5
Solat linolon aw Nati te Karniro
1 Penga niyan, doen kinità ko kidoen te belad te sìyan egpenenoo kidoen. Inewidan din te kowanan se papil sinolatan heman diyà dibaloy. Linolon iyan, aw pito se pengilala impeket kenyan amon eked iyan kelebad. 2 Penga niyan, kinità ko heman se magsen anghil, aw timawal sikandin te dakel se kagi din, “Sinu lay se melangkaw otaw mekebatog meglebad te solat seini? Sinu lay se melangkaw otaw mekebatog mengabat te pengilala seini amon mebasa ini?”
3 Pengkey nengemahà se anghil kidoen te langit, aw tanà, aw didalem te tanà, meneng wedad palos otaw kinità din botong se kelangkaw din mekebatog meglebad kenyan amon megbasa kenyan. 4 Yan se doun te migkelag a, so wedad palos kinità din botong se kelangkaw din mekebatog meglebad kenyan amon megbasa kenyan. 5 Penga niyan, doen sebad diyà te kelowan teg epat obanen minikagi, “Ikà egkelag, so magsen si Jesus iling te liyon, aw sikandin se bowad-bowad i Juda, aw timobò diyà te kemonaan din si David. Sikandin se dimaeg te kedita te poon din, aw yan se doun te sikandin se mekebatog meglebad te solat aw mengabat te pito pengilala niyan.”
6 Penga niyan, doen kinità ko diyà te tengà-tengà te onsedanan te peglowan aw epat ayam-ayam metolos aw menge obanen. Doen Nati te Karniro mig-ogpà kidoen, aw kinità ko se menge laas te palì te pegpengimatay kandin gebii, meneng neantay den sikandin. Doen pito seka din, aw pito se mata din, aw yan se pengilala te Espiritu Santo egpetaga-taga te metolos sikandin pineokit te pito keokit, aw insogò doton te kebelad te keneyonan. 7 Penga niyan, migpedapag se Karniro diyà te onsedanan te peglowan, aw inabat din se papil linolon lekat te belad kowanan te sìyan nenenoo kidoen. 8 Peg-abat din te papil, limongken se kedita te ayam-ayam metolos aw obanen diyà kandin amon megsimba dan kandin. Inibing te teg sebad-sebad obanen se alpa egkebliten, aw inewidan dan heman se menge lipong ininang te bolawan. Nepenò se lipong dan te metinadeg egsonogen amon megkèpiya se nadeg. Yan se polingun te pegtawal-tawal te menge sakop te Timanem kandin. 9 Migdelangan dan heman te kaling delangan, kagi dan,
“Botong se kelangkaw nikaw amon mekebatog ka mengabat te papil linolon
Aw mengabat ka te pengilala niyan,
So sikona se inimetayan,
Aw pineokit te dipanog no te pegkematay no,
Migtansò ka te otaw lekat te kedita te ogpeanan
Amon meinang dan sakop te Timanem.
10 Impeakop no dan diyà te peglowan nikaw.
Ininang no dan menge sogounun no,
Aw eglowan den dan kidoen te keneyonan.”
11 Penga niyan, kinità ko aw dinineg ko se medita anghil migdelangan. Ontò dan medita, so minelalan dan aw eked dan kebilang. Netipon dan kidoen te onsedanan te peglowan aw epat ayam-ayam metolos aw menge obanen. 12 Ontò magsen se pegdelangan te kedita dan, kagi dan,
“Melangkaw se Karniro inimetayan,
Aw yan keilangan toloen tadon sikandin,
Aw begayan tadon te kedònan tadon,
So biyasa sikandin, aw eglowan diyà te kedita.
Sikandin se ipelangkaw tadon, aw segmanen tadon, aw iduyun tadon.”
13 Penga niyan, dinineg ko se pegdelangan te kedita kidoen te langit, aw tanà, aw pengkey kidoen didalem te tanà aw dagat. Migdelangan se kedita dan, kagi dan,
“Iduyun sikandin egpenenoo kidoen te onsedanan te peglowan,
Aw iduyun heman se Karniro.
Keilangan segmanen dan,
Aw ipelangkaw dan,
Aw toloen dan te wedad temanan.”
14 Penga niyan, timaba se epat ayam-ayam metolos, kagi dan, “Metoman iyan.”
Limongken heman se menge obanen aw migsimba dan.