Ace Apǝris
MƏNCAU
Ace Apǝris ka ndanǝ angguracau ace peri andǝ anàtà mala kpata Ɓakuli a ɓalǝi, mala do'nza mala amǝ Isǝrayila ɓara-ɓara; ɗǝm ngga ndanǝ angguracau ace apǝris mǝnana túró malea na ɓǝà pàk agir mǝnana angguracau mǝno bang ngga.
Múrcau mǝgule mala malǝmcenî nda domǝfele mala Ɓakuli andǝ anjar mǝnana aɓwana male nǝ̀ kpatea ace peri sǝ à nǝ̀ dukdo mǝnana nǝ̀ yinǝ lidǝmba mala dotarǝu malea andǝi ka.
Acau mǝnana aɓwana súrǝ̀ia pepè aɓa malǝmce mǝnia ka à nda ka amǝnana Yesu tunǝia ama ɓaria nzongcau mǝgule ka: <<Awu nǝ earce ɓio mǝ'murkala kǝla mana a earce ɓamurò ka.>> (19:18)
Agir mǝnana a ɓalǝi ka
Anggurcau amur pāki aɓoro andǝ agir'nkila 1:1--7:38
Kùrî Haruna andǝ amuna-burana male túró-pǝris 8:1--10:20
Anggurcau amur pàkkiagir mala doɓoarnsari andǝ do-ɓeami 11:1--15:33
Pwari Shawuɗiban 16:1-34
Anggurcau amur domǝfele aɓa do andǝ peri 17:1--27:34
1
1 Yahweh tunǝ Musa, sǝ nacau nǝi nǝ ɓá Tara Ban-peri, ama, 2 <<Nacau nǝ amǝ Isǝrayila, sǝ wu banggia wia ama: Pwari mana koyan atà wun nǝ̀ yinǝ girkusǝu ace pagìr abanam Yahweh ka, ɓǝ̀ ɓwe twal atà andá ko anzur ko ambul mala domwan male, sǝ ɓǝ̀ yinǝi kǝla pàgir male.
Anggurcau mala pàgir ace pisǝe kǝring
3 <<Ɓǝ̀ pàgir mala ɓwa ka, ndǎ na twal a domwan nǝ̀ pǎ, ace pàgir mala pisǝe kǝring ngga, ɓǝ̀ yinǝ jamnda mǝnana kǝgìr mǝɓane pà kàm arǝì raka. Ɓǝ̀ yinǝi a bankutio aɓa Tara Ban-peri, ace mǝnana ɓǝ̀ duk gir'a a ɓadǝm Yahweh ka. 4 Yì ka nǝ̀ tsǝk bui a ɓamur jamnda mana yinǝi nǝ̀ pa ace pàgir mala pisǝe kǝring ngga, sǝ à nǝ̀ é a kúnì, ace shawuɗǝe. 5 Pǝlǝa yì ka nǝ̀ pwan-myal jamnda mǝno ka a ɓadǝm Yahweh, sǝ amuna-burana mala Haruna, yia apǝris ka, à nǝ̀ yinǝ nkile sǝ à nǝ̀ tàkki arǝ abumban mala gyangŋan mǝnana a bankutio aɓa Tara Ban-peri ka. 6 Pǝlǝa nǝ̀ ɓwā jamnda mǝno, mala pàgir ace pisǝe kǝring ngga, sǝ nǝ̀ sàngi, 7 sǝ amuna-burana mala Haruna, yià apǝris ka, à nǝ̀ ram gimsa amur gyangŋan, à nǝ̀ tsǝk bǝsa ɓǝ̀ tita earke. 8 Pǝlǝa amuna-burana mala Haruna, yià apǝris ka à nǝ̀ nongsǝki nyama mana à kasǝki ka, andǝ ɓamúrí, andǝ mùruí, amur gimsa mǝnana a bǝsa amur gyangŋan ngga; 9 sǝ agir-bumi andǝ akusǝi ka, ɓwê nǝ̀ lea nǝ mùr. Sǝ pǝris nǝ̀ pisǝia puppup a bǝsa amur gyangŋan, ɓǝ̀ duk pàgir mala pisǝe kǝring; pàgir nǝ bǝsa na, mala pa rǝmban mǝɓoarne mana kǝ pwasǝbumam Yahweh ka.
10 <<Ɓǝ̀ pàgir mala ɓwa ka, nzur ko mbul na twal a domwan nǝ̀ pǎ, kǝla pàgir ace pisǝe kǝring ngga, ɓǝ̀ yinǝ gam ko gbato mǝnana kǝgìr mǝɓane pà kàm arǝì raka. 11 Ɓǝ̀ ɓwê pwan-myali a bù gyangŋan mǝnana sǝn njar-nza ka, a ɓadǝm Yahweh. Sǝ amuna-burana mala Haruna, yià apǝris ka, à nǝ̀ tàkki nkile arǝ abumban mala gyangŋan. 12-13 Ɓwê nǝ̀ sàngi nyami, sǝ agir-bumi andǝ akusǝi ka, nǝ̀ lea nǝ mùr, sǝ nǝ̀ kpapia andǝ ɓamúrí, andǝ mùruí. Sǝ pǝris nǝ̀ nongsǝki abare nyama man amur gimsa mana kǝ earki nǝ bǝsa amur gyangŋan ngga; nǝ̀ pà gir'nkila nǝia puppup, sǝ nǝ̀ pisǝia amur gyangŋan; pàgir mala pisǝe kǝring na; pàgir nǝ bǝsa na abanam Yahweh ace pa rǝmban mǝɓoarne mana kǝ pwasǝbumam ngga.
14 <<Ɓǝ̀ pàgir mala ɓwa abanam Yahweh ka, anyal na ace pàgir mala pisǝia kǝring ngga, ɓǝ̀ yinǝ pàgir aɓalǝ akutumurǝm ko akutugangyi. 15 Sǝ pǝris ka nǝ̀ kánǝi amur gyangŋan, nǝ̀ pūrǝ myali ɓǝ̀ kasǝ kpat, nǝ̀ ɗārǝ́ nkile arǝ bum gyangŋan, sǝ nǝ̀ pisǝ ɓamúrí a bǝsa amur gyangŋan. 16 Nǝ̀ pusǝ bumi sǝ nǝ̀ sukki agir mana aɓalǝi ka a nkanggari gyangŋan, a bù gyangŋan mana sǝn njar-takuli ka, a ban mǝnana à kǝ̀ so tú kàm ngga. 17 Pǝlǝa nǝ̀ sàn nyalnì, nǝ̀ mǝni a ban ankpamtari, sǝama pà nǝ̀ gau rǝì kat ɗàng. Sǝ pǝris nǝ̀ pisǝì amur gyangŋan, amur gimsa mǝnana kǝ earki nǝ bǝsa ka. Pàgir mala pisǝe kǝring na; pàgir nǝ bǝsa na abanam Yahweh ace pa rǝmban mǝɓoarne mana kǝ pwasǝbumam ngga.>>