6
1 Pǝlǝa Yahweh ne Musa ama, <<Ado ka, awu nǝ sǝn gìr mǝnana mǝ nǝ pàkkî Firona ka: Mǝ ndo mǝ nǝ tsǝì nǝ rǝcandǝa mem ɓǝ̀ nying aɓwana mem ɓǝà o. Yàle yì ka, nǝ̀ pǝria nǝ pǝra, ɓǝà upi nzali male.>>
2 Nyare Ɓakuli ne Musa cau ama, <<Mǝ nda Yahweh.*6:2 Lùllǝú mǝnia ama Yahweh ka nda gbal à kǝ̀ tunǝi ama, <<Jehovah.>> Aɓa nyesǝ cau mǝnia ka à tunǝi ama <<Mǝtalabangŋo.>> 3 Ən lǝmdǝ rǝàm aban Ibǝrayim, aban Ishaku, sǝ aban Yakupu, ama, Mǝ nda Ɓakuli mǝnana Kar Ban Kat nǝ Gulo ka.†6:3 Ɓakuli mǝnana Kar Ban Kat nǝ kún Ibǝru ka nda <<El-Shaddai.>> Sǝama lùllǝàm mǝnana ama Yahweh ka, ǝn lǝmdǝia wia à súrǝàm nǝi ɗàng. 4 Ɗǝm ngga ǝn kúti aɓa kùrcau sǝnǝia ama, mǝ nǝ pea wia nzali Kan'ana, yì nzali mǝnana à duk kam kǝla abǝri ka. 5 Sǝ adyan ngga, ǝn ongŋǝna imge mala amǝ Isǝrayila mǝnana amǝ Masar tsǝia aguro ka, sǝ ɓalǝam kasǝna arǝ kùrcau mem.
6 <<Acemani ka, kyane banggi amǝ Isǝrayila ama, <Mǝ nda Yahweh. Mǝ nǝ amsǝ wun ɓǝ̀ wu purî ɓá nggea kanggǝrang tanni mǝnana amǝ Masar tsǝk wun aɓalǝi ka. Mǝ nǝ pusǝ wun aɓata doguro aɓatea, sǝ mǝ nǝ akmúr wun nǝ kaɓa rǝcandǝa mem andǝ lǝmdǝ atúró mǝgule mala ɓashi amur amǝ Masar. 7 Mǝ nǝ ak wun, wun nǝ̀ duk aɓwana mem, sǝ mǝ nǝ duk Ɓakuli ma'wun. Sǝ wun nǝ̀ sǝlǝ ama Mǝ nda Yahweh, Ɓakuli ma'wun, mǝnana pusǝ wun wu purî ɓá nggea kanggǝrang tanni mǝnana amǝ Masar tsǝk wun aɓalǝi ka. 8 Sǝ mǝ nǝ yinǝ wun a nzali mana ǝn kángìr nǝma mǝ nǝ pè Ibǝrayim, andǝ Ishaku, andǝ Yakupu ka. Mǝ nǝ pà wuni ɓǝ̀ duk girkuma ma'wun. Mǝ nda Yahweh!> >>
9 Anggo sǝ Musa nea amǝ Isǝrayila cau, sǝ yia ka à kwakikiria arǝì ɗàng, ace ɓungio mana ɓabumia ɓungi ka andǝ tanni mǝcandǝe mǝnana à nu aɓata túró-guro mǝɓike ka.
10 Pǝlǝa Yahweh banggi Musa ama, 11 <<Nyare, kyane aban Firona, murǝm Masar, kya ne wi ama, ɓǝ̀ nying amǝ Isǝrayila ɓǝà purî ɓá nzali male.>>
12 Sǝ Musa ka nyesǝî Yahweh cau ama, <<Nggearǝ amǝ Isǝrayila, yì aɓwana mem ngga à kwakikiria arǝàm rakâ, sǝ lang sǝ Firona nǝ̀ kwakikiri arǝàm, mim mǝnana ǝn nggǝ gandǝ nacau pepè raka?>>
13 Yahweh nacau nǝ Musa andǝ Haruna sǝ tasǝia nǝ cau aban amǝ Isǝrayila, sǝ aban Firona murǝm Masar, ɓǝà panzǝ amǝ Isǝrayila ɓǝà purî ɓá nzali Masar.
