7
144 melalan se Judiyo pinengilelaan
1 Penga niyan, kinità ko se epat anghil timindeg kidoen te epat dogong te keneyonan, aw migsagkà dan te epat kelamag amon eked kedogi se tanà, aw dagat, aw kayo. 2 Penga niyan, kinità ko se sebad anghil dimateng lekat te eglibtakan te aldaw. Inibing din se inangay te pengilala tinig-apò te Timanem wedad temanan din. Timawal sikandin te dakel se kagi din diyà te epat anghil insogò din, sìyan neketagad den megbaet te tanà aw dagat. 3 Minikagi sikandin, “Ikà niyo egbaet te tanà aw dagat aw kayo singed aw onà day pengilelaan se kilay te kedita te otaw egtolò te Timanem tadon.”
4 Penga niyan, inindanan a te kedita te otaw pengilelaan, sebad gatos kepatan teg epat melalan se kedita dan pengilelaan lekat te sempolò teg dowa pongan te bowad-bowad te batà i Israel.
5 Sempolò teg dowa melalan se otaw pinengilelaan dan lekat te bowad-bowad te batà din si Juda.
Sempolò teg dowa heman melalan se pinengilelaan dan lekat te bowad-bowad te batà din si Ruben.
Sempolò teg dowa heman melalan se pinengilelaan dan lekat te menge bowad-bowad i Gad.
6 Sempolò teg dowa heman melalan lekat ki Aser.
Sempolò teg dowa heman melalan lekat ki Neftali.
Sempolò teg dowa heman melalan lekat ki Manases.
7 Sempolò teg dowa heman melalan lekat ki Simeon.
Sempolò teg dowa heman melalan lekat ki Levi.
Sempolò teg dowa heman melalan lekat ki Isacar.
8 Sempolò teg dowa heman melalan lekat ki Sabulon.
Sempolò teg dowa heman melalan lekat ki Jose.
Sempolò teg dowa heman melalan lekat ki Benjamin.
Ontò medita se otaw nenaol te mepotì
9 Penga niyan, kinità ko se ontò medita otaw lekat te kedita te ogpeanan. Eked dan kebilang, so ontò dan medita. Timindeg dan kidoen te monà te onsedanan te peglowan, kidoen te monà te Karniro. Nenaol dan te mepotì aw nengibing dan te pelapà te palmera. 10 Timawal se kedita dan, kagi dan, “Iduyun se Timanem eglowan diyà kenitadon, aw iduyun heman se Karniro, so sikandan se migpelowà kenitadon lekat te salà.”
11 Kidoen heman se kedita te anghil limibed te onsedanan te peglowan, aw menge obanen, aw epat ayam-ayam metolos. Limongken se kedita dan diyà te onsedanan te peglowan, aw migsimba dan te Timanem. 12 Minikagi dan, “Metoman iyan. Melangkaw se Timanem eglowan diyà kenitadon, aw yan iduyun tadon den sikandin, aw segmanen tadon sikandin, so ontò sikandin biyasa. Egpesiontong kidon heman kandin, aw ipelangkaw tadon sikandin, so metolos sikandin, aw eglowan diyà te kedita te wedad temanan. Metoman iyan.”
13 Penga niyan, doen obanen mig-insà kanak, “Netegahan no lay aw sinu se menge otaw seini nenaol te mepotì? Netegahan no lay aw kenan dan lekat?”
14 Timaba a, “Apò, wedà ko ketegahi. Indani a.”
Minikagi sikandin, “Lekat dan te ontò kelimahan. Migbugsak den dan te saol dan diyà te dipanog te Karniro amon ontò iyan megkepotì. 15 Yan se doun te timindeg den dan kidoen te monà te onsedanan te Timanem. Eg-ogpà dan kidoen te dakel simbahan din pengkey aldaw aw delem, aw gayed dan egtolò te ibeg din. Eg-ipaten dan heman te Timanem eg-ogpà kidoen te onsedanan te peglowan. 16 Eked den dan bellosi. Eked den dan heman kelao. Eked den dan ketapì tandà te keinit te aldaw, aw pengkey eden kemoloi te keinit, 17 so egtonggoan dan te Karniro tangkil te onsedanan te peglowan. Ibingen din dan doton te olo te wayeg mekebegay te kaling pedowan wedad temanan. Ebaten heman te Timanem se kedita te puluk dan.”