9
Ɓakuli kùrcau nǝ Nuhu
1 Ɓakuli tsǝki Nuhu andǝ amuni bu sǝ nea wia ama:
Wu ɓǝla, wu hatǝki, wu lùmsǝ ɓanza.*9:1 Ɓalli gbal aɓa: Tite 1:28; 8:17; 9:7; 35:11. 2 Koya nyam-bondo, sǝ koya nyal a bumkuli, andǝ koya gìr mǝnana kǝ kuɗǝki a nzǝm-nzali, andǝ anji kat a nggeamùr, à nǝ̀ nggǝ ɓangga wun sǝ múrià nǝ̀ kària arǝ wun. Ən pana wunia kat a bù wun. 3 Koya gìr mǝnana kǝ gya sǝ ndanǝ yilǝmu ka, nǝ̀ duk girlina ma'wun. Kǝla mǝnana ǝn pa wun agirpwala ɓǝà duk girlina ma'wun ngga, ǝn pana wun girbunda kat. 4 Kǝgìr mǝnana pa wu nǝ li raka nda nyama mǝnana yilǝmi na aɓa nyami più ka, mǝnana nda nkile ka.†9:4 Ɓalli gbal aɓa: Pǝris 3:17; 7:20; 17:10-16; 19:26; Nggur 12:16,23; 15:23; 1Sam 14:34; Atúró 15:20,29. 5 Ɓwa mǝnana twal yilǝmi ɓwa ka, mǝ nǝ ɗice mǝno yì yilǝmu ka a bu kǝ ɓwe. Sǝ ɓǝ̀ girkusǝu na gbal sǝ wal-lú ɓwa ka, girkusǝunì gbal ka ɓǝà wali ɓǝ̀ wú.‡9:5 Ɓalli gbal aɓa: Pur 20:13; 21:28.
6 Ɓǝ̀ yana sǝ twal yilǝmi ɓwa ka,
yì gbal ka à nǝ̀ twal yilǝmi,
acemǝnana Ɓakuli pak ɓwapǝndǝa
7 Wun ngga, wu ɓǝla, wu hatǝki, wu akiban a ɓanza.
8 Pǝlǝa Ɓakuli ne Nuhu andǝ amuni ama, 9 <<Mǝ ndya ǝn nggǝ tamsǝ kùrcau mem sǝnǝa wun andǝ amuna wun andǝ amǝkà wun, 10 sǝ nǝ́ koya girkusǝu mǝnana kutio atà wun aɓa waru ka; anyal, andǝ anyam-ɓala andǝ nyam-bondo; andǝ koya gìr nani mǝnana ndanǝ yilǝmu a ɓanza ka. 11 Mǝ ndya ǝn nggǝ tamsǝ kusǝ kùrcau mem nǝ wun ngga: Mùr-gùla pa nǝ̀ nyar ɗǝm nǝ̀ twalta yilǝmu ɗàng. À pà nǝ̀ kiɗiki ɓanza ɗǝm nǝ nggea mùr-gùla ɗang.>>*9:11 Ɓalli gbal aɓa: Isha 54:9-10.
