8
Yesu twalî ɓè ɓwama
ban cauɓikea male
ban cauɓikea male
1 Yesu ka, eau amur Nkono mala anggun Olif. 2 Ban fana nǝ tadǝmbari ka, nyare wari a Ndàmǝgule mala Ɓakuli. Sǝ ɓwapǝndǝa yiu ramba a baní, pǝlǝa do tita kania wia gìr. 3 Amalǝm Nggurcau mala Musa andǝ amǝ Farisi yiu nǝ ɓe ɓwama mǝnana à bwalia amur rǝarǝia andǝ ɓe ɓwabura ka, sǝ à yì tamsǝi a ɓadǝm ɓwapǝndǝa. 4 À ɗì Yesu ama, <<Malǝm, ɓwama man ngga à bwali amur rǝarǝia andǝ ɓwabura. 5 *8:5 Ɓalli gbal aɓa: Pǝris 20:10; Nggur 22:22-24. Nggurcau mala Musa bang ama ɓwama mǝnana pàk ulang man yì gìr ka, ɓǝà ɓukki nǝ atali ɓǝ̀ wú. Sǝ ado ka, mana a na amurí?>> 6 Ɗiban mǝnia aɓwana ɗì Yesu ka, gbǝ́lî na à dambi Yesu ka, acemǝnana ɓǝ̀ na ɓekǝ cau sǝ à nǝ̀ bwali nǝi ka.
Sǝ Yesu ka kū`ndǝó kǝ gilǝgir a nzali nǝ munabuì. 7 Lang à camarǝ ɗike ka, pǝlǝa loasǝ múrí sǝ nea wia ama, <<Ɓwa mǝnana atà wun pànǝ cauɓikea raka, ɓǝ̀ tita túr tali.>> 8 Sǝ nyare kū`ndǝó aban gilǝgir a nzali. 9 Lang amalǝm nggurcau andǝ amǝ Farisi ongŋǝna cau mǝnana Yesu na ka, kara à purkî banì mwashat-mwashat, tite a ban ɓwamǝgule. Sǝ à nying Yesu nǝmurǝì andǝ ɓwame aban came aɓalǝ aɓwana.
10 Yesu lo cam nǝ came, sǝ ɗì ɓwame ama, <<Aɓwana mǝnana à yiu nǝ we ka, à nda ke le? Kǝɓwa pà kàm ateà mǝnana ueo nǝ̀ pakko ɓashi-lú ka re?>>
11 Pǝlǝa eare ama, <<Awo, Ɓwamǝgule, kǝɓwa pà kàm ɗàng.>>
Yesu banggi wi ama, <<Nggearǝ mim gbal ka ǝn kasǝò ɓashi-lú ɗàng. Kyane, sǝ kǝa pak cauɓikea ɗǝm ɗàng.>>]
Yesu nda tǎlaban mala ɓanza
12 Yesu nyar ɗǝm banggi aɓwana ama, <<Mǝ nda tǎlaban mala ɓanza! Ɓwa mǝnana kat kpatam ngga, pà nǝ̀ gya aɓa pǝndǝa ɗang, nǝ̀ kum tǎlaban mala yilǝmu.>>†8:12 Ɓalli gbal aɓa: Mat 5:14; Yoh 9:5.
13 Amǝ Farisi ne wi ama, <<Ado ka a ndaban nakún ɓamuro, cau mò ka à pà nǝ̀ é ama mǝsǝcau na ka ɗàng.>>‡8:13 Ɓalli gbal aɓa: Yoh 5:31.
14 Sǝ Yesu nea wia ama:
Ko ɓǝ̀ ǝn nakún ɓamúràm ngga, cau mem ngga à nǝ̀ earnǝi, acemǝnana ǝn súrǝ́nà rǝ ban mǝnana ǝn pur kàm ngga, sǝ ǝn súrǝ́nà rǝ ban mǝnana mǝ nǝ ká kàm ngga. Sǝ wun ngga, wu súrǝ̀ ban mǝnana ǝn pur kàm, andǝ ban mǝnana mǝ nǝ ká kàm ngga ɗàng. 15 Wu kǝ pak ɓashi aɓa nggūrǝu, sǝ mim ngga ǝn nggǝ ɓashi kǝɓwa ɗàng. 16 Sǝ ɓǝà na ama ǝn nggǝ pak ɓashi ka, ɓashi mem ngga mǝsǝcau na, acemǝnana ǝn pa nǝmurǝam atà ɓashi ɗàng, Tárrám mǝnana tasǝam ngga nda atàm. 17 Nggurcau ma'wun bang ama, ɓǝ̀ kún aɓwana ɓari yiu mwashat amur cau ka, cê ka mǝsǝcau na.§8:17 Ɓalli gbal aɓa: Nggur 19:15. 18 Sǝ mim ngga, ǝn nakún ɓamúràm, sǝ Tárrám mǝnana tasǝam ngga nakunam gbal.
