4
Shetan kārǝki Yesu
1 Yesu lùmsǝ nǝ Bangŋo Mǝfele, nyàrî Nggeasala Jodan ngga, Bangŋo mala Ɓakuli um nǝi a pǝɗanban a njenza. 2 Akanó ka Shetan camarǝ karǝkì nongŋo lumi-ine. Aɓalǝ amǝno yì anonggio ka li kǝgìr ɗang. A masǝlǝata anongge ka nzala wali.
3 Shetan ne wi ama, <<Ɓǝ̀ a nda Muna mala Ɓakuli ka, ne mǝnia yì tali ka ɓǝ̀ pǝlǝ nɗǝmo.>>
4 Yesu nyesǝi wi ama, <<À gilǝ a Malǝmce mala Ɓakuli ama, <Ɓwa pà nǝ̀ au nǝ girlina nǝmurǝì ɗang.>*4:4 Ɓalli gbal aɓa: Nggur 8:3.>>
5 Shetan loasǝi um nǝi a nggea ban mǝ'dāhre, sǝ lǝmdǝì wi anzali-murǝm mala ɓanza kat aɓa kuɓimǝsǝu. 6 Pǝlǝa Shetan ne wi ama, <<Mǝ nǝ po arǝcandǝa malea andǝ ɓoarɓwa malea kat, acemǝnana à panamia. Mǝ nǝ gandǝ pe koyan mǝnana ǝn earce pe wi ka. 7 Sǝ ɓǝa kū`ndǝó, a gusǝlǝam ngga, agir man nǝ̀ duk amo yia kat.>>
8 Yesu nyesǝi wi ama, <<À gilǝ a Malǝmce mala Ɓakuli ama,
<< <Peri aban Mǝtalabangŋo
Ɓakuli mo,
sǝ wu kpate yì nǝmurǝì.>†4:8 Ɓalli gbal aɓa: Nggur 6:13.>>
9 Shetan nyare loasǝi um nǝi a Urǝshalima, kya tamsǝi a ɓong Ndàmǝgule mala Ɓakuli, sǝ ne wi ama, <<Ɓǝ̀ a nda Muna mala Ɓakuli ka, ta zurro a nzali. 10-11 Acemǝnana Malǝmce mala Ɓakuli bang ama,
<< <Ɓakuli nǝ̀ tsǝk
amǝturonjar male aceo
ɓǝa yalo caca;
à nǝ̀ mbalǝkio a ɓabuia
ace mǝnana wu kǝa
tul kusǝo arǝ tali raka.>‡4:10-11 Ɓalli gbal aɓa: Ang 91:11-12. >>
12 Yesu nyesǝi wi ama, <<À gilǝ aɓa Malǝmce mala Ɓakuli ama, <Ce a kārǝki Mǝtalabangŋo Ɓakuli mo ɗang.>§4:12 Ɓalli gbal aɓa: Nggur 6:16. >>
13 Lang Shetan malǝna kārǝki Yesu ka, pǝlǝa gǝshì banì zuku.
14 Yesu nyare a Galili aɓa rǝcandǝa mala Bangŋo mala Ɓakuli. Cau male akiban kat aɓa nzali mǝno. 15 Kànìgìr arǝ andakpapi malea, sǝ koyan ngga ɓwangsǝki.
À ɓinǝ Yesu a Nazarat
16 Yesu kutio a Nazarat la mǝnana gul kam ngga. A pwari Sabbat, pwari usǝlǝo mala amǝ Yahudi ka, Yesu kutio a ndakpapi kǝla mǝnana pakki ka. Lo came nǝ̀ ɓal cau aɓa Malǝmce. 17 Pǝlǝa à pe wi Malǝmce mala Ishaya Mǝɓangnǝa mala Ɓakuli. Lang mǝnni ka pǝlǝa kum ban mǝnana à gilǝa ama,
18 <<Bangŋo mala Mǝtalabangŋo
nda a muram,
acemǝnana tàrnám
ɓǝ̀n hamnǝ Cau Mǝɓoarne
a ban amǝ'tǝ̀r.
