15
Kànìgìr mala aɓwana-mǝgule
(Markus 7:1-13)
1 Anzǝm mani ka aɓea amǝ Farisi andǝ amǝkani Nggurcau mala Musa pur a Urǝshalima, à yiu a ban Yesu sǝ à ɗì ama, 2 <<Mana tsǝa sǝ alaggana mo kǝ yàl nzongcau mala aká sǝm? À kǝ̀ lak buia sǝ à nǝ̀ lili ɗang!>>
3 Yesu pǝlǝia wia ama:
Sǝ ace man ɗe sǝ wu kǝ yàl nzongcau mala Ɓakuli ace pakki akanìgìr ma'wun? 4 Ɓakuli ka bang ama, <<Pè tárró andǝ nggo gulo, sǝ ɓwa mǝnana sáng tárrí ko nggè ka, dumǝna púp à nǝ̀ wali ɓǝ̀ wú.>>*15:4 Ɓalli gbal aɓa: Pur 20:12; 21:17; Pǝris 20:9; Nggur 5:16. 5 Sǝ wun ngga wu bang ama ɓǝ̀ ɓwa ne tárrí ko nggè ama, <<Gìr mǝnana ɓǝ a wú nǝ́ kúmó a buam ace po gbasha ka, ǝn pani Ɓakuli ka,>>†15:5 ǝn pani Ɓakuli: Aɓa kpata kúncau mala amǝ Yahudi ka, ɓǝ̀ ɓwa bang ama gìr ka pani Ɓakuli ka, mǝno yì gìr ka dumǝna mala Ɓakuli, ɓwe pà nǝ̀ nyare nǝ̀ pàngŋǝ̀nà túró nǝi ace ɓamúrì, ko nǝ̀ pe nggè ko tárrí ka ɗang. 6 ɓwe nǝ̀ gandǝ ginǝ pe tárrí ko nggè gulo nǝi. Anggo ka wu nyesǝna cau mala Ɓakuli ɓà ace pàkkiagir ma'wun. 7 Wun amǝ'kúnɓárína! Ɓangna mala Ishaya amur wun ngga nda a njarì, mǝnana bang ama:
8 <<Aɓwana mǝnia ka
à kǝ pam gulo
nǝ mburkunia,
sǝ ɓabumia ka
nda kuko nǝ mim.
9 Peri malea abanam ngga
mǝɓane na;
akanìgìr malea ka
anzongcau mala
ɓwapǝndǝa na
à kaniki ka.>>‡15:9 Ɓalli gbal aɓa: Isha 29:13.
Agir mana à kǝ tsǝk ɓwa
sǝ kǝ pǝndǝki ka
sǝ kǝ pǝndǝki ka
(Markus 7:14-23)
10 Yesu tunǝ ɓwabundǝa sǝ banggia wia ama, <<Wu kwaki kir wun ɓǝ̀ cau kpaka wun. 11 Gìr mana kǝ kutio a kun ɓwa ka nda kǝ pǝndǝkì ka ɗang, cau mana purkiyi a kúni ka, nda mana kǝ tsǝi sǝ kǝ pǝndǝki ka.>>
12 Alaggana male pǝlǝa à yiu a baní sǝ à ɗì ama, <<A sǝlǝ ama bum amǝ Farisi lúllô arǝ cau mana a ne ka?>>
13 Sǝ Yesu pǝlǝia wia ama, <<Ɓǝ̀ ya girpwala nani à pandǝi mǝnana Tárrám mana a kùli ka nǝ̀ pandǝi raka, à nǝ̀ ui. 14 Wu ɗekia; yia ka à nda ka ante mana à kǝ bwalì ante gara ka. Ɓǝ̀ nte bwalì nte gara ka, yia kǝm ngga à nǝ̀ kpa tūli.>>§15:14 Ɓalli gbal aɓa: Luk 6:39.
15 Bitǝrus ne wi ama, <<Bǝla sǝm ɓá kanicau mana ama girlina na kǝ tsǝk ɓwa sǝ kǝ pǝndǝki raka.>>
16 Yesu nea wia ama:
Wun gbal ka cau kǝ kpaka wun re? 17 Wu sǝlǝ mbo ama gìr mana kat kutio a kun ɓwa ka kǝ o a bumi, sǝ nǝ̀ nggá pur a nza? 18 Sǝ agir mǝnana à kǝ pur a kun ɓwa ka à kǝ̀ yiu nǝ ɓabumi, sǝ à nda ka mǝnana à nǝ̀ tsǝk ɓwa nǝ̀ do nǝ pǝndǝkya ka. 19 Àkǝ̀ ɓabum ɓwa sǝ aɗenyicau mǝɓane kǝ puro; wal-lú, nongnǝban a nza nǝ doɓala, gyagung, ǝn'í, kùmsǝkûn, sǝ zalǝban. 20 Amǝnia ka à nda ka gir mǝnana à nǝ̀ tsǝk ɓwa nǝ̀ pǝndǝki ka. Lìli nǝ abu mǝnana à lea raka pà nǝ̀ tsǝk ɓwa nǝ̀ pǝndǝki ɗang.