19 Sǝ à ɗì ama, <<Tárró na ake?>>
Pǝlǝa Yesu earia wia ama, <<Wu súrǝàm ɗang, sǝ wu súrǝ̀ Tárrám ɗang. Ɓǝ̀ wu sùrǝ́nà rǝam ngga, ɓǝ́ wu sùrǝ́nà rǝ Tárrám gbal.>>
20 Yesu naki amǝnia yì acau ka mǝnana nda rǝ kanigir a buban mǝnana à kǝ tsǝk boalo kam andǝ agir mǝɓoarne aɓa Ndàmǝgule mala Ɓakuli ka. Sǝ kǝɓwa bwali ɗàng, acemǝnana pwari male malaká karǝ ɗang.
21 Yesu nea wia ɗǝm ama, <<Mǝ ndo mǝ nǝ o; ɓǝn umna ka, wu nǝ̀ altam, sǝ wu nǝ̀ wú aɓalǝ acauɓikea ma'wun. Pa wu nǝ̀ gandǝ ká aban mǝnana mǝ nǝ ká kam ngga ɗang.>>
22 Pǝlǝa aɓwana-mǝgule mala amǝ Yahudi ɗiban ama, <<Nggearǝì ka nda ban earce nǝ̀ wal ɓamúrì le? Mana tsǝa sǝ na ama, pà sǝm nǝ̀ gandǝ ká aban mǝnana nǝ̀ ká kam ngga ɗang?>>
23 Yesu ear ama, <<Tǝta wun ngga a ɓanza mǝnia a nzali ka sǝ pa, sǝ mim ngga ǝn pur nǝ kuli. Wu nda ka mala ɓanza man, sǝ mim ngga mǝ nda mala ɓanza man ɗang. 24 Nda gir mǝnana tsǝa sǝ ǝn na wun ama wu nǝ̀ wú aɓalǝ acauɓikea ma'wun ngga; ɓǝ̀ wu earnǝ mim ama Mǝ Nda*8:24 Mǝ Nda: Aban amǝ Yahudi ka lullǝu mana karban kat nǝ fele à tunǝ Ɓakuli nǝi ka nda <<Yahweh,>> sǝ ɓālǝi ka nda <<Mǝ nda.>> Arǝ aɓea ban aɓa Cau Amsǝban a nê mala Yohana ka, Yesu pak túró nǝ <<Mǝ Nda>> ace mǝnana ɓǝ̀ lǝmdǝ ama yì nda ɓwe.ɓwa mǝnana ǝn na nǝma Mǝ Nda ka raka, wu nǝ̀ wú aɓalǝ acauɓikea ma'wun.>>
25 Pǝlǝa à ɗì Yesu ama, <<A nda yana?>>
Sǝ Yesu earia wia ama, <<Mǝ nda kǝ ɓwa mǝnana ǝn na wun a dǝmbe nǝma mǝ nda ka. 26 Mǝ ndanǝ acau pas amur wun, mǝnana mǝ nǝ ɓashia wun nǝia ka, sǝ pa mǝ nǝ pè ɗàng. Tárrám mǝnana tasǝam ngga mǝ'mǝsǝcau na, sǝ ǝn nggǝ ne ɓanza gir mǝnana ǝn ok a kúni ka.>>
27 Sǝ kǝɓwa sǝlǝa ateà ama Yesu na ban nea wia cau amur Tárrí Ɓakuli ɗang. 28 Ace mǝno ka, Yesu nea wia ama, <<A pwari mǝnana wu loasǝna Muna mala Ɓwa a kùli amur nggun-gangndǝi ka, akanó sǝ wun nǝ̀ sǝlǝ ama Mǝ Nda ɓwa mǝnana ǝn na wun nǝma Mǝ Nda ka. A pwari mǝno sǝ wun nǝ̀ sǝlǝ gbal ama ǝn nggǝ pak kǝgìr aɓa rǝcandǝa mem ɗàng. Kǝ gìr mǝnana Tárrám kaniam ngga kǝ nda ǝn nggǝ na ka. 29 Ɓwa mǝnana tasǝam ngga nda atàm; nyem nǝmurǝam ɗàng. Acemǝnana koya pwari ka ǝn nggǝ pak gìr mǝnana kǝ pwasǝbumi ka.>> 30 Pas atà aɓwana mǝnana à ok Yesu aban na amǝnia yì acau ka à pà ɓamuria a baní.
