20
Anzongcau Lum
1 Ɓakuli bang amǝnia yì acau ka, ama:
2 Mim Yahweh ka, mǝ nda Ɓakuli mô, mǝnana amsǝo a nzali Masar, a purî ɓala guro ka.*20:2 Ɓalli aɓa: Pur 13:3; Hos 13:4.
3 A pà wu nǝ pàngnǝ aɓea aɓakuli ɗang she kǝ mim.†20:3 Ɓalli gbal aɓa: Nggur 6:14; Ir 35:15.
4 A pà wunǝ pakkî ɓamurò kǝ ɓǝ̀nzál mǝnana à shàrrì, ko ɓè gìr mǝnana kat kǝ pur ɓè kǝgìr akanó a kùli, ko akani a nzali, ko a tǝta mùr a tà-nzali ka ɗàng. 5 Dumǝna púp a pà wu nǝ ɓun a ɓadǝmbia, ko awu nǝ peri abania ɗàng. Acemǝnana Mim Yahweh Ɓakuli mô ka, mǝ nda Ɓakuli mǝ'mɓali.‡20:5 Ɓakuli mǝ'mɓali Ɓalli aɓa: Tite 34:14; Nggur 4:24; 6:15; Jes 24:19; Nah 1:2. Ən nggǝ yinǝ ɓashi ace acauɓikea mala atárrú amur amunia andǝ amǝ'keà, aban ká tàruia andǝ inea nza mala aɓwana mǝnana à kǝ ɓinǝcem ngga. 6 Sǝama ǝn nggǝ lǝmdǝ earcearǝu mem mǝnana malkiyi raka, amur aɓwana mǝnana à kǝ earcem sǝ à kǝ bwal anzongcau mem ngga. Earcearǝu mem nǝ̀ gya amuria andǝ amunia andǝ amǝ'keà aban ká arǝ anza á-pas malea.
7 A pà wunǝ pàktúró nǝ lullǝ Yahweh Ɓakuli mô ace pàkkiagir ɓana ɗàng; acemǝnana Yahweh pa nǝ̀ nying ɓashì ɓwa mǝnana kǝ nyesǝ lullǝì ɓà ka ɗàng.§20:7 Ɓalli gbal aɓa: Pǝris 19:12; Mat 5:33.
8 Ɗenyinǝ Pwari Sabbat, pwari usǝlǝo; awu nǝ tàrì ɗàng ɓǝ̀ duk mǝfele, pwari ace Ɓakuli.*20:8 Sǝni aɓa: Pur 31:13-16; Pǝris 19:3,30; 26:2. 9 Arǝ apwari tongno-nong mwashat sǝ awu nǝ pàk túró, a nǝ mal atúró mô kat. 10 Sǝama tongno-nong-ɓaria nongŋo ka, pwari Sabbat na abanam Yahweh. Aɓalǝi ka, a pà wu nǝ pàk kǝ túró ɗang, ko we, ko muna-ɓwabura mô, ko muna-ɓwama mô, ko muna-ɓwabura mǝtúró-ɓala mô, ko muna-ɓwama mǝtúró-ɓala mô, ko agirkusǝu mô, ko abǝri-aɓwana mǝnana à do atà wun a là ka. 11 Acemǝnana aɓalǝ anongŋo tongno-nong-mwashat sǝ Yahweh pusǝ kùli andǝ nzali, sǝ nggeamùr, andǝ agir mǝnana kat aɓalǝia ka, sǝ usǝlǝo a tongno-nong-ɓaria pwari. Nda gìr mǝnana tsǝa sǝ Yahweh tsǝki pwari Sabbat bù, ɓǝ̀ do mǝfele na ka.
12 Gusǝlǝ tárró andǝ nggo,†20:12 Ɓalli gbal aɓa: Pǝris 19:3; Mat 15:4; Mar 7:10; Luk 18:20; Afi 6:2. ace mǝnana anongŋo mala do ɓanza mô mǝnana Yahweh Ɓakuli mô po ka, ɓǝà làkkì.
