tekingan te labon. Komità dan te ontò a metolos aw melangkaw a. 27 Isogò ko se menge anghil, aw ipetipon ko se kedita te otaw pinemallì ko lekat te kebelad te keneyonan, pengkey kenan dan peg-ogpà.”
Tegdeyanan tepad te kayo igira
Mar. 13:28-31; Mat. 24:32-35; Luc. 21:29-33
28 “Penenalan kaw den te tegdeyanan seini tepad te kayo igira. Aw tomobed iyan aw domawen, ketegahan niyo te agpet den domateng se pengaldaw. 29 Iling heman kenyan, aw kitaen niyo se pegketoman te kedita niyan inikagi ko diyà kenyo, ketegahan niyo te agpet a den lomikò. 30 Eneng-enengi niyo se kagi ko kenyo seini. Doen menge otaw komità te pengilala sìyan, eked dan kematay singed aw metoman se kedita niyan. 31 Doen temanan te langit aw tanà, meneng gayed metoman se kagi ko te wedad temanan.”
Wedad netaga-taga aw kano likò
Mar. 13:32-37; Mat. 24:36-44
32 “Meneng eked ko indani aw eden eldawi aw orasi se peglikò ko. Wedad palos netaga-taga aw kano a likò, pengkey menge anghil doton te langit, so olò Amay ko se netaga-taga kenyan. 33 Keilangan gayed kaw megpeketagad, so wedà niyo ketegahi aw eden eldawi se pegketoman niyan. 34 Iling a te otaw domoton te mediyò ogpeanan. Te eked pa kesayo, doen ipunù din diyà te kedita te sineligan din, so doen inangen te teg sebad-sebad kandan te iyogan din. Megpunù heman sikandin te keilangan gayed megpeketagad se otaw egbantay te balay din. 35 Yan se doun te keilangan gayed kaw megpeketagad, so wedà niyo ketegahi aw eden orasi se peglikò te Pengolo niyo, atok te pegsallep te aldaw, atok megtengà te delem, atok eked pa libtak se aldaw, atok iselem. Yan se doun te keilangan gayed kaw megpeketagad, 36 so aw lomikò a te wedà kaw pa peketagad, kitaen ko sikiyo timedogi pa. 37 Se impunù ko kenyo seini, yan se ipunù ko heman diyà te kedita te otaw, te keilangan megpeketagad se teg sebad-sebad otaw.”