19
Anggurcau mala domǝfele andǝ ɓashi-mǝsǝcau
1 Yahweh nacau nǝ Musa ama, 2 <<Banggi amǝ Isǝrayila kat a ɓinalea ama, <Dumǝna púp wun nǝ̀ dukdo mǝfele, acemǝnana Mim Yahweh Ɓakuli ma'wun ngga mǝ nda mǝfele.
3 << <Koyan atà wun ngga nǝ̀ pà gulo aban nggé andǝ tárrí, sǝ wun nǝ̀ kpata nzongcau mala Pwari Sabbat, pwari usǝlǝo mem: Mǝ nda Yahweh Ɓakuli ma'wun.
4 << <Cè wu pǝlǝa aban kpata ankúl, ko wu pàkkî ɓamur rǝ wun ɓekǝ ɓakuli mǝnana à tùllì nǝ bolo-ntùl ka ɗàng: Mǝ nda Yahweh Ɓakuli ma'wun.
5 << <Lang wun nǝ̀ pà gìr'nkila mala apagir ace dotarǝu abanam Yahweh ka, wu pè pepè ace mǝnana ɓǝ̀ wu kum â aban Ɓakuli ka. 6 Dumǝna púp ama mǝnia yì gìr'nkila ka, wun nǝ̀ lì a pwari mǝnana à pànàɓoro nǝi ka, ko ɓè pwari mana kpate ka, sǝ ɓǝ̀ ɓekǝ gìr ueo aɓalǝi, bà tàruià pwari ka, dumǝna púp wun nǝ̀ pisǝì kǝring a bǝsa. 7 Ɓǝ̀ wu lì ɓekǝ bare gìr'nkilè a tàruià pwari ka, pǝndǝkina; pà nǝ̀ kum â aban Ɓakuli ɗǝm ɗàng. 8 Ɓwa mǝnana kat lì ka, bafe mala cauɓikea male nǝ̀ do amurí, acemǝnana pǝndǝkinace gìr mǝnana à pànì abanam, Mim Yahweh ka, sǝ mǝno yì ɓwa ka à pà nǝ̀ ɓalli aɓalǝ aɓwana male ɗàng.
9 << <Lang wun nǝ̀ pwàn agirɓaban mǝnana à ɓǝl aɓa nzali ma'wun ngga, wu kǝa pwàn gìr kat-kat ɓǝ̀ kya bwal masǝlǝata kún aɓaban ma'wun ɗàng, sǝ pà wu nǝ̀ nyar aban ká alta ɓakurikuri anzǝm pwan-gìrɓaban ɗang. 10 Pà wu nǝ̀ tùki aɓǝlanggun anap kat arǝ aɓaban mala anggun-anap ma'wun ɗàng, sǝ pà wu nǝ̀ tàrki amǝnana à sukki a nzali ka ɗàng; wu nyia ace amǝ'tǝ̀r andǝ abǝri: Mǝ nda Yahweh Ɓakuli ma'wun.
11 << <Pà wu nǝ̀ iun'i ɗang; pà wu nǝ̀ pàkgìr aɓa ɓosǝkiban ɗang; pà wu nǝ̀ ne arǝwun nyir ɗang. 12 Pà wu nǝ̀ kángìr nǝ lullǝàm aɓa nyir ɗang, mǝnana nǝ̀ tsǝa wun nǝ̀ pǝndǝkice lullǝ Ɓakuli ma'wun ngga:*19:12 Ɓalli gbal aɓa: Pur 20:7; Pǝris 18:21; 20:3; Mal 3:5; Jem 5:12. Mǝ nda Yahweh.
13 << <A pà wu nǝ tǝpǝri ɓio mǝ'murkala, ko awu nǝ ak gìr male arǝì ɗàng. Tangnakusǝu mala amǝ'túró-boalo ka, a pà wu nǝ bwali a buo aɓa dù kat bà kwaro mala ban ɗang.†19:13 Ɓalli gbal aɓa: Mal 3:5; Jem 5:4. 14 A pà wu nǝ sáng mǝkir'ara, ko awu nǝ tsǝk gìr-annda a ɓadǝm nte ɗang. Ɓanggî Ɓakuli mô: Mǝ nda Yahweh.
15 << <Dum nǝ ɓafo andǝ kpata mǝsǝcau aɓa pàk ɓashi: a pà wunǝ lǝmdǝ tàrbân arǝ mǝ'tǝ̀r, ko pagulo arǝ mǝkume ɗàng. Dumǝna púp awu nǝ pàk ɓashi mala aɓio aɓwana mala nzali ma'wun nǝ ɓealɓoarna. 16 A pà wunǝ duk ɓwa mǝ̀ ká andǝ nyare aɓalǝ aɓwana mô nǝ acau kiɗikiɓwa ɗàng. ‡19:16 Ko Kǝa nakun mǝ'nyirì amur ɓio ɓwa Isǝrayila, mǝnana nǝ̀ tsǝa à nǝ̀ kasǝi wi ɓashi-lú a ndàɓashi ka ɗàng .Kǝa cam ɗǝong sǝ yilǝmi ɓio mǝ'murkala na aɓa ká-mǝɓane mala lú ɗàng: Mǝ nda Yahweh.
