15
Ɓwangsǝban aban Ɓakuli
1 Pǝlǝa Musa andǝ amǝ Isǝrayila tùkî Yahweh mǝnia yì nggyal ka, ama:
<<Mǝ nǝ tùkî Yahweh nggyal,
acemǝnana linamurǝm,
nggea limurǝm mǝgule.
Apǝr andǝ amǝ'koea ka,
kongsǝnia aɓa nggeamùr.
2 Yahweh ka nda rǝcandǝa
andǝ nggyal mem.
Yì nda ɓwa mǝnana amsǝam ngga.
Yì nda Ɓakuli mem,
mǝ nǝ ɓwangsǝki,
Ɓakuli mala tárrám,
mǝ nǝ tu-nggyal ace gulo male!
3 Yahweh ka mǝ'lwa na;
Yahweh nda lùllǝì.
4 <<Awaru-lwa andǝ amǝ'lwa mala Firona ka
ramnateà aɓa nggeamùr.
Akanggǝrang amǝ'sàrǝ̀ban mala amǝ'lwa male ka à kongsǝnia aɓa Nggeamùr Nzuno
5 Mùr-lìma kongsǝna múrià;
à kò a tàmùr kǝla tali.
6 We Yahweh, buo mǝlì ka ndanǝ rǝcandǝa mǝgule.
Nǝ buo mǝlì, we Yahweh sǝ a arki ɓimǝbura,
a mesǝki mwashat-mwashat.
7 Aɓa gulo mala ɓoarɓwa mò sǝ a makki aɓwana mana à mgbicau arǝò ka.
A so bumlulla mò mǝ'earke,
pisǝia n'hāun kǝla pǐ mala lusung.
8 Aɓa bumlulla mò a loasǝ gung mǝnana tsǝk mùr yi ramgi amurǝarǝia gum-gum ngga;
mùr-gùla cam pǝrapǝra kǝla sheran;
mùr-lìma shiuri a tàban aɓa nggeamùr,
9 sǝ ɓimǝbura na ama, <Mǝ nǝ pǝrtea, mǝ nǝ nggá kasǝmurià.
Mǝ nǝ gau gǝna malea, sǝ mǝ twal gìr mǝnana ǝn earkiyice ka;
mǝ nǝ kwetǝ nggeabyau mem, sǝ buam nǝ̀ twaltea.>
10 We Yahweh, bumo lúllô, a tsǝk gung mò ɓua,
sǝ amǝ Masar ko kat a mùr;
à kò kǝla bolo-dànà a gbǝlwan mùr.
11 Yana ɓwe kǝla we, We Yahweh, aɓalǝ aɓakuli kat?
Yana ɓwe kǝla we mǝnana ndanǝ ɓoarɓwa aɓa fele,
andǝ gulo mǝ'kàrmuruî,
sǝ kǝ pa ndali aɓa túró ka?
12 A loasǝ buo mǝlì
sǝ nzali myal aɓisǝm amǝbura.
13 <<Aɓa earcearǝu mô mǝnana kǝ nggaɗi raka,
a gingnǝ aɓwana mô mǝnana a amsǝia ka.
Aɓa rǝcandǝa mò, a kàrnǝia
aban ká nzali mô mǝfele.
14 Anzali ɓanza okce gìr man,
sǝ rǝia ɓǝl nǝ ɓangciu.
Aɓwana mǝnana à do a nzali Filisti ka,
ǝn'ò bwalia.
15 Amurǝma mala nzali Edom ngga,
à gǝggǝli.
Akanggǝrang aburana mala nzali Mowap ka,
ɓabumia tù mùr.
Amǝ Kan'ana ka yilǝmia o ace ɓangciu;
16 ǝn'ò andǝ kàrmúrû sulǝo amuria.
À sǝn rǝcandǝa mò, we Yahweh
sǝ à cam yak nǝ ɓangciu,
sheɓǝ̀ aɓwana mô gingŋǝ́na à yi kutina ka,
yì aɓwana mô mǝnana a akmúria à purî do guro ka.
17 Awu nǝ yinǝia, sǝ awu nǝ dumsǝia amur nkono mǝnana girkuma mò na ka,
yì ban mǝnana we Yahweh,
a tárì ɓǝ̀ do nda bando mô ka,
yì Tara-mǝfele mǝnana we nǝ nggearǝo a loasǝi ka.
18 We Yahweh a nda murǝm,
málá male pà kàm ɗàng.>>
19 Amǝ Isǝrayila gya à kùtí nǝ ɓá nggeamùr amur nzali mǝ'ime. Sǝ lang awaru-pǝr andǝ apǝr mala amǝ Masar andǝ amǝ'koea kùtí aɓa nggeamùr ka, Yahweh nyesǝ mùr nǝ te yi kongsǝ múrià. 20 Miriyam māɓangnǝa, muna-ɓwama mǝ'eam Haruna, twal karata-bu male sǝ puro a dǝmba sǝ amamǝna kat kpate à kǝ wal akarata-bu malea nǝ ta'nggwam. 21 Miriyam loasǝia wia nggyal ama:
<<Wu tùkî Yahweh nggyal ɓwangsǝban,
ace limurǝm male mǝgule!
Apǝr andǝ amǝ'koea ka,
túrnia aɓa nggeamùr.>>
Mùr mǝ'lùlle pǝlǝ mǝɓoarne
22 Amǝ Isǝrayila loapi ban Nggeamùr Nzuno sǝ Musa gingnǝia aban o aɓa Pǝɗanban Shur. À gya nongŋo tàrú aɓa pǝɗanban sǝ ko à kum kǝ mùr ɗàng. 23 Pǝlǝa à yì bik ɓè ban gaɓakan à tunǝi ama Mara, sǝ mùr mǝnana a banì ka lúllô à gandǝ nue ɗàng. Nda gìr mǝnana tsǝa sǝ à tunǝi ama Mara*15:23 Mara nǝ kún Ibǝru ka ɓālǝi nda lúllô. ka. 24 Aɓwana nggwanî Musa ama, <<Mana ado sǝm nǝ̀ nu?>> 25 Nda Musa ɓua aban Yahweh ɓǝ̀ bwalì wi kàm. Yahweh lǝmdǝì wi ɓè gbǝlang nggun, sǝ Musa twali túrí aɓa mùrnî; sǝ mùrnî pǝlǝ mǝɓoarne, à nǝ̀ gandǝ nuî.
Akanó a Mara sǝ Yahweh pea aɓwana male aɓea nggurcau andǝ akanìgìr mǝnana à nǝ̀ gingnǝ do malea ka; akanó gbal sǝ mwamia. 26 Bang ama, <<Ɓǝ̀ wun nǝ̀ kpata cau mala Yahweh Ɓakuli ma'wun nǝ̀ ɓabum wun kat, sǝ wun nǝ̀ pàk gìr mǝnana nda pepè a sǝne male, sǝ wun nǝ̀ kwakikir wun arǝ anzongcau male, sǝ wun nǝ̀ bwal anggurcau male kat ka, akwánó mǝnana kat ǝn yinǝia amur amǝ Masar ka, pà mǝ nǝ yinǝia amur wun ɗàng, acemǝnana Mim, Yahweh ka, Mǝ nda mǝ'twalban akwánó ma'wun.>>
27 Anzǝm mǝnana à nyìngŋǝ̀nà Mara ka, amǝ Isǝrayila gya à yi bik gaɓakan Elim, ban mǝnana à kum amáɗí-mùr lum-nong-ɓari andǝ anggun nkangga lumi-tongno-nong-ɓari (70) ka; à came à tsǝk agumli malea kàm.