35
Yakupu andǝ amǝɓala male nyare a Betel
1 Ɓakuli banggi Yakupu ama, <<Lo, o a Betel sǝ wu do abanì. Ɓak gyangŋan abanì acem, mim Ɓakuli mǝnana ǝn lǝmdǝ rǝàm a bano mana a ndaban ɓangŋa ace upi ban mǝ'eambo Isǝwa ka.>>*35:1 Ɓalli aɓa: Tite 28:19.
2 Pǝlǝa Yakupu banggi amǝ'ɓala male andǝ aɓwana mana kat à nda atè ka ama, <<Wu pusǝki aɓǝ̀nzál mala peri aban abǝri aɓakuli mǝnana à nda bu wun ngga, wu lak rǝ'wun, sǝ wu nggaɗi agir-nggūrǝu ma'wun.†35:2 Ɓalli gbal aɓa: Tite 31:19; Jes 24:23; 1Sam 7:3. 3 Ɓǝ̀ sǝm lo sǝm nǝ̀ umì a Betel. Akano ka mǝ nǝ nggá ɓakkî Ɓakuli gyangŋan, yì Ɓakuli mana ok hiwi mem a pwari tanni mem, sǝ nda atàm a koya ban ǝn wari kam ngga.>>‡35:3 Ɓalli aɓa: Tite 28:10-22.
4 Nda à pè Yakupu abǝri ɓakuli mǝnana a buia ka kat, andǝ agirkiru mana a kiria ka. Yakupu lúmsǝiǎ a tǝrta nggun mǝgule mǝnana a Shekem ngga. 5 Lang à puro à nǝ̀ o ka, nggea ǝn'ò mǝnana pùr nǝban Ɓakuli ka sulǝo amur alá mǝnana à nda a ban mǝno ka. Acemani ka kǝɓwa lo ama nǝ̀ pǝ̀rta amuna mala Yakupu ama nǝ̀ pàkkia wia kǝgìr ɗàng.§35:5 Ɓalli gbal aɓa: Pur 23:27.
6 Nda sǝ Yakupu andǝ aɓwana mana atè ka à yi bik Luz (mǝnana à tunǝi gbal ama Betel ka) a nzali Kan'ana. 7 Yakupu ɓak gyangŋan kano sǝ tunǝ lullǝ banì ama El Betel,*35:7 El Betel ka ɓālǝi nda <<Ɓakuli mala Betel.>> acemǝnana Ɓakuli lǝmdǝ rǝì a baní a ban mǝno lang nda rǝ ɓangŋa nǝ̀ upi ban mǝ'eambi Isǝwa ka.
8 Bǝti anzǝm mǝnia ka, Debora,†35:8 Debora ka a bang cau male a: Tite 24:59. yì ɓwagula mǝnana ɗiɗyal nda iulǝ Rabeka mālá Ishaku a muna ka, paklú. À tsǝk-luí a tà nggun mǝgule aɓa ɓangŋaban mǝnana a Betel ka. Sǝ à tsǝkî nggunî lullǝu ama, <<Nggea-nggun sukkimǝrǝm.‡35:8 Nggea-nggun sukkimǝrǝm ko Allon Bacuth nǝ kún Ibǝru.>>
9 Nyare mǝno Yakupu nyàrî Padan Aram ngga, Ɓakuli lǝmdǝ rǝì a baní ɗǝm a Betel. Ɓakuli tsǝki wi bù 10 banggi wi ama, <<Lùllǝò nda Yakupu, sǝama à pà nǝ̀ nggǝ tunǝo ɗǝm ama Yakupu ɗàng. Twal ado aban ká dǝmba ka, lùllǝò nda Isǝrayila.>> Anggo sǝ Ɓakuli nggaɗi wi lullǝu ama Isǝrayila.§35:10 Ɓalli gbal aɓa: Tite 32:28.