17 << <A pà wu nǝ ɓinǝmǝsǝ mǝ'eambo a ɓabumo ɗàng. Awu nǝ gim ɓio mǝ'murkala a ɓamǝsǝi nǝ banggi wi mǝsǝcau, ɓǝ̀ ana raka awu nǝ nunbi ɓamurò bafe mala cauɓikea male. 18 Kǝa nyesǝì ɓwa gìr mǝɓane a kúnì mǝɓane ɗàng,§19:18 Ɓalli gbal aɓa: Nggur 32:35,41; Pas 20:22; Rom 12:17,19; Ib 10:30; Sǝn 19:2. sǝ a pà wunǝ bwal bumlulla a bumo arǝ kǝɓwa a ɓinado mala aɓwana ma'wun ɗàng; a kún mani ka awu nǝ earce ɓio mǝ'murkala kǝla mana a earce ɓamurò ka:*19:18 Ɓalli gbal aɓa: Pas 17:17; Mat 5:43-45; 22:39; Mar 12:31; Luk 10:27; Rom 13:9; Gal 5:14; Jem 2:8. Mǝ nda Yahweh. 19 Dumǝna púp wun nǝ̀ bwal anê mem. Wu kǝa tsǝk agirkusǝu ma'wun, mǝnana à pà ɓǝle mwashat raka ɓǝà eau rǝia ɗàng; a pà wu nǝ ɓeal a'ulang amǝsǝɓeale ɓari a ɓaban mô ɗàng; a pà wu nǝ oasǝ daura mǝnana à tè nǝ ankonggúr ulangnì ɓari ka ɗàng.
20 << <Ɓǝ̀ kǝ ɓwabura nongnǝ ɓwama guro mǝnana ɓeɓwa pùrnamurí nǝ̀ ali, sǝ à malaká akmúrí ko à nyi ɓǝ̀ kum ɓamúrì raka, dumǝna púp ama ɓwabura man nǝ̀ mbwegìr. Sǝama à pà nǝ̀ kasǝ ɓashi mala wal-luia ɗàng acemǝnana yì ɓwama guro ka, malaká kum panzǝban male ɗàng. 21 Sǝama dumǝna púp ɓwabure nǝ̀ yinǝ gam ace pagìr male mala mbwegìr ace kumcau, abanam Yahweh, a bankutio aɓa Tara Ban-peri. 22 Sǝ pǝris nǝ̀ shawuɗì nǝ gam mala pagìr male mala mbwegìr ace kumcau, a ɓadǝm Yahweh, ace cauɓikea male mana pàk ka, sǝ à nǝ̀ twalîbanì.
23 << <Lang wu yina aɓa nzali Kan'ana sǝ wu pandǝna koya ulang nggun ace girlina ka, dumǝna púp ama ɓǝla-nggunì ka wun nǝ̀ nyesǝì kǝla gìr na mǝnana à pǝrban arǝì ka; wun nǝ̀ twal apǝlǝa tàrú, nǝ̀ dupa wun gìr'ɓeami na; pà wu nǝ̀ lì ɗàng. 24 A inea pǝlǝa ka, wun nǝ̀ tàr aɓǝla-nggunì kat ɓǝà duk paɓoro aban Ɓakuli, ace lǝmdǝ yàwá ma'wun abanam,†19:24 ace lǝmdǝ yàwá ma'wun abanam ko <<ace ɓwangsǝam.>> Mim Yahweh. 25 A tongnoia pǝlǝa ka, wun nǝ̀ gandǝ li ɓǝla-nggunì. Ɓǝ̀ wu kpata nzongcau mǝnia anggo ka, pàɓǝle mala anggunì nǝ̀ hatǝki ace wun: Mǝ nda Yahweh Ɓakuli ma'wun.
26 << <Cè wu lì kǝ̀ nyama nǝ nkile arǝì ɗàng.
<< <Pà wun nǝ̀ kùtí a pàkkiagir mala ɓángnǝ́'ɓángna ko mala sǝ̀lǝ̀ɓǝla ɗàng.‡19:26 Ɓalli gbal aɓa: Nggur 18:10,14; 2Amur 21:6; 2Kpa 33:6; Isha 2:6; 57:3; Ir 27:9.
27 << <Pà wun nǝ̀ kasǝki nyang a takir wun, ko wun nǝ̀ mwa mbotokun wun ɗàng.