13 A pà wu nǝ wal-lú ɗàng.‡20:13 Ɓalli gbal aɓa: Mat 5:21; Rom 13:9.
14 A pà wunǝ nongnǝ kǝ ɓwa mǝnana wu al rǝ wun wunǝi raka ɗàng.§20:14 Ɓalli gbal aɓa: Nggur 5:18; Mat 5:27.
15 A pà wunǝ iun'í ɗang.*20:15 Ɓalli gbal aɓa: Pǝris 19:11; Mat 19:18.
16 A pà wunǝ nakún nyir arǝ ɓio mǝ'murkala ɗang.†20:16 Ɓalli gbal aɓa: Pur 23:1.
17 A pà wu nǝ sham ɓala mala ɓio mǝ'murkala ɗang. A pà wu nǝ sham mālá ɓio mǝ'murkala, ko mǝtúró-ɓala male ɓwabura ko ɓwama, ko jamnda, ko dambǝritso male, sǝ koya gìr mǝnana kat mala ɓio mǝ'murkala na ka ɗàng.‡20:17 Ɓalli gbal aɓa: Nggur 5:21; Mat 5:28; Luk 12:15; Rom 7:7; 13:9; Afi 5:3,5; Ib 13:5
Ɓangciu pàkkî ɓwapǝndǝa
(Ɓǝs Nggur 5:23-33)
18 Lang ɓwapǝndǝa kat nǝ̀ ok sàkkya mala mgbarangce, andǝ gi njawe, sǝ à sǝn liki'nzama mala tǎlaban, andǝ yele mǝnana kǝ lo amur nkono ka, ɓangciu pakkia wia, rǝia kǝ ɓǝla, sǝ à cam kuko.
19 À banggi Musa ama, <<We ka bangga sǝm cau, sǝm nǝ̀ ǒ, sǝama Ɓakuli ɓǝ̀kǝa na sǝm cau nǝ nggeari ɗàng, ɓǝ̀ ana raka sǝm nǝ̀ wukio.>>
20 Musa pea wia eare ama, <<Ɓangciu ɓǝ̀ kǝa pakka wun ɗàng. Ɓakuli yiu nǝ̀ yia mwam wun, ace mǝnana ɓǝ̀ wu do nǝ ɓanggi wi, wu kǝa pàk cauɓikea raka.>>
21 Aɓwana ueo aban came zak; Musa na nǝmurǝì sungŋo wari aban pǝndǝa mǝcikciki, a ban mǝnana Ɓakuli nakam ngga.
Anggurcau amur agyangŋan
22 Yahweh banggi Musa ama, <<Nea amǝ Isǝrayila cau mǝnia ka ama: <Wu sǝnǝni nǝ nggearǝ wun ama ǝn bangga wun cau nǝ kuli. 23 Pà wun nǝ̀ alita ɓamur rǝ wun ɓekǝ nkúl mǝnana à pè nǝ bolo-azǝrfa ko bolo-njengǝlan ama wun nǝ̀ peri abania sǝ wun nǝ̀ kpapiam sǝnǝia ka ɗàng.
24 << <Wu ɓak gyangŋan nǝ dǝɓang-nzali acem, sǝ wu pāki agir'nkila nǝ anzur andǝ andá ma'wun mǝnana à nǝ̀ pisǝia kǝring ngga, andǝ pākiagir mala dotarǝu, amurí. A koya ban mǝnana ǝn tárì ace mǝnana ɓǝ̀ wu yi peri abanam kàm ngga, mǝ nǝ yiu aban wun mǝ nǝ tsǝka wun bù. 25 Ɓǝ̀ wun nǝ̀ ɓak gyangŋan nǝ atali acem ngga, wu kǝa ɓè nǝ atali mǝnana à ɓunnia nǝ ɓunno ka ɗàng. Ɓǝ̀ wu pàktúró nǝ tali mǝnana à ɓunni ko à gilǝki rǝi nǝ girtúró sǝ à ɓak gyangŋan nǝi ka, gyangŋanì pànǝ ɓoaro abanam ace peri ɗàng. 26 Wu kǝa ɓakkam gyangŋan mǝnana ndanǝ aban-eauwe arǝì ka ɗàng, ace mǝnana ɓǝ̀ a ndaban eauwe aban ká amurí ka, wu kǝ alí rǝò ɗàng.>
*20:2 20:2 Ɓalli aɓa: Pur 13:3; Hos 13:4.
†20:3 20:3 Ɓalli gbal aɓa: Nggur 6:14; Ir 35:15.
‡20:5 20:5 Ɓakuli mǝ'mɓali Ɓalli aɓa: Tite 34:14; Nggur 4:24; 6:15; Jes 24:19; Nah 1:2.
§20:7 20:7 Ɓalli gbal aɓa: Pǝris 19:12; Mat 5:33.
*20:8 20:8 Sǝni aɓa: Pur 31:13-16; Pǝris 19:3,30; 26:2.
†20:12 20:12 Ɓalli gbal aɓa: Pǝris 19:3; Mat 15:4; Mar 7:10; Luk 18:20; Afi 6:2.
‡20:13 20:13 Ɓalli gbal aɓa: Mat 5:21; Rom 13:9.
§20:14 20:14 Ɓalli gbal aɓa: Nggur 5:18; Mat 5:27.
*20:15 20:15 Ɓalli gbal aɓa: Pǝris 19:11; Mat 19:18.
†20:16 20:16 Ɓalli gbal aɓa: Pur 23:1.
‡20:17 20:17 Ɓalli gbal aɓa: Nggur 5:21; Mat 5:28; Luk 12:15; Rom 7:7; 13:9; Afi 5:3,5; Ib 13:5