Mbula-Bwazza 2 Samuyila 23

Masǝlǝata acau mala Dauda

1 Amǝnia ka, à nda ka masǝlǝata acau mala Dauda:

Acau mǝnana à pùr a kún Dauda muna-ɓwabura mala Jeshi;

acau mala ɓwa mǝnana à loasǝi a buno gulo,

yì ɓwa mǝnana Ɓakuli mala Yakupu ɗārǝì ka,

yì mǝ'ngyal ɓoarna mala Isǝrayila:

2 Bangŋo mala Yahweh bangcau nǝ kunam,

cau male na a lasǝam.

3 Ɓakuli mala Isǝrayila nanacau,

Tali mala Isǝrayila nanàm ama,

<<Ɓwa mǝnana kǝ yálmúr aɓwana nǝ ɓealɓoarna,

mǝnana kǝ yálmúrû nǝ ɓanggi Ɓakuli ka,

4 nǝ̀ pa kǝla tǎlaban mala dǝmbari, lang pwari nǝ nggǝ eau ka,

dǝmbari mǝnana pànǝ apǝrɓang raka,

lang lolloapì bondo nǝ nggǝ to a nzali,

aɓa tā-pwari anzǝm nya mala mbulo ka.

5 Aɓa mǝsǝcau ka, anggo sǝ ɓala mem pa aban Ɓakuli re?

Yì ka kutina aɓa kùrcau nǝ mim,

pàcau mǝnana málá male pà kàm raka,

kùrcau mǝnana gilǝkice aɓa koyagir, sǝ kwakite kàngkàng ngga.

Mǝno nda amsǝban mem kat,

andǝ suno mem kat.

Pà nǝ̀ tsǝì ɓǝ̀ gul re?

6 Sǝama amǝ'ɓealɓikea ka, à nda kǝla azwe mǝnana à nǝ̀ sukkia ka,

acemǝnana kǝɓwa pa nǝ̀ jea nǝ bui ɗàng.

7 Ɓwa mǝnana nǝ̀ jea ka,

dumǝna púp nǝ̀ kùr rǝi nǝ gara-bolo ko gara nzo.

Sǝ à nǝ̀ pisǝia a bǝsa kàng a kǝ banì.>>

Akanggǝrang aburana mala Dauda

8 Amǝnia ka, à nda ka alullǝ akanggǝrang aɓwana mǝnana Dauda ndanǝia ka: Joshep-Basshebet ɓwa Tachemon, nda mǝdǝmba mala amǝgulo-lwa, sǝ à tunǝi ɗǝm ama Adino, ɓwa Ezni; wal-lú aɓwana gbǝman-tongno-nong-tàrú (800) aɓa lwa mwashat.

9 Ɓwa mǝnana kpate ka, nda Eleaza muna-ɓwabura mala Dodo, muna-ɓwabura mala Ahohi; nda mwashat atà akanggǝrang amǝ'lwa tàrú mana atà Dauda, lang à cam kàngkàng a kún amǝ'Filisti mǝnana à yi ramba abanɓwáná ace lwa, sǝ aburana mala Isǝrayila nyar nǝtea ka. 10 Yì ka, lo sǝ wal amǝ'Filisti ba aulǝa pàkki wi, gandǝa buì shiuri arǝ nggeabyau; sǝ a mǝno yì pwari ka, Yahweh yinǝ limurǝm mǝgule; sǝ lang amǝ'lwa nyare à yiu anzǝmi ka, kǝ gìr mǝnana à pàk ka, nda pwan gǝna-lwa mala aɓiu-mǝbura mǝnana à wal-luia ka.

11 Sǝ Shamma muna-ɓwabura mala Agi ɓwa Harar kpa. Lang amǝ'Filisti ram rǝia abanɓwáná a Lehi a ban ɓè ɓaban mǝnana lùmsǝ nǝ gwalong ngga, acili amǝ'lwa mala Isǝrayila ɓanggi amǝ'Filisti. 12 Sǝama yì Shamma ka cam a tsùrú mala ɓabanì, munǝ ace, sǝ wal amǝ'Filisti, sǝ Yahweh yinǝì Isǝrayila limurǝm mǝgule.

