Cauterǝa mala Bulǝs aban ká a ban
AMƏ GALATI
Mǝncau
Lang amǝ'mishan tinata hamnǝ Cau Amsǝban amur Yesu Kǝrǝsti, sǝ aɓwana mǝnana amǝ Yahudi na raka, à nǝ̀ nggǝ ak ce ka, ɗiban yi lo ama, ko dumǝna púp she ɓǝ̀ ɓwa kpana atà Nggurcau mala Musa ka sǝ nǝ̀ pǝlǝ mǝkpata Yesu Kǝrǝsti le? Bulǝs angŋa dǝmba bǝlǝna ɓālǝi ama mǝnia ka pà kàm anggo ɗang. Sǝa ma aɓalǝ a'ikǝlisiya aɓa nggea-là Galati, a bu-nzali mala amǝ Asiya mǝkyauwe ka, aɓea aɓwana nda kam mǝnana à lo makgìr andǝ Bulǝs, à bang ama, dumǝna púp ɓwa nǝ̀ kpata Nzongcau mala Musa ace gilǝki do male pepe andǝ Ɓakuli.
Cauterǝa mala Bulǝs aban ká a ban amǝ Galati ka à gilǝì ace mǝnana ɓǝà nyesǝ aɓwana mǝnana à kútí aɓa ɓosǝkiban mala mǝnia yì kanigir mǝ'nyirì ka, ɓǝà nyare aɓa pě andǝ kpata paɓamuru mǝ'mǝsǝcau nì aban Ɓakuli. Bulǝs bang kúni ama yì ka, mǝtúró mishan mala Yesu Kǝrǝsti na, sǝ mǝnia yì tunǝban male mala duk mǝ'mishan ace kánǝ Cau Amsǝban mala Ɓakuli aban aɓwana arǝ acili anzali ka, pur nǝ́ ban Ɓakuli, ɓwapǝndǝa na à twali ka ɗàng. Lǝmdǝí ama paɓamuru nǝmurǝì ɓǝ̀rɓǝ̀r aɓa Yesu Kǝrǝsti ka, nda nǝ̀ tsǝk aɓwana sǝ à nǝ̀ kum akban aban Ɓakuli ka. Ɗǝm ngga lǝmdǝì amǝkpata Yesu Kǝrǝsti, ulang ɓealu mana kǝ pur aɓa earcearǝu mǝnana kǝ yiu nǝban paɓamuru aban Kǝrǝsti ka. Kum panzǝban mǝ'mǝsǝcau nì kǝ yiu, ɓǝ̀ sǝm ak ɓoro mala ɓwamuru mala Ɓakuli nǝ bumpwasǝa, sǝ sǝm pa ɓamur sǝm aɓata Bangŋo, mǝnana pusǝkiyi aɓǝle aɓalǝ sǝm ngga.
Gakkita acau mǝnana aɓalǝi ka
Mǝn cau1:1-10
Rǝcandǝa mala Bulǝs mala duk mǝ'mishan1:11--2:21
Cau Amsǝban mala ɓwamuru mala Ɓakuli3:1--4:31
Do ɓá panzǝban mala amǝkwaɗi andǝ túró malea5:1--6:10
Masǝlǝata cau6:11-18
1
1 Mǝnia yì cauterǝa ka, pur a banam, mim Bulǝs mǝ'mishan.
Twalban mem a túró mishan ngga pur nǝban ɓwapǝndǝa ɗang, pur nǝ bu Yesu Kǝrǝsti andǝ Ɓakuli Tárrú, mana loasǝi yì Kǝrǝsti a ɓembe ka.
2 Amǝ'eamrǝarǝu mǝnana sǝm nda kani sǝnǝia ka, sǝm nggǝ dapi bu aban tasǝ mǝnia yì cauterǝa ka, aban ká aban a'ikǝlisiya*1:2 a'ikǝlisiya: Ikǝlisiya ka, nda kpapi mala aɓwana mǝnana Ɓakuli tunǝia à nda ka mǝkpata Yesu Kǝrǝsti ka. mǝnana a bu-nzali Galati ka.
