2
Nunkiru ace tsǝkiru arǝ amsǝban
mǝnana Ɓakuli yina sǝm ngga
mǝnana Ɓakuli yina sǝm ngga
1 Ace mani ka, sǝm nǝ̀ tsǝkir sǝm pepè arǝ cau mǝnana sǝm ok ka, ace mǝnana ɓǝ̀ sǝm ngga kyanggi wi ɗàng. 2 Ɓǝ̀ cau mǝnana amǝturonjar ne ka, kum came kàngkàng, sǝ koya yàl nzongcau andǝ mgbicau ka, à kum tangnakusǝu mǝnana karǝ a rǝia ka, 3 lang sǝ sǝm nǝ̀ àwá, yi mǝnana ɓǝ̀ sǝm būrǝce mǝnia yì amsǝban mǝgule ka? Mǝtalabangŋo bang ce a nggea dǝmbe, sǝ aɓwana mǝnana à oe nǝ kiria ka, à na sǝm ama, kǝ nda anggo. 4 Ɓakuli gbal ka, pu nzǝm cau malea nǝ agir-lǝmdǝa, andǝ agir-gyambǝliban, andǝ agir-ndǝlǝki ɗàngɗáng, andǝ aɓoro mala Bangŋo Mǝfele mǝnana gakkia kǝla mana bumi kani wi ka.
Yesu nda tǝr amsǝban
5 Ɓanza mǝno kǝ yiu sǝm nakiyice ka, Ɓakuli nyî a ɓabù amǝturonjar ɗang. 6 Malǝmce bang a ɓe ban ama:
<<Yana nda ɓwamǝpǝndǝe
mǝnana, We Ɓakuli,
a kǝ ɗenyi nǝi ka,
ko muna ɓwapǝndǝa
mǝnana a kǝ tsǝkiri ka?
7 A cî gatti amǝturonjar
a pǝti muri nǝ
ɓoarɓwa andǝ gulo,
8 a cî do amur koya gir
a pê ka.>>†2:8 Ɓalli gbal aɓa: Ang 8:4-6.
Aɓa tsǝa mǝnana Ɓakuli tsǝk ɓwapǝndǝa ɓǝ̀ do amur agir kat ka, lǝmdǝ ama kǝgìr pà kàm mǝnana pà a ɓate raka ɗang. Sǝ ado mǝno ka, sǝm malaká sǝn ko man kat aɓata rǝcandǝa mala ɓwapǝndǝa ɗang. 9 Gir mǝnana sǝm sǝni ka nda Yesu mǝnana à tsǝì gatti amǝturonjar bǝti, ace mǝnana nǝ ɓwamuru mala Ɓakuli ka, ɓǝ̀ wú ace koyan ngga. Sǝ adyan ngga, sǝm sǝni ka à pǝtini múrí nǝ ɓoarɓwa andǝ gulo, acemǝnana nu tanni wu ace aɓwana ka.
10 Ɓakuli ka nda mǝnana pusǝ agir kat ka. Sǝ agir kat ka àkǝ̀ ce ɓoarɓwa male sǝ à pa. Yi sǝni ka nda a njarì ɓǝ̀ yinǝ amuna male mǝnana à nda pas ka, ɓǝà kum kāmbe aɓa ɓoarɓwa male. Pǝlǝa tsǝk Yesu, yì ɓwamǝgule malea, ɓǝ̀ kum lùmsǝo aɓalǝ agir kat kǝla mǝnana Ɓakuli earkiyice ka nǝ njar mala nu tanni, ace mǝnana ɓǝ̀ duk ɓwa mǝnana kārǝ́na nǝ̀ yinǝia aɓa amsǝban malea ka.‡2:10 Ɓalli gbal aɓa: Sǝn 4:11. 11 Sǝ ado ka, Yesu andǝ aɓwana mǝnana kǝ taria ɓǝà duk amala Ɓakuli ka, Tárrià mwashat. Nda gìr mǝnana tsǝa sǝ kǝsǝkya pakki Yesu arǝ tunǝia ama, amǝ'eambi raka. 12 Yì ka, ne Ɓakuli ama,
<<Mǝ nǝ hamnǝ lùllǝò
aban amǝ'eambǝam;
mǝ nǝ ɓwangsǝo
aɓalǝ aɓwana mô
mǝnana à ram ngga.>>§2:12 Ɓalli gbal aɓa: Ang 22:22.
13 Na ɗǝm ama,
<<Mǝ nǝ gūlì arǝì.>>*2:13 Ɓalli gbal aɓa: Isha 8:17.
Sǝ nyare na ɗǝm ama,
<<Mǝ ndya sǝnǝ amuna
mǝnana Ɓakuli pam
ngga.>>†2:13 Ɓalli gbal aɓa: Isha 8:18.
14 Sǝ acemǝnana amuna mala Ɓakuli ka, à pea nǝ nkila andǝ nyama ka, Yesu gbal ka duk nkila andǝ nyama, do kǝla yia aɓwapǝndǝa. Nǝ́ lú male sǝ gandǝ kiɗiki rǝcandǝa mala mǝɓealɓikea mǝnana bwal rǝcandǝa mala lú ka. 15 Anggo sǝ panzǝ aɓwana mǝnana à do malea kat ka, à nda ka aguro aɓata ɓangciu mala lú ka. 16 Aɓa mǝsǝcau ka, amǝturonjar na Yesu falǝnǝia nǝ̀ bwalia wia kam ngga ɗang. Yiu male ka, nda ace bwalia amǝkau mala Ibǝrayim. 17 Ace mani ka, dumǝni wi ama she nǝ̀ nyesǝ ɓamúrì kǝla amǝ'eambi a koya njargula, ace mǝnana ɓǝ̀ duk Pǝris Mǝgule mǝnana ndanǝ mǝsǝswatǝr aban aɓwana, à nǝ̀ earnǝi aɓa túró male aban Ɓakuli ka. Anggo ka sǝ́ nǝ̀ pa gir'nkila ace twalban acauɓikea mala aɓwana mala Ɓakuli. 18 Sǝ acemǝnana yì nǝ nggearǝì ka, kutina aɓa tanni andǝ kārǝkiban ngga, nǝ̀ gandǝ bwalì aɓwana mǝnana à kutio aɓa kārǝkiban ngga, kàm.