Ɓaria Cauterǝa mala
BITƏRUS
Mǝncau
Ɓaria Cauterǝa mala Bitǝrus ka à gìlǝì aban ká a ban amǝkwaɗi arǝ a'ikǝlisiya pas ɓara-ɓara mǝnana à kutia ɓá ɓosǝkiban mala amǝ'ɓangnǝa mǝ'nyirì ka. Amǝnia yia amǝ'ɓangnǝa mǝ'nyirì ka, aɓwana na aɓalǝ amǝkwaɗi. À kutia kanigir mana kyanggi kanigir andǝ nggurcau mǝ'mǝsǝcau nì, mana à kùmô a bu amǝ'mishan mǝdǝmbe; yia amǝ'mishan mǝnana nǝ nggearǝia ka à sǝn Yesu sǝ à ok kanigir a kúni ka. Ɓariki mala mǝgilǝgir ka, kǝ earce tamsǝ túró mala amǝ kanigir nyirì man andǝ kiɗìkì mǝnana nǝ̀ yiu aɓa kanigir malea ka. Yia amǝ kanigir nyirì ka à tsǝk aɓea amǝkwaɗi à kutia ndali nǝ man tsǝa sǝ ba ado Kǝrǝsti malaká nyar raka, ɓǝ̀ kàngkàng nǝ̀ nyare nǝ̀ yiu ka. Mǝgilǝgir bǝlɓalǝi ama Mǝtalabangŋo ka kǝ dǝndi arǝ nyare male ɗang, sǝama nda rǝ pak munyi ace nyinggi koyan ngga njar ɓǝ̀ pǝlǝ nzǝmi arǝ acauɓikea male ɓǝ̀ pwanzali (2Bit 3:9.) Mǝgilǝgir kwarkir amǝkwaɗi ɓǝa dukdo mǝnana nǝ̀ pwasǝbum Ɓakuli ka. Amur mǝnana à nǝ̀ nggǝ kwaki kiria arǝ cau ɓalkiɓabum mǝnana à kwakia aɓa kutan ngga, amǝkwaɗi ɓǝa tsǝk ɗenyicau pepe arǝ cau mala Yesu sǝ ɓǝa nying Bangŋo Mǝfele ɓǝ̀ gingnǝ ɓabumia.
Agir mǝnana aɓalǝi ka
Tita cau1:1-2
Wu pwasǝbum Ɓakuli sǝ wu bwal kàngkàng arǝ Mǝsǝcau1:3-21
Wu yál rǝ wun arǝ Amǝ ɓangnǝa Mǝ'nyirì andǝ Amǝ kanigir Mǝ'nyirì2:1-22
Wu do aɓa gilǝrǝu acemǝnana Mǝtalabangŋo nǝ̀ yiu3:1-16
Masǝlǝata kwarkiru3:17-18
1
Makkun
1 Makkun mǝnana pur nǝ bu Shiman Bitǝrus, guro sǝ mǝ'mishan mala Yesu Kǝrǝsti.
Aban ká aban aɓwana mǝnana à kumǝna paɓamuru kǝla mǝnana sǝm ndanǝi ka, atàcau mala ɓealɓoarna mala Ɓakuli andǝ Mǝ'amsǝ sǝm Yesu Kǝrǝsti.
2 Ɓǝ̀ Ɓakuli pa wun ɓwamuru andǝ dorǝpwala kam kpǝm nǝ lidǝmba ma'wun aɓa súrǝ̀ Ɓakuli andǝ Yesu Mǝtala sǝm.
Do mala amǝkpata Kǝrǝsti
3 Ɓakuli aɓa rǝcandǝa male ka pana sǝm koya gìr mǝnana ɓoaro ɓǝ̀ sǝm pang nǝi ace do yilǝmu andǝ do ɓanggi Ɓakuli ka. Amǝnia yì agir ka Ɓakuli pà sǝmia kat lang sǝm yì súrǝ̀ Yesu mǝnana tunǝ sǝm ɓǝ̀ sǝm kum kāmbe aɓa gulo andǝ ɓoaro male ka. 4 Sǝ atàcau mala gulo andǝ ɓoaro male ka, ɓwamur sǝm pà sǝm aɓoro amǝgulke kǝ̀rkǝ́r andǝ amǝɓoarne mǝnana bang ama nǝ̀ pà ka. Pak mǝnia ka ace mǝnana nǝ amǝnia yì aɓoro ka, ɓǝ̀ sǝm kum kāmbe aɓa pa male mala do Ɓakuli, sǝ ɓǝ̀ sǝm apî kiɗikiban mala ɓanza mǝnana suno mǝɓane kǝ yinǝi ka.
