Cau Amsǝban a nê mala
MATIU
Mǝncau
Cau Amsǝban a nê mala Matiu ka kǝ na sǝm cau mǝɓoarne mǝnana ama Yesu nda Mǝ'amsǝban mana Ɓakuli pàcau ace, sǝ ɗǝm ngga ama yì nda ɓwa mǝnana nǝbani sǝ Ɓakuli lùmsǝ apàcau male mǝnana pea aɓwana male mana a nza mala Kùrcau Mǝ'e ka. Mǝnia yì bǝsa cau mǝɓoarne mǝnana yiu nǝ amsǝban ngga pa ace amǝ Yahudi, aɓwana mǝnana à ɓǝl Yesu sǝ gul aɓalǝia ka, nǝmurǝia ɗang, nda gbal ace ɓanza puppup.
Acau ɓá malǝmce mala Matiu ka à nongsǝia nǝ tsǝkiru pepe aɓa sǝlǝpe. Tite nǝ ɓǝlban mala Yesu, yi bangce batisǝma andǝ kārǝkiban male, pǝlǝa yi twal acau mala túró hama, andǝ kanigir, andǝ twalban rǝkwana mala aɓwana a Galili. Anzǝm mǝnia ka Cau Amsǝban mala Matiu ka nyoulǝ cau mala gya mala Yesu twal a Galili aban ká a Urǝshalima, andǝ mala agir mǝnana à kumban aɓa limo mǝ'nzǝ́moè mala Yesu, sǝ yi masǝlǝi arǝ cau mala gballe a nggun andǝ loapi ɓembe male.
Mǝnia yì Cau Amsǝban ngga nda ban lǝmdǝ ama Yesu ka nggea Mǝkanigir mǝgule na, mǝnana ndanǝ rǝcandǝa mala mǝngi ɓá Nggurcau mala Ɓakuli, andǝ kanigir amur Domurǝm mala Ɓakuli ka.
Agir mǝnana aɓalǝi ka
Tau andǝ ɓǝlban mala Yesu Kǝrǝsti1:1--2:23
Túró mala Yohana Mǝbatisǝma3:1--12:50
Batisǝma andǝ kārǝkiban mala Yesu3:13--4:11
Túró mala Yesu a ban aɓwana a Galili4:12--18:35
Gya mala Yesu twal a Galili aban ká Urǝshalima19:1--20:34
Limo mǝ'nzǝ́moè mala Yesu tù nǝban Urǝshalima21:1--27:66
Loapi ɓembe andǝ lǝmdǝrǝu mala Mǝtalabangŋo28:1-20
1
Tau mala Yesu
(Luka 3:23-38)
1 Aɓa malǝmce ka tàu mǝnana Yesu Kǝrǝsti, Mǝkà Dauda, Mǝkà Ibǝrayim, pùr kàm ngga ndya ka:
2 Ibǝrayim ɓǝl Ishaku,
Ishaku ɓǝl Yakupu,
Yakupu ɓǝl a Yahuda
andǝ amǝ'eambi,
3 Yahuda ɓǝl Parisa
andǝ Zera.
Nggea nda Tamar.
Parisa nda tár Hezǝron,
Hezǝron ɓǝl Ram,
4 Ram ɓǝl Aminadap,
Aminadap ɓǝl Nashon,
Nashon ɓǝl Salmon,
5 Salmon ɓǝl Boaza.
Ngge nda Rahap.
Boaza ɓǝl Obet.
Nggea Obet nda Rut.
Obet ɓǝl Jeshi,
6 Sǝ Jeshi yi ɓǝl murǝm
Dauda.
Dauda ɓǝl Solomon.
Nggea Solomon ɗiɗyal ka
mā-lú mala Yuriya na.*1:6 Ɓalli gbal aɓa: Rut 4:18-22; 1Kpa 2:1-15.
7 Solomon ɓǝl Riabwam.
Riabwam ɓǝl Abija.
Abija ɓǝl Asa.
8 Asa ɓǝl Jehoshafat.
Jehoshafat ɓǝl Joram.
Joram ɓǝl Uzziya.
9 Uzziya ɓǝl Jotam.
Jotam ɓǝl Ahas.