Kǝ mǝsǝcau nda nǝ̀ panzǝ wun ngga
31 Yesu ne aɓwana mǝnana à pà ɓamuria a baní ka ama, <<Ɓǝ̀ wu kpata kanigir mem ngga, wu nda ka amǝkpatam amǝ'mǝsǝcau nì. 32 Sǝ wun nǝ̀ súrǝ̀ mǝsǝcau, sǝ mǝsǝcau ka nǝ̀ panzǝki wun.>>
33 Pǝlǝa à eari wi ama, <<Sǝm ngga, sǝm nda ka amǝkau mala Ibǝrayim, sǝm duk aguro mala kǝɓwa àkǝ̀ pwari ɗàng. Lang sǝ a nǝ na sǝm ama à nǝ̀ panzǝ sǝm?>>†8:33 Ɓalli gbal aɓa: Mat 3:9; Luk 3:8.
34 Yesu nea wia ama:
Mǝ nda ban na wun mǝsǝcau, ɓwa mǝnana kat kǝ pak cauɓikea ka, guro mala cauɓikea na. 35 Guro pà nǝ̀ do a ɓala nǝ̀ ue kam ɗàng, sǝ muna ka, mala ɓala na, do male a ɓala ka pà nǝ́ masǝlǝate ɗàng. 36 Ɓǝ̀ Muna mala Ɓakuli nǝ̀ panzǝo ka, panzǝban mò ka mǝ'mǝsǝcaunì na. 37 Ən sǝlǝna ama wu nda ka amǝkau mala Ibǝrayim, sǝama wu kǝ earce walam, acemǝnana wu eari cau mem ɓǝ̀ kum ban-do a ɓabum wun ɗàng. 38 Mim ngga ǝn nggǝ bang gìr mǝnana ǝn sǝni aban Tárrám ngga. Sǝ wun ngga wu kǝ pak gìr mǝnana tár wun kǝ na wun ngga.
39 Sǝ à eare ama, <<Ibǝrayim nda kà-sǝm.>>
Yesu nea wia ama, <<Ɓǝ̀ kàngkàng wu nda ka amǝkau mala Ibǝrayim ngga, wun nǝ̀ pak agir mǝnana Ibǝrayim pea ka. 40 Wu kǝ earce ama wun nǝ̀ wal-luem, acemǝnana ǝn bangga wun mǝsǝcau mana ǝn o a kún Ɓakuli ka. Sǝ Ibǝrayim pak kǝgìr anggo ɗàng. 41 Wu nda rǝ pak gìr mǝnana nggearǝ tár wun pakkiyi ka.>>
Amǝ Yahudi ne wi ama, <<Ɓakuli nda kǝ Tár sǝm, sǝm nda ka muna tà-jam ɗang.>>
42 Sǝ Yesu nea wia ama:
Ɓǝ̀ tár wun nda Ɓakuli ka, wun nǝ̀ earcem, acemǝnana ǝn pur aban Ɓakuli, sǝ ado ka mǝ ndakani. Ən yipì ɓamúràm ɗàng, Ɓakuli nǝ̀ túrǎm. 43 Man tsǝa sǝ wu bwalta acau mǝnana ǝn nggǝ na wun ngga ɗàng? Nda ace mǝnana wu gandǝ ok cau mem ɗàng. 44 Wun nda ka muna mala tár wun yì Shetan, sǝ wu kǝ earce lumsǝî tár wun kún atúró male. Yì ka, tita walki-alú ɗiɗyal, sǝ kǝ earce mǝsǝcau ɗàng, acemǝnana mǝsǝcau pà aɓalǝi ɗàng. Ɓǝ̀ ndarǝ na nyir ka nda ban lǝmdǝ girbui, acemǝnana yì ka, mǝ nyir na, sǝ nda tár amǝ nyir kat.
45 Sǝ acemǝnana ǝn nggǝ na mǝsǝcau ka, wu earnǝ mim ɗang. 46 Yana atà wun nǝ̀ lǝmdǝ buì arǝ kǝ cauɓikea mǝnana ǝn pê ka? Sǝ ɓǝ̀ mǝsǝcau na ǝn nggǝ bang ngga, mana tsǝa sǝ wu ginǝ earnǝ mim? 47 Ɓwa mǝnana mala Ɓakuli na ka kǝ kwakikiri arǝ cau mala Ɓakuli. Sǝ wun ngga wun nda ka mala Ɓakuli ɗang, nda gìr mǝnana tsǝa sǝ wu kǝ kwaki kir wun arǝì raka.