13 Pǝlǝa akanggǝrang amǝ'lwa mǝnia tàrú aɓalǝ amǝgulo lumi-tàrú mala amǝ'lwa ka, à sulǝo sǝ à yiu aban Dauda a gumi-ɓa'tali mǝnana a Adulam ngga nǝ kún pwan-gìrɓaban, a bàkú mǝnana amǝ'lwa mala amǝ'Filisti duk-katti a ɓangŋaban Refayim ngga. 14 A mǝno yì bàkú ka, Dauda na a kanggǝrang-ban, sǝ amǝ'Filisti ka, à angŋa Betalami sǝ à tamsǝna ɓè nggǝsan mala amǝ'lwa malea abanì. 15 Sǝ Dauda ɓua mǝsamur kǝ̀rkǝ́r, na ama, <<Mǝsamur mala mùr tūli-mùr mǝnana a kún là mala Betalami ka, walnam kǝ̀rkǝ́r. Mǝ nǝ earce, ɓǝ̀ ɓeɓwa nǝ̀ ɗàrǝa nǝ̀ pàm ngga!>> 16 Akanggǝrang amǝ'lwa man tàrú ka, à ar nǝɓalǝ amǝlwa mǝnana aɓa kàttì mala amǝ'Filisti ka, à kya ɗàrǝ́ mùr a tūli-mùr mǝnana a kún là mala Betalami ka, sǝ à twali à yinǝì Dauda. Sǝama ɓinǝ nuie; solǝi a nzali aɓadǝm Yahweh. 17 Bang ama, <<Ɓǝ̀ sappi banam, Yahweh, mǝnana ɓǝn nu mùr man ngga! Mǝnia ka nkila mala aburana na mǝnana à twal yilǝmia a kún buia ka re?>> Acemani ka, Dauda nu mùrnî ɗàng. Akanggǝrang aburana man tàrú ka, à na à pàk amǝnia yì agir ka.

18 Abishai, mǝ'eam Jowap, muna-ɓwabura mala Zeruya nda ɓwamǝgule amur amǝ'lwa mǝno lumi-tàrú ka. Pàktúró nǝ kaɗa male a munǝo arǝ aburana gbǝman-tàrú (300), sǝ wal-luia, sǝ kum lullǝu atà akanggǝrang amǝlwa mǝno tàrú ka. 19 Yì na mǝnana lullǝì zǝ́kí kútì mala aɓwana man lumi-tàrú ka, acemani ka, à twali pǝlǝ mǝ'sàrǝ̀ban amuria; sǝama, à ɓalli aɓalǝ amǝ'lwa man tàrú ka ɗàng.

20 Benaya muna-ɓwabura mala Jehoyada ka, kanggǝrang ɓwa na mǝnana pur a Kabzil ka; pàkki agir gyambǝliban mǝgulke. Yì na mǝnana wal amuna-burana ɓari mala Ariyel ɓwa Mowap ka. Ɗǝm ngga, a pwari mana talimbulo kpani ka, sulǝ atà im aɓa tūli, sǝ wal-luí kàm. 21 Wal-lú ɓè ɓwa'Masar, kaɓa ɓwa. Ɓwa'Masar mǝno ka, ndanǝ nkongŋo a bui, sǝama Benaya sulǝ atè nǝ gara-kwalta, ak nkongŋo a bu ɓwa'Masarnî, sǝ wal-luí nǝi. 22 Amǝno ka, à nda ka agir mǝnana Benaya muna-ɓwabura mala Jehoyada pea ka, sǝ kumbi ɓamúrì lullǝu atà akanggǝrang amǝ'lwa mǝno tàrú ka. 23 Lullǝì zǝ́kí kútì mala aɓwana man lumi-tàrú ka, sǝama bwalta amǝno tàrú ka ɗàng. Sǝ Dauda twali tsǝì, duk ɓwamǝgule amur amǝ'yáltè.

24 Aɓea aɓwana aɓalǝ aɓwana mǝno lumi-tàrú ka, à nda ka:

Asahel mǝ'eam Jowap;

Elhanan muna-ɓwabura mala Dodo ɓwa Betalami;

25 Shamma ɓwa Harot,

Elika ɓwa Harot;

26 Helez ɓwa Palti;

Ira muna-ɓwabura mala Ikkesh ɓwa Tekowa;

27 Abiyeza ɓwa Anatot;

Mebunayi ɓwa Hushati;

28 Zalmon ɓwa Ahohi;

Maharayi ɓwa Netofa;

29 Helep muna-ɓwabura mala Baana ɓwa Netofa;

Ittayi muna-ɓwabura mala Ribayi ɓwa Gibiya mala bu-nzali Benjami;

30 Benaya ɓwa Piraton;

Hiddayi ɓwa mala amealmur Gaash;

31 Abi-albon ɓwa Arbati;

Azǝmavet ɓwa Barhum;

32 Eliyaba ɓwa Shaalboni;

amuna-burana mala Jashen;

sǝ Jonatan;

33 Shamma ɓwa Harar;

Ayiyam muna-ɓwabura mala Sharar ɓwa Arar;

34 Elifelet muna-ɓwabura mala Ahasbayi, muna-ɓwabura mala ɓwa Ma'aka;

Eliyam muna-ɓwabura mala Ahitofel ɓwa Gilo;

35 Hezǝro ɓwa Kamel;

Pa'arayi ɓwa Arbi;

36 Igal muna-ɓwabura mala Natan ɓwa Zoba;

Bani ɓwa Gad;

37 Zelek ɓwa Amon;

Naharayi ɓwa Beerot, mǝ-bwal-agirmunǝo mala Jowap muna-ɓwabura mala Zuriya;

38 Ira ɓwa Itǝri;

Garep ɓwa Itǝri;

39 sǝ Yuriya ɓwa Hitti. Yià kat ka, à nda lumi-tàrú bwamdǝ tongno-nong-ɓari (37).