12 Ɓakuli nyare na ama, <<Mǝnia ka nda gìr'lǝmdǝa mala kùrcau mǝnia ǝn nggǝ kùrì a nrem sǝm sǝnǝa wun andǝ koya gìr mana nǝyilǝmu atà wun ngga, kùrcau mana nda ace anza mǝnana à kǝ yiu peatu ka: 13 Ən tsǝ́ngŋǝ̀nà npāring aɓalǝ apǝrɓang. Nda gìr'lǝmdǝa mem mala kùrcau a nrem andǝ ɓanza ka. 14 Ɓǝ̀ nda aya pwari sǝ ǝn sulǝ apǝrɓang amur ɓanza, sǝ npāring pusǝrǝi aɓalǝ apǝrɓang ngga, 15 mǝ nǝ ɗenyi nǝ kùrcau mem mǝnia ǝn pangnǝ wun andǝ koya ambalang agir mǝnana à ndanǝ yilǝmu ka. Nggea mùr-gùla pa nǝ̀ nyare nǝ̀ twalta yilǝmu ɗǝm ɗàng.†9:15 Ɓalli gbal aɓa: Pǝris 26:42,45; Nggur 7:9; 1Amur 8:23; Ezǝk 16:60. 16 Ɓǝ̀ aya pwari sǝ npāring pusǝrǝi aɓalǝ apǝrɓang ngga, mǝ nǝ sǝnì, sǝ ɓalǝam nǝ̀ kasǝa arǝ kùrcau mana málá male pà kàm raka, mǝnana a nre Ɓakuli andǝ yilǝmu kat a ɓanza ka.>>
17 Pǝlǝa Ɓakuli ne Nuhu ama, <<Mǝnia yì npāring ngga, nda gìr'lǝmdǝa mala kùrcau mǝnana ǝn tsǝì a nrem andǝ yilǝmu kat a ɓanza ka.>>
Nuhu nu mùr anap sǝ wali
18 Amuna-burana mala Nuhu mana à purî ɓá waru ka à nda ka Shem, andǝ Ham sǝ Jafet. Ham ɓǝl muna-ɓwabura lùllǝì ama Kan'ana. 19 Amǝnia yì amuna-burana mala Nuhu tàrú ka, à nda à yi ɓǝl ɓwapǝndǝa kat mana à mesǝ a koya ban a ɓanza ka.
20 Nuhu ka mǝrya na sǝ nda tita tsǝk ɓaban mala anggun-anap ka. 21 A ɓè pwari ka, Nuhu nu mùr-ɓǝlanggun anap mǝhangŋe kǝ̀rkǝ́r, mùr anap wàlì, pǝlǝa kpa nong nǝ ɓate aɓa tara male. 22 Ham, tár Kan'ana ka sǝn tárrí aban nongŋo nǝ ɓate. Pǝlǝa puro wari a nza kya banggi amǝ'eambi mǝnia ɓari ka. 23 Sǝ Shem andǝ Jafet ka, à twal lagir à mǝni a nzǝmia sǝ à ging nǝ nzǝm à yi kùmsǝî tárrià amurí, gìr ɓate. À pǝlǝ mǝsǝia nǝ ɓe ban ɗàng, à sǝn ɓata tárrià ɗàng. 24 Lang dǝm Nuhu kwarna ka, yi sǝlǝce gìr mǝnana Ham, muni mǝkyauwe pakki wi ka. 25 Bang ama,
<<Súban ɓǝ yiu amúr Kan'ana!
Yì ka nǝ̀ duk guro mala aguro
aban amǝ'eambi.
26 Ɓwangsǝban ɓǝ pa aban Mǝtalabangŋo, Ɓakuli mala Shem!
Kan'ana nǝ̀ duk guro mala Shem.
27 Ɓakuli ɓǝ̀ tangsǝ nzong-nzali mala Jafet!
Amuna male andǝ amǝkè nǝ̀ do atārǝia andǝ aɓwana mala Shem!
Kan'ana nǝ̀ duk guro mala Jafet.>>
28 Anzǝm pa mala mùr-gùla ka, Nuhu pàk aɓea pǝlǝa gbǝman-tàrú nǝ lumi-tongno (350). 29 Do ɓanza mala Nuhu kat ka pǝlǝa gbǝman-tongno-nong-ine nǝ lumi-tongno na (950). Anzǝm mǝno ka sǝ yi wú.
*9:1 9:1 Ɓalli gbal aɓa: Tite 1:28; 8:17; 9:7; 35:11.
†9:4 9:4 Ɓalli gbal aɓa: Pǝris 3:17; 7:20; 17:10-16; 19:26; Nggur 12:16,23; 15:23; 1Sam 14:34; Atúró 15:20,29.
‡9:5 9:5 Ɓalli gbal aɓa: Pur 20:13; 21:28.
§9:6 9:6 Ɓalli gbal aɓa: Pur 21:12-14; Pǝris 24:17; Ɓal 35:33; Mat 26:52.
*9:11 9:11 Ɓalli gbal aɓa: Isha 54:9-10.
†9:15 9:15 Ɓalli gbal aɓa: Pǝris 26:42,45; Nggur 7:9; 1Amur 8:23; Ezǝk 16:60.