28 << <Wu kǝa cangi rǝ wun ace alú, ko wun nǝ̀ tsǝk nyoulǝa arǝ wun ɗàng: Mǝ nda Yahweh.
29 << <Wu kǝa pǝndǝkice amuna-mamǝna ma'wun nǝ tasǝia ɓǝà duk amā-gyatarǝu§19:29 amā-gyatarǝu aɓalǝ anda-peri. ɗàng, ɓǝ̀ ana raka nzali ma'wun nǝ̀ kpa aɓa gyatarǝu*19:29 gyatarǝu ko <<ɗwanyi domǝsǝcau aban Ɓakuli.>> sǝ nǝ̀ lùmsǝ nǝ kìɗìkì.†19:29 kìɗìkì ko <<ɓealɓikea.>>
30 << <Wu bwal nzongcau mala Sabbat, yì pwari usǝlǝo mem, sǝ wu lǝmdǝ pagulo arǝ Tara-mǝfele mem.
31 << <Cè wu pǝlǝa wu kùtí a pàkkiagir mala amǝ'ɗikalú ko mala amǝ'nggár ɗàng; wu kǝa kúti a altea ɗàng. Ɓǝ̀ wu pàk ka, à nǝ̀ dupa wun gìr mǝnana nǝ̀ tsǝa wun nǝ̀ pǝndǝki ka: Mǝ nda Yahweh Ɓakuli ma'wun.
32 << <Wu gusǝlǝ akapana, wu pagulo aban aɓwana-mǝgule, sǝ wu ɓanggî Ɓakuli ma'wun: Mǝ nda Yahweh.
33 << <Lang bǝri yiu sǝ yi do atà wun aɓa nzali ma'wun ngga, wu kǝa pàkce-ɓà ɗàng. 34 Wu pàngnǝ bǝri mǝnana yiu a do aɓalǝ wun ngga kǝla mana wun nǝ̀ pàngnǝ ɓwa mǝnana à ɓǝli a nzali ma'wun ngga, sǝ awu nǝ earce kǝla mana a earce ɓamurò ka. Mǝnia ka nda acemǝnana wun ngga wu nda ka abǝri ɗiɗyal a nzali Masar;‡19:34 Ɓalli gbal aɓa: Pur 23:9; Pǝris 18:3; Nggur 10:19; 23:7. Mǝ nda Yahweh Ɓakuli ma'wun.
35 << <Kǝa ɓǝmbǝri kǝɓwa aɓa kārǝki gìr ɗàng; ko aɓa sauwa mala gìr na, ko aɓa dǝmbǝrya mala gìr na, ko aɓa mwaro mala gìrnî na. 36 Dumǝna púp ama sǝkel mò, ko tyang mò, ko tasau mô, mala kārǝkigir ka ɓǝ̀ do mǝ'mǝsǝcaunì na. Mǝ nda Yahweh Ɓakuli ma'wun mǝnana pusǝ wun, wu purî ɓá nzali Masar ka. 37 Wu kpata anggurcau mem kat andǝ anzongcau mem kat, sǝ wu pea. Mǝ nda Yahweh.> >>
*19:12 19:12 Ɓalli gbal aɓa: Pur 20:7; Pǝris 18:21; 20:3; Mal 3:5; Jem 5:12.
†19:13 19:13 Ɓalli gbal aɓa: Mal 3:5; Jem 5:4.
‡19:16 19:16 Ko Kǝa nakun mǝ'nyirì amur ɓio ɓwa Isǝrayila, mǝnana nǝ̀ tsǝa à nǝ̀ kasǝi wi ɓashi-lú a ndàɓashi ka ɗàng .
§19:18 19:18 Ɓalli gbal aɓa: Nggur 32:35,41; Pas 20:22; Rom 12:17,19; Ib 10:30; Sǝn 19:2.
*19:18 19:18 Ɓalli gbal aɓa: Pas 17:17; Mat 5:43-45; 22:39; Mar 12:31; Luk 10:27; Rom 13:9; Gal 5:14; Jem 2:8.
†19:24 19:24 ace lǝmdǝ yàwá ma'wun abanam ko <<ace ɓwangsǝam.>>
‡19:26 19:26 Ɓalli gbal aɓa: Nggur 18:10,14; 2Amur 21:6; 2Kpa 33:6; Isha 2:6; 57:3; Ir 27:9.
§19:29 19:29 amā-gyatarǝu aɓalǝ anda-peri.
*19:29 19:29 gyatarǝu ko <<ɗwanyi domǝsǝcau aban Ɓakuli.>>
†19:29 19:29 kìɗìkì ko <<ɓealɓikea.>>
‡19:34 19:34 Ɓalli gbal aɓa: Pur 23:9; Pǝris 18:3; Nggur 10:19; 23:7.