Ɓaria cauterǝa mala Bulǝs aban ká a ban
TIMOTI
Mǝncau
Cautera mǝnia ka nda Ɓaria Cauterǝa mala Bulǝs aban ká a ban Timoti. Gilǝî Timoti, muni aɓa paɓamuru a ban Kǝrǝsti lang nda aɓa kùrban a Roma a masǝlǝata túró male, tù nǝ lú male a pǝlǝa 67 ko 68 anzǝm ɓǝl Yesu.
Yì cauterǝa ka, kwarkiru na ace Timoti, kǝla muntulo mǝnana ɓimǝturo na sǝ gbasha male na ka. Kwarkiri ace ɓak ɓabumi ɓǝ̀ dum nǝ gandǝrǝu aɓa nutanni, sǝ ɓǝ̀ lidǝmba nǝ túró mana yì Bulǝs pè ace Kǝrǝsti ka. Ɓǝ̀ bwal kanigir mǝ'mǝsǝcau nì mala Cau Amsǝban andǝ Kùrcau Mǝ'e, sǝ ɓǝ̀ pak túró male kǝla mǝkànìgìr andǝ mǝhama, ɓǝ̀ kǝa ɓanggi tanni ko ɓinǝcau nǝban aɓwana ɗàng, sǝama ɓǝ̀ ɓanggi kanigir nyir. À nunkiri arǝ agir ká-mǝɓane mala masǝlǝata apwari.
Aɓa mǝnia kat ka, à kasǝ ɓalǝ Timoti arǝ do andǝ tǝr pakkiagir mala ɓwa mana gilǝ mǝnia yì cauterǝa ka: paɓamuru male andǝ munyi, andǝ earcearǝu, andǝ gandǝrǝu, andǝ nutanni male aɓa kum patanni.
Agir mǝnana aɓalǝi ka
Mǝncau1:1-2
Ɓwangsǝban andǝ Ɓakɓabum1:3--2:13
Kwarkiru andǝ nunkiru2:14--4:5
Gìr mǝnana Bulǝs nda aɓalǝi ka4:6-18
Masǝlǝatacau4:19-22
1
Makkun mala Bulǝs
1 Man yì cauterǝa ka, pur nǝ banam Bulǝs, mǝnana Ɓakuli nǝ nggearǝì twalam ɓǝ̀n duk mǝ'mishan mala Kǝrǝsti Yesu ka. Ɓakuli tasǝam ɓǝ̀n hamnǝ ce pàcau mala yilǝmu mǝnana sǝm ndanǝi aɓa kpapi ma'sǝm sǝnǝa Kǝrǝsti Yesu ka.
2 Mǝ nda ban gilǝì Timoti munem mǝnana ǝn earkiyi ace raka.*1:2 Ɓalli gbal aɓa: Atúró 16:1.
Ɓǝ̀ Ɓakuli Tárrû, andǝ Kǝrǝsti Yesu Mǝtala sǝm, lǝmdǝo ɓwamuru, ɓǝ̀ sǝn tǝ̀r mò, sǝ ɓǝ̀ cio wu kum dorǝpwala.
Ɓakɓabum ace do nǝ mǝsǝcau
3 Du andǝ pwari ka, ǝn nggǝ ɗenyi nǝ we aɓalǝ ahiwi mem. Ən nggǝ pakki Ɓakuli yàwá, yì Ɓakuli mǝnana ǝn nggǝ kpate nǝ ɓabum mǝɓoarnsari, kǝla mǝnana akêm pàk ka. 4 Ɓǝ̀ ǝn ɗenyi nǝ mǝrǝm mǝnana a sukki a pwari gauwa ma'sǝm ngga, nzal sǝno kǝ pakkam. Ban nǝ̀ ɓoaram kǝ̀rkǝ́r, yi mǝnana ɓǝ̀ sǝm kum ɓamur rǝ sǝm a tarǝ sǝm ɗǝm ngga. 5 Ən nggǝ ɗenyi nǝ paɓamuru mò mǝɓafoe a ban Mǝtalabangŋo kǝla ulang pě mala keò mǝ'mɓwamae, yì Loyis andǝ nggo Yunis, sǝ ǝn sǝlǝna nǝma a ndarǝ lidǝmba aɓa mǝno yì paɓamuru ka nǝ rǝcandǝa. 6 Ace mani ka ǝn nggǝ kasǝ ɓālǝo ama, ɓoro mala Bangŋo mǝnana Ɓakuli po a pwari mǝnana ǝn tsǝk abuam a muro ka, lo tsǝì aɓa túró nǝ pi mala ɓabum. 