3 Ɓǝ̀ Ɓakuli Tár sǝm andǝ Mǝtalabangŋo Yesu Kǝrǝsti, lǝmdǝa wun ɓwamuru andǝ dorǝpwala. 4 Yesu pa yilǝmi ace acauɓikea ma'sǝm, kǝla mǝnana Ɓakuli Tár sǝm kani ka, ace mǝnana ɓǝ̀ amsǝ sǝm, a bu mǝnia yì nza mǝɓealɓike sǝm nda aɓalǝi ka. 5 Ɓwangsǝban kat ka, mala Ɓakuli na, mǝnana málá male pà kàm raka! Ɓǝ̀ do anggo.
Cau Amsǝban mǝ'mǝsǝcau nì ka
nda mwashat ɓǝ̀rɓǝ̀r
nda mwashat ɓǝ̀rɓǝ̀r
6 Ən nggǝ ndali nǝ kaurǝ ndǝli ma'wun arǝ Ɓakuli, mǝnana tunǝ wun nǝ ɓwamuru mala Kǝrǝsti, sǝ wu pǝlǝa wu kǝ kpata ɓekǝ cau ɗàng ngga. 7 Wu nda ban kpata ɓè <<cau amsǝban>> mǝnana a mǝsǝ sǝm ngga, kǝ cau amsǝban na raka. Aɓea aɓwana nda, à kǝ earce zurǝì mur wun, à nǝ̀ ɓosǝki ta Cau Amsǝban mala Kǝrǝsti ka. 8 Ɓǝ̀ súban mala Ɓakuli sulǝo amur ko ɓǝ̀ ya ɓwa nani, ko ɓǝ̀ sǝm nda, ko ɓǝ̀ mǝturonjar mǝnana a kùli nda ka, yi mǝnana ɓǝ̀ hamnǝ ɓe cau amsǝban sǝ pà mwashat andǝ mǝnana sǝm hamǝna wunì ɗiɗyal ka raka.†1:8 Ɓalli gbal aɓa: 2Kor 11:4. 9 Kǝla mǝnana sǝm na wun a dǝmbe ka, ǝn nggǝ ɓǝsǝlǝi ɗǝm ama: Ɓǝ̀ ɓwa hamba wun nǝ ɓekǝ cau ama <<cau amsǝban>> na, sǝ nda ɗàng andǝ Cau Amsǝban mǝnana wu angŋǝni ka, ɓǝ̀ súban mala Ɓakuli sulǝo amur ɓwe.
10 Ado ka, ɓwangsǝban mala ɓwapǝndǝa nda ǝn alkiyite ka le, ko mala Ɓakuli? Ɓǝ̀ mǝ nda ban ɓariki mǝ nǝ pwasǝbum ɓwapǝndǝa ka, ɓǝ́ pà mǝ nǝ duk guro mala Kǝrǝsti ɗàng.‡1:10 Ɓalli gbal aɓa: 1Tas 2:4.
Ɓakuli nda tunǝ Bulǝs ɓǝ̀ duk
mǝtúró mishan ngga
mǝtúró mishan ngga
11 Wun amǝ'eamrǝarǝu, ǝn nggǝ earce nǝma ɓǝ̀ wu sǝlǝ ama, Cau Amsǝban mǝnia ǝn nggǝ hamnǝi ka, ɗenyicau mala ɓwapǝndǝa na ɗang.§1:11 Ɓalli gbal aɓa: Rom 1:16-17. 12 Ən ak cau mem a bu ɓwapǝndǝa ɗang, sǝ kǝɓwa nǝ̀ kaniam gbal ɗàng. Mǝnia yì cau ka, Yesu Kǝrǝsti nǝ̀ mǝnbam ɓālǝi nǝ nggearǝì.
