Cauterǝa mǝdǝmbe mala Bulǝs aban ká a ban
AMƏ TASALONIKA
Mǝncau
Tasalonika ka, nda nggea-là mǝgule mala bu-nzali Masǝdoniya aɓa nzali Roma. Bulǝs mǝn ikǝlisiya abanì a nzǝm mǝnana nyìngŋǝ̀nà Filipi ka. Kat andǝ amani ka, banì sau ɗang, ɓinǝcau lo nǝban Amǝ Yahudi mǝnana à pak mɓali arǝ Bulǝs ace lidǝmba male aɓa hamnǝ cau mala Kǝrǝsti aɓalǝ aɓwana mǝnana amǝ Yahudi na raka. Pǝlǝa à tsǝk Bulǝs púp ɓǝ̀ nying Tasalonika aban ká Biriya. Nǝ nzǝ́mò, anzǝm mǝnana yi bwalǝna Korinti ka, ɓimǝturo andǝ mǝgya Timoti gilǝa pe wi cau amur pa mala agir a ikǝlisiya mǝnana a Tasalonika ka.
Cauterǝa mǝdǝmbe mala Bulǝs aban ká aban Amǝ Tasalonika ka à gilǝì ace ɓakɓabum amǝkwaɗi mǝnana abanì ka, andǝ bwal ɗenyicau malea ɓǝa cam kàngkàng. Yì ka, pak yàwá nǝ cau mǝɓoarne mǝnana oe amur paɓamuru andǝ earcearǝu malea ka. Kasǝɓalǝia arǝ ulang do mǝnana dum nǝi aɓalǝia, mana à ndatārǝia ka, sǝ nyesǝia wia acau amur aɗikiban mǝnana lo aɓa ikǝlisiya amur cau mala nyare yiu mala Kǝrǝsti.
Agir mǝnana a ɓālǝi ka
Tita cau1:1
Pak yàwá andǝ ɓwangsǝban1:2--3:13
Ɓakɓabum ace ɓealu mala do kwaɗi4:1-12
Kwarkiru amur cau mala yiu mala Kǝrǝsti4:13--5:11
Masǝlǝata acau ɓakɓabum5:12-22
Masǝlǝata cau5:23-28
1
Makkun mala Bulǝs
1 Mǝnia yì cauterǝa ka pur nǝban Bulǝs, andǝ Silas, andǝ Timoti.
Aban ká a ban ikǝlisiya mala amǝ Tasalonika, aɓwana mala Ɓakuli Tárrú, andǝa mala Mǝtalabangŋo Yesu Kǝrǝsti.*1:1 Ɓalli gbal aɓa: Atúró 17:1.
Ɓǝ̀ ɓwamuru andǝ dorǝpwala mala Ɓakuli do atà wun.
Paɓamuru mala amǝkpata
Yesu a Tasalonika ka
Yesu a Tasalonika ka
2 A koya pwari ka, sǝm nggǝ pakki Ɓakuli yàwá ace wun, sǝ sǝm nggǝ pak hiwi tùtù ace wun kat. 3 Aɓa hiwi ma'sǝm amur wun a ban Ɓakuli ma'sǝm yì Tarrú ka, sǝm nggǝ ɗenyi nǝ pé ma'wun aɓa paɓamuru, andǝ earcearǝu ma'wun mǝnana tsǝa wu pak túró kǝ̀rkǝ́r, andǝ came mala tsǝkɓalǝu ma'wun arǝ Mǝtala sǝm Yesu Kǝrǝsti.
4 Wun amǝ'eam sǝm, sǝm sǝlǝna ama Ɓakuli earǝna ce wun, nda sǝ tàr wun ace mǝnana ɓǝ̀ wu duk aɓwana male ka. 5 Cau Amsǝban mǝnana sǝm yiu nǝi a ban wun ngga, pà aɓa ne anggo nǝmurǝì ɗàng, nda gbal aɓa rǝcandǝa mala Bangŋo Mǝfele, andǝ pa'eare mǝkǝ̀rkǝr nì mǝnana lǝmdǝ ama cau mana sǝm na ka mǝsǝcau na ka. Wu sǝlǝna rǝ ulang do mǝnana sǝm do aɓalǝ wun àkǝ̀ ce ɓoaro ma'wun ngga. 6 Wu yi duk amǝ twalkusǝ sǝm andǝ mala Mǝtalabangŋo; kat andǝ tanni ma'wun kǝ̀rkǝ́r ka, wu ak cau mala Ɓakuli nǝ banɓoarnado mala Bangŋo Mǝfele.†1:6 Ɓalli gbal aɓa: Atúró 17:5-9. 7 Ace mǝno ka, wu dumǝna amǝkpata Yesu mǝnana amǝkwaɗi aɓa nzali Masǝdoniya andǝ Akaya kat, à nǝ̀ sǝni arǝ wun sǝ à nǝ̀ twal kusǝ wun ngga.
8 Sǝ ado, cau mala Mǝtalabangŋo ka, nda rǝ puro nǝ ban wun aban ká a ban aɓwana aɓa nzali Masǝdoniya andǝ Akaya kat. Sǝa ma mǝno nda nǝmurǝì ɗàng, cau mala paɓamuru ma'wun gbal a ban Ɓakuli ka, mesǝna a ban aɓwana a koya ban. Yàle sǝm pànǝ cau mǝnana ɗǝm sǝm nǝ̀ nea wia amur paɓamuru ma'wun ngga ɗàng. 9 Aɓwana nǝ ɓamuria nda à cama rǝ nacau mala agir mǝɓoarne mǝnana wu pak kat ace ak sǝm, mana sǝm waria sǝn wun ngga. À bang ce vwakibu ma'wun arǝ ankúl ace kpata Ɓakuli mǝ'mǝsǝcau nì andǝ mǝyilǝmuì. 10 Ɗǝm ngga à bang cau mala do kundǝmuru ma'wun arǝ yiu mala Muna mala Ɓakuli nǝ kuli, yì muna male mana loasǝi a ɓembe ka. Nda Yesu mana nda mǝ'amsǝ sǝm a bu tanni mala bumlulla mǝɓike mala Ɓakuli mǝnana kǝ yiu ka.