7 Acemǝnana Bangŋo mana Ɓakuli pa sǝm ngga, mala ɓangciu na ɗang. Bangŋo mǝnana pa sǝm ngga, mala rǝcandǝa na andǝ earcearǝu andǝ bwalɓamuru. 8 Ace mani ka, ce kǝsǝkya pakko arǝ banggia aɓwana cau amur Mǝtalabangŋo ɗàng. Sǝ ce kǝsǝkya pakko arǝàm gbal ɗàng, kat andǝ amani ama mǝ nda a ndàkurban ace Kǝrǝsti ka. Nǝ rǝcandǝa mǝnana Ɓakuli po ka, dum nǝ kùr rǝǔ ace nutanni atàm ace hamnǝ Cau Amsǝban. 9 Ɓakuli amsǝ sǝm, sǝ tunǝ sǝm ɓǝ̀ sǝm duk aɓwana male amǝ fele.†1:9 sǝ tunǝ sǝm ɓǝ̀ sǝm dukdo tàr ɓamuru aceì. Ko <<sǝ tunǝ sǝm ɓǝ̀ sǝm duk aɓwana male.>> Pa ace atúró mǝnana sǝm pak ka ɗàng, nda àkǝ̀ ce male yì kani mana pusǝ sǝm ace ka, andǝ ɓwamuru male. Pà sǝm mǝnia yì ɓwamuru ka nǝ bu Kǝrǝsti Yesu sǝ yi kwakita ɓanza.‡1:9 Ɓalli gbal aɓa: 1Bit 1:3; Afi 2:5,8. 10 Sǝ ado ka, lǝmdǝna sǝmi bwāng nǝ yiu mala Kǝrǝsti Yesu, Mǝ'amsǝ sǝm, mǝnana ɓun rǝcandǝa mala lú, pǝlǝa lǝmdǝa sǝm njar mala yilǝmu mǝnana málá male pà kàm raka, aɓa Cau Amsǝban. 11 Sǝ Ɓakuli twalam ɓǝ̀n duk mǝ hamnǝ cau male, andǝ mǝ'mishan, andǝ mǝkànìgìr mala mǝnia yì Cau Amsǝban.§1:11 Ɓalli gbal aɓa: 1Tim 2:7. 12 Nda gìr mǝnana tsǝa sǝ ǝn nggǝ nu tanni kǝla mǝno mǝ nda aɓalǝi ka. Sǝ mim ngga, kǝsǝkya kǝ pakkam arǝ mani ɗàng, acemǝnana ǝn súrǝ́nà rǝ ɓwa mǝnana ǝn gūlì arǝì, sǝ ǝn sǝlǝna ama gìr mǝnana ǝn nyingŋǝni wi a buì ka, nǝ̀ gandǝ bwale bà pwari nyare male.
13 Bwal kanigir mǝɓafoe mǝnana a kanì a banam ngga, ɓǝ̀ dupo gìrkànì mǝnana a nǝ kpate ka, sǝ pè aɓa paɓamuru andǝ earcearǝu mǝnana ndakam aɓa Kǝrǝsti Yesu ka. 14 Tsǝk kiro arǝ cau mǝ'mǝsǝcau nì, mǝnana à po a buo, nǝ rǝcandǝa mala Bangŋo Mǝfele mǝnana do a ɓabum sǝm ngga.
15 Kǝla mǝnana a sǝlǝna ka, aɓwana mǝnana a bu-nzali Asiya ka, à pǝlǝna nzǝmia arǝàm kat à nyìngŋǝ̀nam. Ko nggearǝ Fijelus andǝ Hamojenis gbal ka, à nyìngŋǝ̀nam.
16 Ɓǝ̀ Ɓakuli lǝmdǝì Onisǝforǝs andǝ amǝ ɓala male ɓwamuru, acemǝnana kǝ yiu a banam tùtù, sǝ kǝ ɓak ɓabumam, sǝ ko kǝsǝkya pakki wi arǝàm acemǝnana mǝ nda aɓa nsolo ka ɗàng. 17 Yiu male a Roma ka, altam kǝ̀rkǝ́r, gandǝa yi kumam. 18 Ɓǝ̀ Ɓakuli lǝmdǝì wi ɓwamuru ɓǝ̀ kum earmúrú a pwari nyare yiu mala Kǝrǝsti. Sǝ we ka a sǝlǝna rǝ ulang gbasha mǝnana pam a Afisu ka.