10
Yesu túr Alaggana male
lum-nong-ɓari
lum-nong-ɓari
(Markus 3:13-19; 6:7-13; Luka 6:12-16; 9:1-6)
1 Yesu tunǝ alaggana male lum-nong-ɓari sǝ pea wia rǝcandǝa ɓǝà pusǝ abangŋo mǝɓane sǝ ɓǝà twalban koya kwánó andǝ rǝpangŋa.
2 Amǝnia ka à nda ka lullǝ amǝ'mishan lum-nong-ɓari: A dǝmba ka nda Shiman (mǝnana à tunǝki ama Bitǝrus ka) andǝ mǝ'eambi Andǝru; Jemis andǝ mǝ'eambi Yohana (amuna mala Zabadi); 3 Filip andǝ Batalomi; Toma, andǝ Matiu (mǝ'ak boalo-cemi); Jemis (muna mala Alfiyus), andǝ Tadawus; 4 Shiman (mǝ'earce came ace là male), sǝ Yahuda Iskariyoti (mǝnana mak Yesu ka).
5 Yia mǝnia lum-nong-ɓari ka Yesu tasǝia sǝ nea wia ama:
Wu kǝa ká a ban aɓwana mǝnana amǝ Yahudi na raka ɗàng. Wu kǝa kàr a ɓekǝ la mala amǝ Samariya ɗàng. 6 Wu dǝshi anzur mala amǝ Isǝrayila mǝnana à ɓwarki ka. 7 Ká ma'wun ngga, kǝ cau mǝnia ka nda wun nǝ̀ hamnǝi ka: <<Domurǝm mala kùli gbashìna.>> 8 Wu twalban rǝkwana, wu loasǝ alú, wu sonzǝ amǝdakali, wu pusǝki akukwar. Ɓà sǝ à pà wun. Wu pè aɓwana gbal ɓà. 9 Wu kǝa twal kǝ boalo a bu wun ko a lǝpan ɗàng, koya ulangnì nani ka. 10 Wu kǝa twal kǝ luru ko daura andǝ nkura nggaɗya, ko gara-gya a bu wun ɗàng. Mǝturo ka ɓǝà pè wi gìr mǝnana ɓoaro ɓǝ̀ kum ngga.
11 Ɓǝ̀ ya nggea-là ko muna-là wu kútí kam ngga, wu alta ɓwa mǝɓoarne mǝnana nǝ̀ ak wun ngga, wu sulǝo a baní bà pwari mǝnana wun nǝ̀ nyìngŋǝ̀nà lê nǝi ka. 12 Ɓala mǝnana wun nǝ̀ kútí kam ngga, wu nea wia ama ɓǝ̀ rǝ wun pwalo. 13 Ɓǝ̀ amǝɓalae ak wun ngga, ɓǝ̀ dorǝpwala ma'wun do ateà, sǝ ɓǝà ak wun raka, ɓǝ̀ dorǝpwala ma'wun nyare atà wun. 14 Ɓǝ̀ ya ɓala ko là mǝnana gingsǝ wun ko kwakikiri arǝ cau ma'wun raka, ɓǝ̀ wun nǝ̀ nying banì ka, wu kǝtǝriki tú là malea mǝnana a kusǝ wun ngga.*10:14 Ɓalli gbal aɓa: Atúró 13:51. 15 Ən nggǝ na wun mǝsǝcau, a pwari ɓashi ka, amǝ Sodom andǝ amǝ Gomora ka, ɓashi malea nǝ̀ ɓoari mala ala mǝno.
Tanni mana kǝ yiu amur
amǝkpata Yesu ka
amǝkpata Yesu ka
(Markus 13:9-13; Luka 21:12-17)
16 Mǝ ndya ǝn nggǝ túr wun kǝla anzur aɓalǝ anvwa bondo. Ace mani ka, wu dum nǝ kwaro kǝla an'yau, sǝ wu duk amǝ'ɗwanyicau arǝu kǝla akutu.†10:16 Ɓalli gbal aɓa: Luk 10:3.
17 Wu par kir wun nǝ aɓwana. À nǝ̀ kánǝ wun aban amǝ'ɓashi. À nǝ̀ kok wun aɓalǝ andakpapi malea.‡10:17 Ɓalli gbal aɓa: Mar 13:9-11; Luk 12:11,12; 21:12-15. 18 À nǝ̀ kánǝ wun a ɓadǝmbǝ amurǝma andǝ amǝtala nzali ace cau mem, ace mǝnana ɓǝ̀ wu bang Cau Amsǝban mem abania sǝ aban aɓwana mǝnana amǝ Yahudi na raka. 19 Sǝ ɓǝ̀ à yì bwalkina wun ngga, ɓalǝ wun ɓǝ̀ kǝa kasǝkia arǝ cau mǝnana wun nǝ̀ na ko lang sǝ wun nǝ̀ na ce ka ɗàng. Àkǝ̀ pwari mǝno Bangŋo mala Ɓakuli nǝ̀ pà wun cau mǝnana wun nǝ̀ na ka. 20 Acemǝnana wu nda wun nǝ̀ nacau ka ɗàng, Bangŋo mala Tár wun na nǝ̀ nacau nǝ kún wun ngga.