Tasǝam ɓǝ̀n yi hamnǝ
cau mala panzǝban
a ban aɓwana mǝnana
à kùria ka.
Ɓǝà nyesǝi ante
mǝsǝu sǝnban,
sǝ ɓǝà pusǝ aɓwana
mǝnana à nda aɓata
parban ngga a gung.
19 Ɓǝ̀n hama ama
pwari mana Ɓakuli nǝ̀
amsǝ aɓwana male
nǝi ka yina.>>*4:19 Ɓalli gbal aɓa: Isha 61:1-2.
20 Pǝlǝa kar Malǝmce pè mǝ ɗenyi nǝia, ɓunte do. Mǝsǝ ɓwapǝndǝa mǝnana a ndakpapi ka kàr arǝì kat. 21 Pǝlǝa tita nea wia ama, <<Mǝnia yì cau ɓá Malǝmce mala Ɓakuli kir wun oè ka, lùmsǝ̀nà yalung.>>
22 Ko yan ngga bang cau mǝɓoarne amurí, sǝ à pak ndali arǝ sǝlǝ nacau male mǝɓuɓɓuki. Pǝlǝa à ɗiban ama, <<Nggearǝì ka, muna mala Yisǝfu nda man re?>>
23 Yesu nea wia ama:
Ɓafo ka wun nǝ̀ nam mǝnia yì kun-nacau ka, ama, <<Mǝsonzǝo, sonzǝ ɓamuro!>> Ɗǝm ngga wun nǝ̀ nam ama, <<Agir mǝnana sǝm ok ama a pakkia a Kapanahum ngga, pea kani a là mo.>>
24 Ən nggǝ bangga wun mǝsǝcau, kǝ mǝɓangnǝa mala Ɓakuli pà kàm mǝnana à earnǝi a là male ka ɗàng.†4:24 Ɓalli gbal aɓa: Yoh 4:43,44. 25 Ən nggǝ na wun mǝsǝcau ama, amā-lú ndakam pas a nzali Isǝrayila a nza mala Iliya mǝɓangnǝa mala Ɓakuli a bàkú mǝnana mbulo came pǝlǝa tàrú nǝ tsùrú, sǝ nggea nzal-gula kpa a nzali kat ka.‡4:25 Ɓalli gbal aɓa: 1Amur 17:1. 26 Kat anggo ka Ɓakuli tasǝ Iliya a ban kǝɓwa ateà ɗàng, she a ban ɓe mā-lú a Zarefat, a bu-nzali Sidon kano kuko.§4:26 Ɓalli gbal aɓa: 1Amur 17:8-16. 27 Amǝdakali ndakam pas a nzali Isǝrayila a nza mala Elisha mǝɓangnǝa mala Ɓakuli, kat anggo ka Ɓakuli sonzǝ kǝɓwa ateà ɗàng, she kǝ Naaman, bǝri ɓwa Suriya.*4:27 Ɓalli gbal aɓa: 2Amur 5:1-14.
28 Aɓwana mǝnana kat a ndakpapi ka bumia lúllô lang à ok amǝnia yì acau ka. 29 Pǝlǝa à lo à ramgi ta Yesu, à pusǝì anzǝm la, à um nǝi amur muna-nkono mǝnana la malea cam amurí ka, ama à nǝ̀ ramte ɓǝ̀ kpa. 30 Kara gya kutio a nre ɓwabundǝa, bwal njar male aban o.
Yesu pusǝ akukwar
31 Pǝlǝa Yesu sulǝo aban ká Kapanahum, ɓè la aɓa bu-nzali Galili. A pwari usǝlǝo ka tita kani aɓwana gìr. 32 À ndali nǝ kanigìr male acemǝnana cau male ka ndanǝ rǝcandǝa.†4:32 Ɓalli gbal aɓa: Mat 7:28,29.