11 Pǝlǝa Ɓakuli banggi wi ama, <<Mǝ nda Ɓakuli Mana Karban Kat nǝ Gulo*35:11 Ɓakuli Mana Karban Kat nǝ Gulo nda El-Shaddai nǝ kún Ibǝru. ka. Ɓǝl amuna sǝ wu hatǝki! Tau mò nǝ̀ duk nzali mǝgule sǝ nǝ̀ ɓǝl anzali pas. Aɓalǝ amǝ'keò ka amurǝma nǝ̀ puro!†35:11 Ɓalli gbal aɓa: Tite 17:6,16; 36:31. 12 Nzali mǝnana ǝn pê Ibǝrayim andǝ Ishaku ka mǝ nǝ po wì, sǝ mǝ nǝ pè amunio andǝ amǝ'keo mǝnana à nǝ̀ ɓǝlia anzǝmo ka.>>‡35:12 Ɓalli aɓa: Tite 12:7; 13:15; 26:3-4; 28:13; Pur 32:13. 13 Pǝlǝa Ɓakuli upi ban mǝno nacau nǝ Yakupu kàm ngga.
14 A ban mǝno Ɓakuli nacau nǝi ka, Yakupu twal nggea tali sǝ kwaki, ɓǝ̀ cam nǝ came. Pǝlǝa solǝ mùr-ɓǝlanggun anap amurí kǝla paɓoro aban Ɓakuli; ɗǝm ngga ɗārǝi nǝ mùrú olif ɓǝ̀ tàrì, ban-peri aban Ɓakuli na.§35:14 Ɓalli aɓa: Tite 28:18-19; 31:45. 15 Yakupu pǝlǝa tsǝki banì mǝnia Ɓakuli na cau nǝi kàm ngga lullǝu ama Betel.*35:15 Betel ka ɓālǝi nda <<Ɓala mala Ɓakuli.>>
Lú mala Rahila
16 Yakupu andǝ amǝ'ɓala male tùro à nying Betel, sǝ lang à nda njar à malanǝ̀ bik Efǝrat ka, Rahila twal gbáshí, sǝ nda aɓa kwanban mala gbáshí. 17 Lang tanni kwanban mala gbáshí male yi ɓikina ka, ɓwama mǝ'bwal gbáshí ne wi ama, <<Cè ɓangciu pàkkô ɗàng, Rahila; a ɓǝ́lǝnà muna-ɓwabura.>> 18 Sǝ aɓa mǝno anggo ka yilǝmi na rǝ purì rǝì, sǝ lang nǝ̀ tusǝ masǝlǝata lin'ueo male ka, tsǝkî muna lullǝu ama, Ben-oni.†35:18 Ben-oni ka ɓālǝi nda <<muna bumkiɗya mem.>> Sǝ tár muna ka tunǝi ama, Benjami.‡35:18 Benjami ka ɓālǝi nda <<muna bu-mǝlì mem.>>
19 Lang Rahila wù ka à tsǝk-luí a nkanggari njargula ká Efǝrat, là mǝnana yalung à súrǝì ama Betalami ka.§35:19 Ɓalli gbal aɓa: Mik 5:2; Mat 2:18. 20 Yakupu loasǝ nggea-tali tàmsǝì abanì, sǝ nda lǝmdǝ ban ɓembe mala Rahila ka bà yalung.
21 Pǝlǝa Isǝrayila andǝ amǝ'ɓala male lidǝmba nǝ gya à o à kya tsǝk là-gumli malea a ɓè buì mala ɓè ban à tunǝi ama, Migdal-Eda.*35:21 Migdal-Eda ka ɓālǝi nda <<Ban mǝ'dāhre ace sǝn múr adomwan.>>
Amuna-burana mala Yakupu
(1 Acau Kpa 2:1-2)
22 Lang Isǝrayila na ban do a nzali mǝno ka, Ruben pàk-ɓwama nǝ Bilha, mwashat atà mā-guro mala tárrí. Isǝrayila ok cè.†35:22 Ɓalli gbal aɓa: Tite 49:3-4.