21 Mǝ'eambu nǝ̀ mak mǝ'eambi ɓǝà wali. Tárrú nǝ̀ mak muni ɓǝà wali. Amuna nǝ̀ pǝlǝa arǝ atárrià andǝ anggea sǝ à nǝ̀ tsǝa ɓǝà walia.§10:21 Ɓalli gbal aɓa: Mar 13:12; Luk 21:16. 22 Aɓwana kat à nǝ̀ ɓinǝmǝsǝ wun acem; sǝ ɓwa mǝnana cam kàngkàng aban ká masǝlǝate ka nǝ̀ àwá.*10:22 Ɓalli gbal aɓa: Mat 24:9,13; Mar 13:13; Luk 21:17. 23 Ɓǝà pà wun tanni a ɓè la ka, wu ɓangŋa wu kya ɓè. Ən nggǝ na wun mǝsǝcau kaniama wun nǝ̀ mal gya arǝ alá mala amǝ Isǝrayila kat ka, Muna mala Ɓwa nyarǝna yina.
24 Mǝ'eaulǝkigir kútì mǝkani wi gìr ɗàng. Sǝ muna-ɓala kútì mǝtala-ɓala male ɗàng.†10:24 Ɓalli gbal aɓa: Luk 6:40; Yoh 13:16; 15:20. 25 Mǝ'eaulǝkigir ka ɓǝ̀ alte ɓǝ̀ kum do kǝla malǝm male, sǝ muna-ɓala ka ɓǝ̀ alte ɓǝ̀ kum do kǝla mǝtala-ɓala male. Ɓǝ̀ mǝtala-ɓala ka à tunǝi ama Murǝm mala akukwar‡10:25 Murǝm mala akukwar ko Be'elzebul ko Be'elzebup ka, acili amǝɓala ka lullǝu mana à nǝ̀ tunǝia nǝi ka nǝ̀ ɓike nǝ̀ kutibanì!§10:25 Ɓalli gbal aɓa: Mar 9:34; 12:24; Mar 3:22; Luk 11:15.
Ɓwa mǝnana wun nǝ̀
ɓanggi wi ka
ɓanggi wi ka
(Luka 12:2-7)
26 Ace mani ka ɓangciu ɓǝ̀ kǝa pakka wun arǝ aɓwana ɗàng. Gìr mǝnana à mbuɓɓǝ́ki tè ado ka tè nǝ̀ nggá puro, sǝ kǝgìr pà kàm mǝnana sǝmbǝrǝa sǝ à pà nǝ̀ sǝlǝce raka.*10:26 Ɓalli gbal aɓa: Mar 4:22; Luk 8:17. 27 Acau mǝnia ǝn nggǝ na wun a pǝndǝa ka, wu kya nea a banfana. Cau mǝnana ǝn sherǝa wun a kir wun ngga, wu hamnǝ ce amur akurǝm. 28 Wu kǝa ɓanggi aɓwana mǝnana à kǝ wal nggūrǝu ka ɗang; à pà nǝ̀ gandǝ je yilǝmu ɗang. Ɓwa mǝnana wun nǝ̀ ɓanggi wi ka nda kǝ Ɓakuli mwashat, mǝnana nǝ̀ kiɗiki nggūrǝu andǝ yilǝmu a lú-bǝsa ka. 29 Amuna-nyal ɓari ka à kǝ mea kwapo mwashat re? Sǝ anggo ka kǝ ɓè pà kàm mwashat nǝ̀ kpa a nzali nǝ̀ wú sǝ pà nǝ́ sǝlǝe mala Tár wun raka. 30 Nggearǝ anyiaun-ɓamur wun ngga à ɓalnia. 31 Ace mani ka ɓangciu ɓǝ̀ kǝa pakka wun ɗàng. Wu kútì amuna-nyal kusǝ pas.
Bang Paɓamuru mô
a dǝmbǝ aɓwana
a dǝmbǝ aɓwana
(Luka 12:8-9)
32 Ɓwa mǝnana bang paɓamuru male arǝàm a dǝmbǝ aɓwana ka, mǝ nǝ twalce gbal ama yì ka, memna a ɓadǝm Tárrám mǝnana a kùli ka. 33 Sǝ ɓwa mǝnana makgìr súrǝàm a dǝmbǝ aɓwana ka, mim gbal ka mǝ nǝ makgìr súrǝè a ɓadǝm Tárrám mǝnana a kùli ka.†10:33 Ɓalli gbal aɓa: 2Tim 2:12.