33 Aɓa ndakpapi ka, ɓeɓwa ndakam nǝ kukwar arǝì. Lo mak'zwalo bàng-bàng kǝ na ama, 34 <<Oi! Mana a alkite arǝ sǝm, we Yesu Ɓwa Nazarat. A yiu ace wal sǝm le? Ən súrǝ́nà rǝo, a nda Ɓwa Mǝfele mala Ɓakuli.>>
35 Yesu sà arǝì ama, <<Gìr kuno più! Purî rǝì!>> Pǝlǝa kukwar loasǝi me a nzali a ɓadǝm ɓwapǝndǝa kat, pǝlǝa purî rǝì, tsǝki wi penye ɗàng.
36 Ɓwapǝndǝa kat ndali, à kǝ nea rǝia ama, <<Ulang ya kanigir nda man? Nǝ nacau sà'arǝban andǝ rǝcandǝa mǝgule sǝ kǝ pusǝ akukwar!>>
37 Kara cau mala Yesu akiban kat a bu-nzali malea.
Yesu twalia aɓwana pas
ban rǝkwana
ban rǝkwana
38 Yesu pǝlǝa purî ɓá Ndakpapi kutio a ɓala mala Shiman. Nkil Shiman ngga ɓauwa gandǝi nongsǝi. Pǝlǝa à zǝmbi Yesu ɓǝ̀ sonzǝi. 39 Yesu kū`ndǝó amurí sǝ gim ɓauwa, pǝlǝa ɓauwa sùlǝî rǝì. Kara long nǝ lo àkǝ̀ banì pea wia girlina.
40 Lang pwari nda rǝ kpa ka, ɓwapǝndǝa yiu nǝ amǝkwánó ɗàngɗáng, pǝlǝa tsǝk buì amur koyan aɓalǝia ka, twalia wia ban rǝkwana kat. 41 Ɗǝm ngga akukwar purî rǝ aɓwana pas, à kǝ loasǝ già ama, <<A nda Muna mala Ɓakuli.>> Yesu gimbia, eare ama ɓǝà na kǝ cau ɗàng, acemǝnana à sǝlǝna ama yì ka, nda Kǝrǝsti‡4:41 Kǝrǝsti: Ko <<Mezaya.>> Mǝ'amsǝban.
Yesu hamnǝ cau mala Ɓakuli
arǝ andakpapi
arǝ andakpapi
42 Nǝ tadǝmbari ka Yesu lo o a ban mǝnana kǝɓwa pà kàm raka. Ɓwapǝndǝa camarǝ alte. Lang à kumǝni ka, à ɓariki à nǝ̀ kàsǝ̀kúni acemǝnana ɓǝ̀ kǝa nyia ɗàng. 43 Pǝlǝa nea wia ama, <<Dumǝnam púp mǝ hamnǝ Cau Amsǝban mala Domurǝm mala Ɓakuli arǝ aɓea lá gbal, acemǝnana àkǝ̀ ce sǝ à túrǎm.>> 44 Pǝlǝa kutio aban hamnǝ cau arǝ andakpapi, a nzali Yahudi.
*4:4 4:4 Ɓalli gbal aɓa: Nggur 8:3.
†4:8 4:8 Ɓalli gbal aɓa: Nggur 6:13.
‡4:10-11 4:10-11 Ɓalli gbal aɓa: Ang 91:11-12.
§4:12 4:12 Ɓalli gbal aɓa: Nggur 6:16.
*4:19 4:19 Ɓalli gbal aɓa: Isha 61:1-2.
†4:24 4:24 Ɓalli gbal aɓa: Yoh 4:43,44.
‡4:25 4:25 Ɓalli gbal aɓa: 1Amur 17:1.
§4:26 4:26 Ɓalli gbal aɓa: 1Amur 17:8-16.
*4:27 4:27 Ɓalli gbal aɓa: 2Amur 5:1-14.
†4:32 4:32 Ɓalli gbal aɓa: Mat 7:28,29.
‡4:41 4:41 Kǝrǝsti: Ko <<Mezaya.>>