1 Penga niyan, kinità ko se sebad magsen anghil migpedanà lekat te langit. Nenaol sikandin te labon, aw doen binengonan neketedong kandin. Iling te senang te aldaw se bawa din, aw iling te tollok limegdeg se benis din. 2 Kidoen te belad din, inibing din se deitek papil wedà loloni. Pegtenà din, insawol din se benis din kowanan kidoen te tengà-tengà te dagat, aw insawol din se benis din bibang kidoen te tanà. 3 Timawal sikandin te ontò dakel, iling te kagi te liyon. Pegtawal din, migkilat te mekepito. 4 Pegkilat te mekepito, somolat a peden te dinineg ko. Meneng doen minikagi lekat te langit, “Ikà egsolat te inikagi te pito kilat, so keilangan ieles no iyan.”

5 Penga niyan, sìyan anghil kinità ko timindeg kidoen te dagat aw tanà, timakyaw sikandin te kowanan. 6 Migsapà sikandin te ngadan te Timanem eked palos kematay, sìyan mig-inang te langit, aw tanà, aw dagat, aw kedita niyan. Migsapà sikandin te eked den libà-libai se pegtoman te kedita, 7 so aw meg-edop se ikepito anghil te bodyong din, tomanen te Timanem se ibeg din, so yan se tapay impakang te Timanem diyà te menge telekeliwat timolò kandin gebii aw migkeliwat heman te kagi din.

8 Penga niyan, todà minikagi se dinineg ko lekat te langit, kagi din, “Doton ka te anghil timindeg kidoen te dagat aw tanà. Ebati se papil inibing din wedà loloni.”

9 Yan dimoton a te anghil aw pinemoyò ko se deitek papil. Minikagi sikandin, “Kinewai iyan aw kàni. Ontò iyan màmis iling te teneb diyà te bahà no, meneng megkepait iyan diyà te getek nikaw.”

10 Penga niyan, kininawà ko se deitek papil inibing te anghil, aw kinaen ko iyan. Ontò iyan màmis iling te teneb diyà te bahà ko, meneng peg-ame ko kenyan, migkepait iyan diyà te getek ko. 11 Penga niyan, insogò a din, kagi din, “Keilangan todà ka megkeliwat te kagi te Timanem tepad te medita kemolò te otaw, aw ogpeanan, aw kagi, aw selotan.”