Kpata Yesu nǝ̀ yiu nǝ gapitarǝu
(Luka 12:51-53; 14:26,27)
34 Wu kǝa twali ama ǝn yiua yinǝi ɓanza dotarǝu. Awo, ǝn yiua yinǝ dotarǝu ɗang, ǝn yiua yinǝ nggeabyau.‡10:34 nggeabyau: Ko <<gapitarǝu ko lwa ko wal-lú.>> 35 Ən yiua pǝlǝ
<<Ɓwabura arǝ tárrí,
muna-ɓwama arǝ ngge,
sǝ ɓwama arǝ
nkili-mǝɓwame;
36 aɓwana mana a ɓala
mala ɓwa ka,
à nda à nǝ̀ pǝlǝ
aɓi-mǝbura ka.>>§10:36 Ɓalli gbal aɓa: Mik 7:6.
37 Ɓwa mǝnana earce tárrí ko nggè kútiǎm ngga, kārǝa nǝ̀ duk mǝkpatam ɗang. Ɓwa mǝnana earce muni mǝɓwabure ko mǝɓwame kútiǎm ngga, kārǝa nǝ̀ duk mǝkpatam ɗàng. 38 Ɓwa mǝnana twal nggun-gangndǝi male sǝ yiu atàm raka, kārǝa nǝ̀ duk mǝkpatam ɗàng.*10:38 Ɓalli gbal aɓa: Mat 16:24; Mar 8:34; Luk 9:23. 39 Ɓwa mǝnana kǝ yál yilǝmi ace amsǝe ka nǝ̀ nggá ɗwanyibani, sǝ ɓwa mana túrtà yilǝmi acem ngga, nǝ̀ nggá kumi.†10:39 Ɓalli gbal aɓa: Luk 17:33; Yoh 12:25.
Atangnakusǝu
(Markus 9:41)
40 Ɓwa mǝnana ak wun ngga mǝ nda akiyiam ngga. Sǝ ɓwa mana em ngga ndarǝ ak ɓwa mǝnana tasǝam ngga.‡10:40 Ɓalli gbal aɓa: Luk 9:48; 10:16; Yoh 13:20; Mar 10:37. 41 Ɓwa mana ak mǝɓangnǝa mala Ɓakuli acemǝnana ama yì ka, ɓwa mala Ɓakuli na ka, nǝ̀ kum tangnakusǝu mala mǝɓangnǝa. Sǝ ɓwa mǝnana ak mǝ'cauɓoarna ace mǝnana ama yì ka, mǝ'cauɓoarna na ka à nǝ̀ pe wi tangnakusǝu mala mǝ'cauɓoarna. 42 Ko ɓǝ̀ mùr pwala na a kwap sǝ koya ɓwa pè mwashat atà amǝkèke mǝnia, acemǝnana ama mǝkpatam na ka, ɓafo nǝ̀ kum tangnakusǝi.
*10:14 10:14 Ɓalli gbal aɓa: Atúró 13:51.
†10:16 10:16 Ɓalli gbal aɓa: Luk 10:3.
‡10:17 10:17 Ɓalli gbal aɓa: Mar 13:9-11; Luk 12:11,12; 21:12-15.
§10:21 10:21 Ɓalli gbal aɓa: Mar 13:12; Luk 21:16.
*10:22 10:22 Ɓalli gbal aɓa: Mat 24:9,13; Mar 13:13; Luk 21:17.
†10:24 10:24 Ɓalli gbal aɓa: Luk 6:40; Yoh 13:16; 15:20.
‡10:25 10:25 Murǝm mala akukwar ko Be'elzebul ko Be'elzebup
§10:25 10:25 Ɓalli gbal aɓa: Mar 9:34; 12:24; Mar 3:22; Luk 11:15.
*10:26 10:26 Ɓalli gbal aɓa: Mar 4:22; Luk 8:17.
†10:33 10:33 Ɓalli gbal aɓa: 2Tim 2:12.
‡10:34 10:34 nggeabyau: Ko <<gapitarǝu ko lwa ko wal-lú.>>
§10:36 10:36 Ɓalli gbal aɓa: Mik 7:6.
*10:38 10:38 Ɓalli gbal aɓa: Mat 16:24; Mar 8:34; Luk 9:23.
†10:39 10:39 Ɓalli gbal aɓa: Luk 17:33; Yoh 12:25.
‡10:40 10:40 Ɓalli gbal aɓa: Luk 9:48; 10:16; Yoh 13:20; Mar 10:37.