‡35:22 Ɓalli gbal aɓa: 1Kpa 2:1-2.Amuna-burana mala Yakupu ka à nda lum-nong-ɓari:
23 Amuna-burana nǝ bu Liya ka à nda ka Ruben (muna-dǝmba mala Yakupu), andǝ Shimiyon, andǝ Lawi, andǝ Yahuda, andǝ Isaka, sǝ Zebulu.
24 Amuna-burana nǝ bu Rahila ka à nda ka Yisǝfu andǝ Benjami.
25 Amuna-burana nǝ bu Bilha, mǝtúró-ɓala mala Rahila ka, à nda ka Dan andǝ Naftali.
26 Amuna-burana nǝ bu Zilpa, mǝtúró-ɓala mala Liya ka, à nda ka Gad andǝ Asha.
Amǝno ka à nda ka amuna-burana mǝnana à ɓǝlî Yakupu a Padan Aram ngga.
Lú mala Ishaku
27 Nda Yakupu nyare a là aban tárrí Ishaku a Mamǝre, a Kiriyat-Arba mǝnana à súrǝì yalung ama Hebǝron, yì ban mǝnana Ibǝrayim andǝ Ishaku duk kam kǝla abǝri ka.§35:27 Ɓalli gbal aɓa: Tite 13:18; 18:1; 23:19. 28 Ishaku pàk apǝlǝa gbǝman mwashat nǝ lumi-tongno-nong-tàrú [180] a ɓanza 29 sǝ yi wú, lú mala kaɓa-ɓwa, sǝ à tsǝkbani atà akê. Amuna-burana male, Isǝwa andǝ Yakupu, na à tsǝì ka.
*35:1 35:1 Ɓalli aɓa: Tite 28:19.
†35:2 35:2 Ɓalli gbal aɓa: Tite 31:19; Jes 24:23; 1Sam 7:3.
‡35:3 35:3 Ɓalli aɓa: Tite 28:10-22.
§35:5 35:5 Ɓalli gbal aɓa: Pur 23:27.
*35:7 35:7 El Betel ka ɓālǝi nda <<Ɓakuli mala Betel.>>
†35:8 35:8 Debora ka a bang cau male a: Tite 24:59.
‡35:8 35:8 Nggea-nggun sukkimǝrǝm ko Allon Bacuth nǝ kún Ibǝru.
§35:10 35:10 Ɓalli gbal aɓa: Tite 32:28.
*35:11 35:11 Ɓakuli Mana Karban Kat nǝ Gulo nda El-Shaddai nǝ kún Ibǝru.
†35:11 35:11 Ɓalli gbal aɓa: Tite 17:6,16; 36:31.
‡35:12 35:12 Ɓalli aɓa: Tite 12:7; 13:15; 26:3-4; 28:13; Pur 32:13.
§35:14 35:14 Ɓalli aɓa: Tite 28:18-19; 31:45.
*35:15 35:15 Betel ka ɓālǝi nda <<Ɓala mala Ɓakuli.>>
†35:18 35:18 Ben-oni ka ɓālǝi nda <<muna bumkiɗya mem.>>
‡35:18 35:18 Benjami ka ɓālǝi nda <<muna bu-mǝlì mem.>>
§35:19 35:19 Ɓalli gbal aɓa: Mik 5:2; Mat 2:18.
*35:21 35:21 Migdal-Eda ka ɓālǝi nda <<Ban mǝ'dāhre ace sǝn múr adomwan.>>
†35:22 35:22 Ɓalli gbal aɓa: Tite 49:3-4.
‡35:22 35:22 Ɓalli gbal aɓa: 1Kpa 2:1-2.
§35:27 35:27 Ɓalli gbal aɓa: Tite 13:18; 18:1; 23:19.