Ahas ɓǝl Hezekiya,
10 Hezekiya ɓǝl Manasa.
Manasa ɓǝl Amon.
Amon ɓǝl Josiya,
11 sǝ Josiya yi ɓǝl Jekonaya
andǝ amǝ'eambi
(a bàkú mana a bwal amǝ
Isǝrayila a nzali malea
à um nǝia guro
a nzali Babila ka).†1:11 Ɓalli gbal aɓa: 2Amur 24:14,15; 2Kpa 36:10; Ir 27:19-21.
12 A nzǝm mana à umna nǝia
a Babila ka
Jekonaya ɓǝl Shaltiyel.
Shaltiyel ɓǝl Jerubabel.
13 Jerubabel ɓǝl Abiuda.
Abiuda ɓǝl Iliyakim.
Iliyakim ɓǝl Azura.
14 Azura ɓǝl Zadok.
Zadok ɓǝl Akim.
Akim ɓǝl Eliyu.
15 Eliyu ɓǝl Eleaza.
Eleaza ɓǝl Matan.
Matan ɓǝl Yakupu.
16 Sǝ Yakupu yi ɓǝl Yisǝfu,
bura Maryamu.
Maryamu nda yi ɓǝl Yesu,
mana à tunǝki ama Kǝrǝsti ka.
17 Lǝmdǝ ama tite arǝ Ibǝrayim yi bwal ban Dauda ka anza lum-nong-ine na. Sǝ lo a ban Dauda yi bwal bákú mala pwanban aban o a Babila ka anza lum-nong-ine na. Sǝ lo a bàkú mala pwanban aban o a Babila yi bwal ban Kǝrǝsti ka anza lum-nong-ine na.
Ɓǝlban mala Yesu Kǝrǝsti
(Luka 2:1-17)
18 Ani sǝ ɓǝl Yesu Kǝrǝsti pa. Nggè, yì Maryamu ka Yisǝfu pùr amurí nǝ̀ ali. Maryamu ka malaká yiu a ɓala mala Yisǝfu peatu ɗàng, sǝ muna kpa a bumi nǝ kanì mala Bangŋo Mǝfele. 19 Burí Yisǝfu, acemǝnana yì ka, ɓwa mǝɓoarne na ka, eare ama nǝ̀ pè wi kirsakya a mǝsǝ aɓwana ɗàng. Yì ka, pàk ɗenyicau ama à nǝ̀ gauwa aɓa sǝmbǝrǝa.
20 Lang nda mur mǝnia yì ɗenyicau ka, mǝturonjar mala Mǝtalabangŋo yi pusǝrǝi a baní a lòrǝo. Mǝturonjar banggi wi ama, <<Yisǝfu Mǝkà Dauda, ɓangciu ɓǝ̀ kǝa pakko arǝ twal Maryamu ɓǝ̀ duk māmó ɗàng. Acemǝnana muna mana a bumi ka pě mala Bangŋo Mǝfele na. 21 Yì ka, nǝ̀ ɓǝl muna-ɓwabura, sǝ awu nǝ tsǝki wi lullǝu ama Yesu, acemǝnana nǝ̀ yia amsǝ aɓwana male aɓalǝ acauɓikea malea ka.>>
22 Agir mǝnia kat ka à yì pa anggo ace mǝnana ɓǝà lùmsǝ cau mala Mǝtalabangŋo mana puro a kún mǝɓangnǝa male ama:
23 <<Nsari nǝ̀ kum muna-bum,
nǝ̀ ɓǝl muna-ɓwabura,
à nǝ̀ tunǝi ama Immanuyel,>>‡1:23 Ɓalli gbal aɓa: Isha 7:14.
ɓālǝi ama,
<<Ɓakuli nda atà sǝm.>>
24 Lang Yisǝfu loapi ntulo ka, pàk gìr mana mǝturonjar mala Mǝtalabangŋo banggi wi ka; twal Maryamu ɓǝ̀ duk māmí. 25 Sǝ yì ka, pak ɓwama nǝi ɗang yi pur a gbáshí muna-ɓwabura male, pǝlǝa tsǝki muna lullǝu ama Yesu.