1 Adyan ngga, Bangŋo Mǝfele kǝ na sǝm bwāng ama a masǝlǝata apwari ka, aɓea aɓwana nǝ̀ pǝlǝì paɓamuru mǝ'mǝsǝcau nì nzǝmia. À nǝ̀ kpata abangŋo mǝ'nyirì andǝ akanìgìr mǝnana à pur nǝ ban akukwar ka. 2 Amǝnia yì amǝkànìgìr ka, amǝ'kúnɓárína na sǝ amǝ'nyir na. Ɓabum ɗenyicau mǝɓoarne malea wuna. 3 À nda ka aɓwana mana à kǝ pǝrban arǝ doɓala andǝ lika aɓea agirlina, agirlina mǝnana Ɓakuli pusǝia ace aɓwana mana à sùrǝ́nà rǝ mǝsǝcau, à pana ɓamuria a baní ka, ɓǝà kǝ lia nǝ pak yàwá ka. 4 Sǝ acemǝnana koya gìr Ɓakuli pusǝì ka mǝɓoarne na ka, ɓǝ̀ sǝm ngga na ama sǝm nǝ̀ ɓinǝ kǝ ɓè ɗàng. Ɓǝ̀ sǝm e nǝ ɓabum yàwá, 5 acemǝnana Ɓakuli tsǝngŋǝni dumǝna mǝfele nǝ hiwi andǝ cau male.

6 We ka, ɓǝ̀ a kǝ lidǝmba nǝ bǝ́lì amǝkpata Ɓakuli ɓalǝ amǝnia yì agir ka, a nǝ duk mǝtúró mǝɓoarne mala Kǝrǝsti Yesu, a nǝ lǝmdǝ ama a gulna aɓalǝ acau mala do kwaɗi andǝ kanigir mǝ'mǝsǝcau nì mǝnana a kpana tè ka. 7 Tārǝto arǝ naki acauɓana andǝ anjarnzǝne mala aɓwagula. We ka, pà rǝcandǝa mò arǝ pe ɓamuro kanigir mala do pepe aɓa Bangŋo. 8 Songnǝ nggūrǝu ka ndanǝ ɓoaro, sǝama ɓak ɓamuru aɓa do kpata Ɓakuli ka ndanǝ gir mǝɓoarne atè aɓalǝ agir kat, acemǝnana nda bwal kum do yilǝmu mǝɓoarne mana adyan andǝ mǝno kǝ yiu ka.

9 Mǝnia ka, nda mǝsǝcau mǝnana ndanǝ ɓoaro ɓǝ̀ koyan ngga ɓǝ̀ é ka. 10 Nda gìr mǝnana tsǝa sǝ sǝm nggǝ pak túró kǝ̀rkǝ́r, sǝm nggǝ lidǝmba nǝ ɓariki, acemǝnana tsǝkɓalǝu ma'sǝm ngga, nda amur Ɓakuli mǝyilǝmuì, yì Mǝ'amsǝban mala aɓwana kat, nggeamurǝmi ka aɓwana mǝnana à paɓamuria a baní ka.

11 Kani aɓwana amǝnia yì agir ka, sǝ wu tsǝa koyana ka ɓǝ̀ bwaltea. 12 Kǝa eare ɓǝ̀ kǝ ɓwa nyesǝo ɓà, acemǝnana a nda lo-ɓwa ka ɗàng. Duk girkànì a ban amǝkwaɗi aɓa nacau, andǝ domǝɓoarne, andǝ earcearǝu, andǝ paɓamuru, andǝ domǝɓoarnsari mô. 13 Sǝ kaniama mǝ yiu ka, pà ɓamuro arǝ ɓallia aɓwana Malǝmce mala Ɓakuli andǝ kania wia gir, ɓǝa kum ɓakban. 14 Ce a būrǝce ɓoro mala Bangŋo mǝnana a ndanǝi, mana à po nǝ na gi Ɓakuli, a pwari mǝnana amǝkùrcau aɓwana-mǝgule amur ikǝlisiya tsǝko buia a muro ka.

15 Tsǝk amǝnia yì agir ka aɓa túró, pà ɓamuro kat a rǝia, anggo sǝ aɓwana kat nǝ̀ sǝn lidǝmba mo. 16 Yál ɓamúrò andǝ kanigir mò. Lidǝmba aɓa mǝnia ka, acemǝnana ɓǝ̀ a pâ anggo ka, awu nǝ amsǝ ɓamúrò andǝ aɓwana mǝnana à kǝ oeo ka.