Ɓaria Cauterǝa mala Bulǝs aban ká a ban
AMƏ TASALONIKA
Mǝncau
Zuriki mala ɗenyicau amur cau mala nyare yiu mala Kǝrǝsti ka, lidǝmba nǝ kúnɓuàna aɓa ikǝlisiya mǝnana a Tasalonika ka. Ɓaria Cautera mala Bulǝs aban ká aban Amǝ Tasalonika ka, bang cau amur twale mala aɓwana mǝnana ama, pwari yiu mala Mǝtalabangŋo ka angŋa dǝmba yina. Bulǝs gilǝki mǝnia yì cau à ne anggo ka, aban lǝmdǝia aɓwana ama, kaniama Kǝrǝsti nǝ̀ nyare nǝ̀ yiu ka, túró mǝɓane andǝ ɓealɓikea ka à nǝ̀ ká a dǝmba à nǝ̀ ngga ɓiki pa aɓata nggwamnati mala ɓeɓwa mǝnana nda aɓa sǝmbǝrǝa, à tunǝki ama <<Ɓwa mala Cauɓikea>>, mǝnana nǝ̀ ɓínǝì Kǝrǝsti ka.
Yì, mǝ'mishan ngga, tsǝkcau nǝ rǝcandǝa ama ndanǝ ɓoaro aɓwana mǝnana à kǝ ɓal mǝnia yì cau ka, ɓǝa tamsǝ kusǝia aɓa paɓamuru malea, ko ɓǝa kutia do ká-mǝɓane andǝ nutanni ka, ɓǝa kǝ pak túró nǝ buia ace linǝ ɓamuria kǝla mǝnana Bulǝs andǝ aɓi amǝtúró pak ka, sǝ ɓǝa lidǝmba nǝ do pěmǝɓoarne.
Agir mǝnana a ɓālǝi ka
Mǝncau1:1-2
Ɓwangsǝban andǝ lǝmdǝ earnǝban1:3-12
Akwarkiru amur yiu mala Kǝrǝsti2:1-17
Cau ɓakɓabum amur do nǝ ɓealu mala Kǝrǝsta3:1-15
Masǝlǝatacau3:16-18
1
Makkun mala Bulǝs
1 Mǝnia yì cauterǝa ka, pur nǝban Bulǝs andǝ Silas andǝ Timoti.
Aban ká aban ikǝlisiya mala amǝ Tasalonika, aɓwana mala Ɓakuli Tár sǝm andǝ Mǝtalabangŋo Yesu Kǝrǝsti.*1:1 Ɓalli gbal aɓa: Atúró 17:1. 2 Ɓǝ̀ ɓwamuru andǝ dorǝpwala mala Ɓakuli Tár sǝm andǝ Mǝtalabangŋo Yesu Kǝrǝsti, do atà wun.
Ɓakɓabum aɓa tanni
3 Wun amǝ'eam sǝm, dumǝna sǝm púp ɓǝ̀ sǝm nggǝ ɓwangsǝ Ɓakuli a koya pwari, ace wun, sǝ anggo ka ndanǝ ɓoaro acemǝnana paɓamuru ma'wun ngga, nda rǝ lidǝmba kǝ̀rkǝ́r, sǝ earcearǝu mǝnana wu ndanǝi arǝarǝ wun ngga ndarǝ gulo. 4 Ace mani ka, sǝm nǝ́ ɓamur rǝ sǝm ngga, sǝm nggǝ jali nǝ wun aban a'ikǝlisiya mala Ɓakuli. Sǝm nggǝ jali ace came ma'wun kàngkàng andǝ paɓamuru ma'wun aɓalǝ apatanni mǝnana wu kǝ kúmô, andǝ adomǝkwane mǝnana wu kǝ dumnǝ gandǝrǝu aɓalǝia ka.
5 Amǝnia ka à lǝmdǝ ama Ɓakuli kǝ pak ɓashi male nǝ mǝsǝcau, sǝ a masǝlǝate ka nǝ̀ tsǝk wun wu nǝ̀ duk aɓwana mǝnana à kàrǝ́na à nǝ̀ kutia Domurǝm male mǝnana wu kǝ nu tanni ace ka. 6 Ɓakuli ka, mǝ'mǝsǝcau na: Nǝ̀ yia mbwe ka aɓwana mǝnana à kǝ pa wun tanni ka, nǝ tanni, 7 sǝ wun mǝnana wu kǝ nu tanni ka nǝ̀ yia pa wun usǝlǝo sǝ nǝ̀ pa sǝm gbal. Nǝ̀ yia pak mǝnia ka a pwari mǝnana Mǝtalabangŋo Yesu nǝ̀ yia pusǝna rǝì nǝi nǝ kuli aɓa bǝsa mǝ earke, nǝ amǝturonjar mǝcandǝe male atè. 8 Nǝ̀ yia ɓasha aɓwana mǝnana kat à súrǝ̀ Ɓakuli raka, andǝ amana à ɓinǝ kpata Cau Amsǝban mala Mǝtala sǝm Yesu ka. 9 Yia ka, à nǝ̀ pea wia tanni mala kiɗikiban mǝnana málá male pà kàm raka. À gauwuni tārǝia andǝ Mǝtalabangŋo andǝ tá mala rǝcandǝa male†1:9 Ɓalli gbal aɓa: Isha 2:10. 10 a pwari mǝno nǝ̀ yiu nǝi ace ak gulo andǝ ɓwangsǝkiban a bu aɓwana male mǝnana tària andǝ amǝnana kat à pà ɓamuria a baní ka. Wun gbal ka wu nǝ̀ pa aɓalǝia, acemǝnana wu earnǝ cau mǝnana sǝm bangga wun amurí ka.
11 Nda gir mǝnana tsǝa koya pwari ka, sǝm nggǝ pakka wun hiwi. Sǝm nggǝ zǝmbi Ɓakuli ɓǝ̀ tsǝk wun, ɓǝ̀ wu dukdo mǝnana karǝ arǝ ulang do mǝnana tunǝ wun ace ka, sǝ ɓǝ̀ pa wun rǝcandǝa mala lùmsǝ pakki agir mǝɓoarne mǝnana kat paɓamuru ma'wun tsǝk wun a pě ka. 12 Anggo ka, lullǝ Mǝtala sǝm Yesu nǝ̀ kum gulo nǝban wun, sǝ wu nǝ̀ kum gbal nǝbaní, nǝ ɓwamuru mala Ɓakuli ma'sǝm andǝ Mǝtalabangŋo Yesu Kǝrǝsti.