Paɓamuru mala ɓwama Kan'ana
(Markus 7:24-30)
21 Yesu nying ban mǝno sǝ o a nzali mala amǝ Taya andǝ amǝ Sidon. 22 Ɓè ɓwama Kan'ana*15:22 ɓwama Kan'ana: Amǝ Kan'ana ka amǝ Isǝrayila na ɗang. mǝnana do a mǝno yì bu ban ngga, yiu a baní nǝ ɓua ama, <<Mǝtalabangŋo, Muna mala Dauda†15:22 Muna mala Dauda: <<Ko Mǝkà Dauda.>>, sǝn mǝsǝswatǝr mem! Ɓoarnsarilem ngga nda aɓa tanni kǝ̀rkǝ́r a ɓabù kukwar mǝnana kutia rǝì ka.>> 23 Yesu pǝlǝi wi kǝ cau ɗang. Alaggana male yiu a baní sǝ à zǝmbi wi ama, <<Sǝnbi ɓwama mǝnia ka ɓacau male ɓǝ̀ o. Ace mǝnana camarǝ gya atà sǝm nǝ ɓua.>>
24 Yesu pǝlǝia wia ama, <<Kǝ anzur mala amǝ Isǝrayila mana à ɓwarki ka nda à túrǎm abania ka.>>
25 Ɓwame yiu yi kū`ndǝó a ɓadǝmbi, sǝ na ama, <<Mǝtalabangŋo, bwalàm kàm!>>
26 Yesu pǝlǝi wi ama, <<Ɓoaro ɓǝà twal girlina mala amuna ɓǝà pè anvwa ɗàng.>>
27 Ɓwame eare ama, <<E, Mǝtalabangŋo, nggearǝ anvwa ka à kǝ tarki aɓwangina girlina mǝnana à kǝ kpaki a nzali a ban-li mala amǝtalea ka.>>
28 Yesu pǝlǝa ne wi ama, <<Ɓwama, paɓamuru mô ka nggea mǝgule na! Zǝmba mô ka à ongŋǝni.>> Kara àkǝ̀ banì rǝ muni malâ.
Yesu linǝ́ aɓwana á-ine
(Markus 8:1-10)
29 Yesu nying ban mǝno sǝ gya a kun Garang mala amǝ Galili. Kya eauwe a bum ɓe nkono do akàm. 30 Ɓwabunda pas yiu a baní. À yiu nǝ aɓwana mana à su ka, ante, a gbakǝre, amǝ'talasǝuɓunna andǝ acilia pas, à yì nongsǝia a ɓadǝmbi; sǝ twalia wia ban akwánó malea. 31 Ɓwapǝndǝa ndali lang à sǝn amǝ'talasǝuɓunna aban nacau, aɓwan à su ka à lo tak, agbakǝre lo à kǝ gya, sǝ ante kǝ sǝnban. Pǝlǝa à ɓwangsǝki Ɓakuli mala amǝ Isǝrayila.
32 Yesu tunǝ alaggana male a baní sǝ nea wia ama, <<Ən nggǝ sǝn mǝsǝswatǝr mala aɓwana mǝnia ka, acemǝnana à ndakani atàm nongŋo tàrú a dyan, andǝa nzala. Ɓǝa kǝa o anggo ɗang, ace mǝsǝpǝndǝa makkia a njar.>>
33 Pǝlǝa alaggana male ne wi ama, <<Ake sǝ sǝm nǝ̀ kum girlina a bondo mǝnia ka, mǝnana sǝm nǝ̀ linǝ aɓwana mǝnia pas ka?>>
34 Yesu ɗia ama, <<Agbatali bǝredi shen a bu wun ɗe?>>
À ear ama, <<À nda tongno-nong-ɓari andǝ amǝnji bǝti.>>
35 Pǝlǝa Yesu ne ɓwabundǝa ɓǝa do a nzali. 36 Sǝ twal abǝredi tongno nong-ɓari andǝ anji, lang pangŋǝni Ɓakuli yàwá ka, pǝlǝa ɓwanggia sǝ pe alaggana male. Sǝ yia gbal ka, à gaki aɓwana. 37 Ɓwabunda man kat ka lìli ɗǝmbǝo, nying cili. Alaggana male ramgi cili mana ueo ka, à pwano arǝ azace tongno-nong-ɓari.
38 Lakki mala aɓwana mana à lìli ka, aburana á-ine na. Amamǝna andǝ muna mana ateà ka à ɓallia ɗang.
39 Yesu pǝlǝa ne aɓwabundǝa ɓǝà o a la, sǝ kutio a waru o a bu-nzali Magadan.
*15:4 15:4 Ɓalli gbal aɓa: Pur 20:12; 21:17; Pǝris 20:9; Nggur 5:16.
†15:5 15:5 ǝn pani Ɓakuli: Aɓa kpata kúncau mala amǝ Yahudi ka, ɓǝ̀ ɓwa bang ama gìr ka pani Ɓakuli ka, mǝno yì gìr ka dumǝna mala Ɓakuli, ɓwe pà nǝ̀ nyare nǝ̀ pàngŋǝ̀nà túró nǝi ace ɓamúrì, ko nǝ̀ pe nggè ko tárrí ka ɗang.
‡15:9 15:9 Ɓalli gbal aɓa: Isha 29:13.
§15:14 15:14 Ɓalli gbal aɓa: Luk 6:39.
*15:22 15:22 ɓwama Kan'ana: Amǝ Kan'ana ka amǝ Isǝrayila na ɗang.
†15:22 15:22 Muna mala Dauda: <<Ko Mǝkà Dauda.>>