13 Wu sùrǝ́nà rǝ pa mem ɗiɗyal, mǝnana mǝ nda ban peri, peri mala amǝ Yahudi ka, yi mǝnana ǝn pe ikǝlisiya mala Ɓakuli tanni kǝ̀rkǝ́r, yàle eare mem ngga nǝma ɓǝà mesǝkea ɓǝà ueɓà.*1:13 Ɓalli gbal aɓa: Atúró 8:3; 22:4,5; 26:9-11. 14 Ən kutì aɓeam amǝlo kat aɓa peri mala amǝ Yahudi, sǝ mǝ ndanǝ ɓabumpina kǝ̀rkǝ́r arǝ kúncau mala aká sǝm.†1:14 Ɓalli gbal aɓa: Atúró 22:3. 15 ‡1:15 Ɓalli gbal aɓa: Isha 49:1; Ir 1:5; Atúró 9:3-6; 22:6-10; 26:13-18.Sǝ kaniama à nǝ̀ ɓǝ̀lám ngga, Ɓakuli tàram, sǝ tunǝam aɓata ɓwamuru male. Banɓoari wi 16 ɓǝ̀ lǝmdǝam Muni ace mǝnana ɓǝ̀ ǝn hamnǝ Cau Amsǝban male aban aɓwana arǝ aɓea nzali. Sǝ mim ngga ǝn alta kwarkiru mala kǝɓwa ɗàng. 17 Yàle ǝn wari ma a Urǝshalima nǝma mǝ nǝ nggá ok ɓè kǝcau a kun aɓwana mǝnana à akàm dǝmba aɓa túró mishan ngga ɗàng. A kun mani ka, ǝn o kporong aɓa nzali Arabiya, sǝ nǝnzǝ́mò ka, ǝn nyare a nggea-là Damaska.
18 Anzǝm apǝlǝa tàrú ka, ǝn wari a Urǝshalima, nǝma mǝ nǝ nggá sǝn Bitǝrus. Ən kya pakki anonggio lum-bwamdǝ-tongno abanì.§1:18 Ɓalli gbal aɓa: Atúró 9:26-30. 19 Ən sǝn kǝɓwa atà mǝ'mishan ɗàng, she kǝ Jemis, mǝ'eam Mǝtalabangŋo. 20 Mǝnia ka, mǝsǝcau na ǝn nakiya wun a ɓadǝm Ɓakuli ka, nyir pa aɓalǝi ɗàng.
21 Anzǝm mǝno ka ǝn wari arǝ aɓea ban aɓalǝ abu-nzali Suriya andǝ Sǝlisiya. 22 Kat andǝ amani ka, a'ikǝlisiya mǝnana à nda aɓa Kǝrǝsti a bu-nzali Yahudi ka, à súrǝàm a ɓamǝsǝam ɗàng. 23 Kǝgìr mǝnana à súrǝì ka nda kǝ cau mǝnana aɓwana kǝ na ama: <<Ɓwa mǝnana ɗiɗyal kǝ pa sǝm tanni ka, adyan ngga nda kǝ hamnǝ ce paɓamuru mǝnana ɓariki nǝ̀ kiɗiki ka.>> 24 Pǝlǝa à ɓwangsǝ Ɓakuli atàcau mem.
*1:2 1:2 a'ikǝlisiya: Ikǝlisiya ka, nda kpapi mala aɓwana mǝnana Ɓakuli tunǝia à nda ka mǝkpata Yesu Kǝrǝsti ka.
†1:8 1:8 Ɓalli gbal aɓa: 2Kor 11:4.
‡1:10 1:10 Ɓalli gbal aɓa: 1Tas 2:4.
§1:11 1:11 Ɓalli gbal aɓa: Rom 1:16-17.
*1:13 1:13 Ɓalli gbal aɓa: Atúró 8:3; 22:4,5; 26:9-11.
†1:14 1:14 Ɓalli gbal aɓa: Atúró 22:3.
‡1:15 1:15 Ɓalli gbal aɓa: Isha 49:1; Ir 1:5; Atúró 9:3-6; 22:6-10; 26:13-18.
§1:18 1:18 Ɓalli gbal aɓa: Atúró 9:26-30.