5 Ace mǝnia ka, wu ɓariki, wu lùmsǝkún paɓamuru ma'wun nǝ pěmǝɓoarne; sǝ pěmǝɓoarne ka wu gbashite nǝ súrǝ̀gir; 6 súrǝ̀gir ka wu gbashite nǝ bwalrǝu; bwalrǝu ka wu gbashite nǝ gandǝrǝu; gandǝrǝu ka wu gbashite nǝ do ɓanggi Ɓakuli. 7 Sǝ do ɓanggi Ɓakuli ka wu gbashite nǝ ɗenyi nǝ aɓwana kǝla amǝ'eamrǝarǝu andǝ lǝmdǝ earcearǝu aban koyan ngga. 8 Ɓǝ̀ wu ndanǝ amǝnia yì aɓealu, sǝ à nǝ̀ nggǝ gul aɓalǝ wun ngga, pa wu nǝ̀ gatti aɓalǝ atúró ɗang, sǝ súrǝ̀gir ma'wun amur Mǝtala sǝm Yesu Kǝrǝsti ka, nǝ̀ duk gir mǝɓoarne andǝ gbasha aban aɓwana. 9 Sǝ ɓwa mǝnana pànǝ amǝnia yì aɓealu raka, dumǝna nte, kǝ sǝnban kuko ɗàng, sǝ ɓālǝi lorǝna ama à langŋǝ́nì wi acauɓikea male mǝ'ɗiɗyali.
10 Acemani ka, wun amǝ'eamrǝarǝu, wu pà rǝcandǝa arǝ lǝmdǝí ama ɓafo na wu nda aɓalǝ aɓwana mǝnana Ɓakuli tunǝia, sǝ tarkia ka. Ɓǝ̀ wu lidǝmba nǝ do aɓalǝ amǝno yì aɓealu ka, pà wu nǝ̀ kútí aɓa cauɓikea ɗang, sǝ paɓamuru ma'wun ngga nǝ̀ kum kusǝu came. 11 Anggo ka, sǝ Ɓakuli nǝ̀ mǝnba wun kunɓala wyang ace kutio aɓa Domurǝm mala Mǝtala sǝm andǝ Mǝ'amsǝ sǝm yì Yesu Kǝrǝsti, Domurǝm male mǝnana masǝlǝate pà kàm raka.
Tsǝkiru arǝ cau mala Malǝmce
12 Ace mani ka, mǝ ndanǝi a ɓabumam mǝ nggǝ kasǝɓalǝ wun koya pwari arǝ amǝnia yì acau ka, kat andǝ amani ama wu súrǝ́nia, sǝ wu tamsǝna kusǝ wun kàngkàng amur mǝsǝcau mǝnana wu angŋǝni ka. 13 Yàle a sǝne mem ngga, aɓa do mem kat aɓa mǝnia yì nggūrǝu ka, ɓoaro ɓǝn nggǝ kasǝɓalǝ wun. 14 Ən sǝlǝna ama pà nǝ̀ sau ɗang mǝ ndo mǝ nǝ ɗeki mǝnia yì do ɓanza ka, kǝla mǝnana Mǝtala sǝm Yesu Kǝrǝsti angŋǝna dǝmba lǝ́mdǝ́nàm ngga. 15 Sǝ mǝ nǝ ɓariki a koya njar ka, mǝ nǝ pak gìr mǝnana nǝ̀ tsǝa anzǝm mǝnana ǝn umǝna ka, ɓalǝ wun ɓǝ̀ kǝ kasǝa rǝ amǝnia yì agir ka ko aya pwari.
Cau amur ɓoarɓwa mala Kǝrǝsti
16 Cau mǝnana sǝm bangga wun amur rǝcandǝa andǝ yiu mala Mǝtala sǝm Yesu Kǝrǝsti ka, sǝm pà aban bangga wun njarnzǝne mǝnana ɓeɓwa pusǝì aɓa kutan ngga ɗàng. Nǝ nggearǝ mǝsǝ sǝm, sǝm sǝn tǎ mala ɓoarɓwa male. 17 Sǝm nda kam à kǝ banì mǝnana Ɓakuli Tárrú pe wi ɓoarɓwa andǝ gulo, pǝlǝa gi Ɓakuli pur nǝ ɓá mǝno yì tǎ mǝgule mala ɓoarɓwa ka, yiu a baní ama, <<Mǝnia ka, nda Munem mǝnana ǝn nggǝ earce ka, kǝ pwasǝ bumam kǝ̀rkǝ́r.>> 18 Nggearǝ sǝm ngga, sǝm ok mǝno yì giu pur nǝ kuli ka, acemǝnana sǝm nda kam atè amur nkono mǝfele.*1:18 Ɓalli gbal aɓa: Mat 17:1-5; Mar 9:2-7; Luk 9:28-35.
19 Amur mani ka, sǝm ndanǝ mǝsǝkang-kangŋa mǝnana kútì mǝno ka ama, cau mǝnana amǝ'ɓangnǝa hamnǝi ka mǝsǝcau na. Nǝ̀ dumnǝ ɓoaro, ɓǝ̀ wu tsǝkir wun arǝì, kǝla mǝnana wun nǝ̀ tsǝkir wun arǝ pitǝla mana kǝ tá aɓa pǝndǝa bà kwaro mala ban, sǝ nlero dǝmbari yi tana a ɓabum wun ngga. 20 Gìr mǝnana kutibanì kat ka, wu sǝlǝ ama ɓekǝ ɓangnǝa pa kàm aɓa Malǝmce mǝnana pur nǝ ɓá mǝngicau mala mǝɓangnǝa ka ɗàng. 21 Acemǝnana na gi Ɓakuli ka, kǝ pur aɓa kani mala mǝɓangnǝa ɗang. Amǝno yì amǝ'ɓangnǝa ka, Bangŋo Mǝfele na gingnǝia sǝ à nacau mǝnana pur nǝban Ɓakuli ka.
*1:18 1:18 Ɓalli gbal aɓa: Mat 17:1-5; Mar 9:2-7; Luk 9:28-35.