13
Earcearǝu
1 Ɓǝ̀ mǝ gandǝ nacau nǝ
akún mǝnana a ɓanza kat
andǝ akún mala amǝturonjar,
sǝ ǝn panǝ earcearǝu raka,
ǝn dumǝna gonggwang
mǝ loàsǝ̀bani,
ko ana raka, ǝn dumǝna kùli
mala amǝ'ntùl.
2 Ɓǝà bang ama,
mǝ ndanǝ ɓoro mala
na ɓabum Ɓakuli,
ko ǝn bwalta acau
ɓa-sǝmbǝrǝa kat,
sǝ ǝn súrǝ̀ koya gìr ka,
ko mǝ ndanǝ gūlì arǝ Ɓakuli,
ulang mana nǝ̀ gandǝ
gǝshi ankono,
sǝ ǝn panǝ earcearǝu raka,
mǝ nda kǝgìr ɗàng.*13:2 Ɓalli gbal aɓa: Mat 17:20,21; 21:21; Mar 11:23; 1Kor 14:2.
3 Ɓǝ̀ mǝ nǝ pè amǝ'tǝ̀r
agirkuma mem kat,
mǝ nǝ pà nggūrǝam
ɓǝà pisǝì ace nggori,
sǝ ǝn panǝ earcearǝu raka,
mani pà nǝ̀ puram kǝgìr ɗàng.
4 Earcearǝu ka ndanǝ
munyi,
andǝ pe mǝɓoarne.
Earcearǝu ka kǝ pak
mɓali ɗang, kǝ nggori,
ko gusǝlǝ-múrû ɗang.
5 Earcearǝu kǝ pa
arkikun ɗang,
pànǝ earce-ɓamuru ɗang,
sǝ kǝ kaurǝa arǝ pak
bumlulla ɗang.
Earcearǝu kǝ bwal ɓwa
a bum ɗang.†13:5 Ɓalli gbal aɓa: 1Kor 10:24.
6 Ban kǝ ɓoari wi arǝ
ɓealɓikea ɗang,
ban kǝ ɓoari wi arǝ mǝsǝcau.
7 Earcearǝu kǝ bwaki buì
arǝ ɓwa ɗàng.
Earnǝɓwa male,
andǝ tsǝkɓalǝu male,
andǝ gandǝrǝu male
aɓalǝ agir kat ka
kǝ kpa ɗang.
8 Earcearǝu ka masǝlǝate
pà kàm ɗàng,
kǝ makban ɗang.
Na ɓabum Ɓakuli ka
nǝ̀ nggá came.
Anakiacau nǝ
akún-takuli ka
à nǝ̀ nggá came.
Ko sǝlǝe ka nǝ̀ nggá kutio.
9 Surǝe ma'sǝm ngga
lùmsǝ ɗang,
sǝ sǝm súrǝ̀ ɓabum
Ɓakuli kat ɗàng.
10 Sǝa ma ɓǝ̀ gìr
mǝnana lùmsǝ ka,
yina ka,
amǝnana à lùmsǝ raka,
à nǝ̀ ndǝrmi.
11 Mǝnana mǝ nda muna ka,
ǝn nggǝ nacau,
ǝn nggǝ ɗenyicau sǝ
ǝn nggǝ sǝngìr
a sǝne mala amuna.
Lang adyan ǝn
karǝna-ɓwa ka,
ǝn bwaki buam
arǝ pakkiagir
mala amuntulo.
12 Adyan ngga, sǝm nggǝ
sǝnban mbǝrǝm-mbǝrǝm,
kǝla yilǝmi gìr aɓa
tapwari mǝpǝndǝke,
sǝ a dǝmba ka,
sǝm nǝ̀ sǝnban
ɓamǝsǝu andǝ ɓamǝsǝu.
Ado ka, súrǝè mem ngga
lùmsǝ ɗang,
sǝ a dǝmba ka,
mǝ nǝ súrǝ̀ koman ngga,
kǝla mǝnana Ɓakuli
súrǝàm ɗǝɗak ka.
13 Ado ka, amǝnia yì
agir tàrú,
à nda à ue ka:
paɓamuru, andǝ tsǝkɓalǝu,
andǝ earcearǝu;
sǝ mǝgule malea kat ka,
nda earcearǝu.