Tǝ́r tàu mala Musa andǝ Haruna
14 Amǝnia ka à nda ka kau mala atau a nggurkwar mala Musa andǝ Haruna:
Amuna-burana mala Ruben, muna-dǝmba mala Isǝrayila ka à nda ka:
Hanok, andǝ Palu, andǝ Hezǝron, sǝ Karmi. À nda ka kau a nggurkwar mala Ruben.
15 Amuna-burana mala Shimiyon ngga à nda ka:
Jemuyel, andǝ Jamin, andǝ Ohat, andǝ Jakin, andǝ Zohar, sǝ Shawul muna mala ɓwama Kan'ana. À nda ka kau a nggurkwar mala Shimiyon.
16 Amǝnia ka, à nda ka lullǝ amuna andǝ amǝkau mala Lawi, arǝ aɓala malea, sǝ arǝ anza malea:
Gashon, andǝ Kohat, sǝ Merari. Sauwa mala do ɓanza mala Lawi ka, apǝlǝa gbǝman mwashat nǝ lumi-tàrú nǝ mǝsǝi tongno-nong ɓari na (137).
17 Amuna-burana mala Gashon ngga à nda ka:
Libǝni andǝ Shimeyi, koyan ngga a nggurkwar male.
18 Amuna-burana mala Kohat ka à nda ka:
Amram, andǝ Izǝhar, andǝ Hebǝron, sǝ Uziyel. Sauwa mala do ɓanza mala Kohat ka apǝlǝa gbǝman mwashat nǝ lumi-tàrú nǝ mǝsǝi tàrú na (133).
19 Amuna-burana mala Merari ka, à nda ka:
Mali andǝ Mushi.
Aɓwana mǝno kat à tsaɗi lullǝia ka à pur a tàu mala Lawi; à tsaɗia arǝ anza malea.
20 Amram al Jochebet mǝ'kyauwa tárrí, sǝ ɓǝli wi amuna-burana ɓari:
Haruna andǝ Musa. Sauwa mala do ɓanza mala Amram ngga pǝlǝa gbǝman mwashat nǝ lumi-tàrú nǝ mǝsǝi tongno-nong ɓari na [137].
21 Amuna-burana mala Izǝhar ka à nda ka:
Kora, andǝ Nefeg, sǝ Zǝkiri.
22 Amuna-burana mala Uziyel ka à nda ka:
Mishayel, andǝ Elzafan, sǝ Sitǝri.
23 Haruna al Elisheba, nsarile Aminadap sǝ mǝ'eam Nashon. Elisheba ɓǝlî wi amuna-burana, à nda ka:
Nadap, andǝ Abihu, andǝ Eleaza, sǝ Itamar.
24 Amuna-burana mala Kora ka à nda ka:
Asir, andǝ Elkana, sǝ Abiyasaf. À nda ka kau a nggurkwar mala Kora.
25 Eleaza muna-ɓwabura mala Haruna ka yi al mwashat atà ansarina mala Putiyel, sǝ ɓǝli wi muna-ɓwabura male:
Finehas.
Amǝno ka à nda ka aká aɓwana andǝ amǝɓala malea a tàu mala Lawi, koyan ngga a nggurkwar male.
26 Haruna andǝ Musa mǝnana à tunǝ lullǝia a tsadya mala alullǝu kani ka, à nda mǝnana Yahweh bangcau nǝia ka ama, <<Wu pusǝ amǝ Isǝrayila ɓǝà purî ɓá nzali Masar, koya tàu ka a nggǝsan malea a nzǝmarǝia.>> 27 Kǝ yià, Musa andǝ Haruna mǝnia ka, à nda ka aɓwana mana à bangcau nǝ Firona, murǝm Masar ace pusǝ amǝ Isǝrayila ɓǝà purî Masar ka.
Yahweh bangcau nǝ Musa andǝ Haruna
28 A pwari mana Yahweh bangcau nǝ Musa a nzali Masar ka, 29 Yahweh ne wi ama, <<Mǝ nda Yahweh. Banggi Firona murǝm Masar gìr mana kat ǝn banggo ka.>>
30 Sǝ Musa ka na a ɓadǝm Yahweh ama, <<Sǝni, ǝn sǝlǝ nacau ɗàng; lang sǝ Firona nǝ̀ kwakikiri arǝàm?>>