Yesu akì Ibǝrayim dǝmba
48 Sǝ aɓwana-mǝgule mala amǝ Yahudi ɗì Yesu ama, <<Cau mǝnana sǝm na ama a nda ɓwa Samariya sǝ kukwar nda arǝò ka mǝsǝcau na re?>>
49 Pǝlǝa Yesu nea wia ama, <<Ən panǝ kukwar arǝàm ɗang. Ən nggǝ pê Tárrám gulo sǝ wu kǝ nyesǝam ɓà. 50 Ən pa aban alita ɓamúràm gulo ɗang. Tárrám na kǝ alamta gulo ka, sǝ yì nda ɓwa mǝnana pakkiyi ɓashi mǝ'mǝsǝcau nì ka. 51 Mǝ nda ban bangga wun mǝsǝcau, ɓwa mǝnana kǝ kpata cau mem ngga pà nǝ̀ wu ɗàng.>>
52 Pǝlǝa aɓwana-mǝgule mala amǝ Yahudi ne wi ama, <<Ado sǝ sǝm sǝlǝa aɓa mǝsǝcau ama, a ndanǝ kukwar arǝò! Nggearǝ Ibǝrayim ngga wǔ, sǝ amǝ'ɓangnǝa mala Ɓakuli wú, pǝlǝa a nǝ yia na sǝm ama, <Ɓǝ̀ ɓwa kpata cau mem ka pà nǝ̀ wu ɗang.> 53 A kútì kà-sǝm Ibǝrayim le? Yì ka, wǔ, sǝ amǝ'ɓangnǝa mala Ɓakuli gbal ka à wǔ. Sǝ we ka a kǝ sǝni kǝla a nda yana?>>
54 Yesu earia wia ama, <<Ɓǝ̀ ǝn pê ɓamúràm gulo ka, gulê pà a kún kǝgìr ɗàng. Sǝ Tárrám mǝnana wu kǝ twali ama nda Ɓakuli ma'wun ngga, nda mǝnana pākiyam gulo ka. 55 Wun ngga wu súrǝì ɗàng, sǝ mim ngga ǝn súrǝì. Ɓǝ̀ ǝn na ama ǝn súrǝì raka, mǝ nda mǝ'nyir kǝla wun. Sǝ mim ngga ǝn súrǝì, sǝ ǝn nggǝ kpata cau male. 56 Kà wun Ibǝrayim ngga, pak banɓoarnado ama nǝ̀ sǝn pwari yiu mem, pǝlǝa sǝni sǝ bumi pwasǝo.>>
57 Pǝlǝa amǝ Yahudi banggi Yesu ama, <<A malaká bwal pǝlǝa lumi-tongno ɗang, sǝ lang sǝ a nǝ na ama a sǝn Ibǝrayim?>>
58 Yesu earia wia ama, <<Mǝ nggǝ bangga wun mǝsǝcau, kaniama à nǝ̀ ɓǝl Ibǝrayim ngga, <Mǝ ndakam.>‡8:58 Mǝ ndakam: Mǝnia yì cau ama <<Mǝ ndakam>> ko <<Mǝ nda>> ka lǝmdǝ ama Yesu na arǝ na ama yì ka, Ɓakuli na, kǝla mana Ɓakuli tunǝ ɓamúrì ama <<Mǝ nda>> aɓa malǝmce Pur 3:14 ka.>> 59 À nǝ̀ ok mǝno yì cau ka, kara à pwan atali ama à nǝ̀ ɓukki, sǝ Yesu gbar rǝì, pǝlǝa puro nying Ndàmǝgule mala Ɓakuli.
*8:5 8:5 Ɓalli gbal aɓa: Pǝris 20:10; Nggur 22:22-24.
†8:12 8:12 Ɓalli gbal aɓa: Mat 5:14; Yoh 9:5.
‡8:13 8:13 Ɓalli gbal aɓa: Yoh 5:31.
§8:17 8:17 Ɓalli gbal aɓa: Nggur 19:15.
*8:24 8:24 Mǝ Nda: Aban amǝ Yahudi ka lullǝu mana karban kat nǝ fele à tunǝ Ɓakuli nǝi ka nda <<Yahweh,>> sǝ ɓālǝi ka nda <<Mǝ nda.>> Arǝ aɓea ban aɓa Cau Amsǝban a nê mala Yohana ka, Yesu pak túró nǝ <<Mǝ Nda>> ace mǝnana ɓǝ̀ lǝmdǝ ama yì nda ɓwe.
†8:33 8:33 Ɓalli gbal aɓa: Mat 3:9; Luk 3:8.
‡8:58 8:58 Mǝ ndakam: Mǝnia yì cau ama <<Mǝ ndakam>> ko <<Mǝ nda>> ka lǝmdǝ ama Yesu na arǝ na ama yì ka, Ɓakuli na, kǝla mana Ɓakuli tunǝ ɓamúrì ama <<Mǝ nda>> aɓa malǝmce Pur 3:14 ka.